Արաբական Վեհաժողովը կոչ ուղղեց` Պաղեստինի մէջ միջազգային խաղաղապահ ուժեր տեղակայելու

Պահրէյնի մէջ 16 մայիսին գումարուած արաբական վեհաժողովը կոչ ուղղեց` մինչեւ «երկու պետութիւններ» լուծումի գործադրումը Պաղեստինի մէջ միջազգային խաղաղապահ ուժեր տեղակայելու:

Վեհաժողովը նաեւ դատապարտեց իսրայէլեան ուժերուն կողմէ Ռաֆահ սահմանային անցակէտի պաղեստինեան կողմի գրաւումը:

Արաբական վեհաժողովը կոչ ուղղեց` գումարելու խաղաղութեան միջազգային խորհրդաժողով մը, որ «կը մարմնաւորէ Պաղեստինեան պետութիւն ունենալու իրաւունքը»:

Պաղեստինեան իշխանութեան նախագահ Մահմուտ Ապպաս Մանամայի մէջ վեհաժողովի բացման նիստի ընթացքին իր արտասանած խօսքին մէջ յայտնեց. «Ժամանակն է, որ Միացեալ Նահանգներ դադրին երկակի չափանիշներու քաղաքականութիւն կիրարկելէ»:

«Ժամանակը հրատապ դարձաւ գործի լծելու մեր ժողովուրդի պաշտպանութեան համար արաբական ապահովութեան ցանցը», շեշտեց Ապպաս` նշելով, որ ներկայիս առաջնահերթութիւնը «Կազայի դէմ իսրայէլեան յարձակումի դադրեցումն է, ինչպէս նաեւ պէտք է անպայման աւելցնել մարդասիրական օժանդակութիւնները եւ արգիլել պաղեստինցիներու Կազայէն տեղահանումը»:

Եգիպտոսի նախագահ Ապտել Ֆաթթահ Սիսի իր կարգին մերժեց պաղեստինեան դատի լուծարումը եւ պաղեստինցիներու բռնի տեղահանութիւնը:

Քննադատելով միջազգային քաղաքականութիւնը ան ըսաւ. «Մենք իսրայէլեան բռնագրաւումին եւ շրջանին մէջ տագնապին վերջ տալու որեւէ միջազգային քաղաքական կամք չենք տեսներ»:

Աղբիւրը` Ազդակ