Նեթանիահուի եւ Սընուարի դէմ միջազգային քրէական դատարանի դատախազի պահանջին վերաբերեալ միջազգային արձագանգներ
Միացեալ Նահանգներու նախագահ Ճօ Պայտըն դատապարտեց Միջազգային քրէական դատարանի դատախազ Քարիմ Խանի` Իսրայէլի վարչապետ Պենիամին Նեթանիահուն եւ պաշտպանութեան նախարար Եոաւ Կալանթը պատերազմական ոճիրներ եւ մարդկութեան դէմ ոճիրներ գործելնուն համար ձերբակալելու հրամանագիր հրապարակելու «ամօթալի» պահանջը: «Յստակ պիտի ըլլամ, անկախ անկէ, թէ այս դատախազին քայլերը ինչ կը պարունակեն, Իսրայէլի եւ Համասի միջեւ բացարձակապէս հաւասարութիւն չկայ», ըսաւ Պայտըն:
Միացեալ Նահանգներու արտաքին գործոց նախարար Էնթընի Պլինքըն հաղորդագրութիւն մը հրապարակելով յայտնեց. «Միացեալ Նահանգներ կը մերժեն Միջազգային քրէական դատարանի ընդհանուր դատախազի իսրայէլացի պաշտօնատարներու եւ Համասէն պաշտօնատարներու ձերբակալման հրամանագիր հրապարակելու պահանջը»: Ան նաեւ շեշտեց. «Մենք կը մերժենք դատախազի` Իսրայէլն ու Համասը նոյն նժարին վրայ դնելը»:
Ան զգուշացուց, որ այդպիսի հրամանագիրի մը հրապարակումը «թերեւս կ՛ականահարէ Կազայի մէջ զինադադար հաստատելու, գերիներու փոխանակում կատարելու եւ մարդասիրական օժանդակութիւնները աւելցնելու համաձայնութեան հասնելու համար թափուող ջանքերը»:
Միացեալ Նահանգներու պաշտպանութեան նախարար Լոյտ Օսթին յայտարարեց. «Միացեալ Նահանգներ պիտի շարունակեն Ուքրանիոյ հարցին շուրջ գործակցիլ Միջազգային քրէական դատարանին հետ, հակառակ իսրայէլացի պաշտօնատարներու դէմ ձերբակալման հրամանագիրներու հրապարակման պահանջին»:
Գերմանիոյ արտաքին գործոց նախարարութիւնը նշեց. «Միեւնոյն ժամանակ Համասի շարժումի ղեկավարներուն դէմ եւ Իսրայէլի պաշտօնատարներուն դէմ ձերբակալման հրամանագիրներ հրապարակելը երկու կողմերուն միջեւ հաւասարութեան կեղծ տպաւորութիւն ստեղծեց»: Ան նաեւ շեշտեց, որ պէտք է յարգել Միջազգային քրէական դատարանի «անկախութիւնը»:
Ֆրանսայի արտաքին գործոց նախարարութիւնը յայտնեց. «Ֆրանսան կը զօրակցի Միջազգային քրէական դատարանին, անոր անկախութեան եւ բոլոր պարագաներուն հաշուետուութենէ փախուստ տալու դէմ պայքարին»:
Նախարարութիւնը դատապարտեց «7 հոկտեմբերին Իսրայէլի վրայ իր յարձակումին ընթացքին Համասի գործած հակասեմական ջարդերը եւ անոնց ընթացքին արձանագրուած չարչարանքներն ու սեռային բռնութիւնը»: Ֆրանսայի արտաքին գործոց նախարարութիւնը նաեւ զգուշացուց Իսրայէլը, որ պէտք է խիստ կերպով յարգէ միջազգային մարդասիրական օրէնքը, մասնաւորաբար Կազայի մէջ քաղաքային զոհերու անընդունելու մակարդակը եւ բաւարար ձեւով միջազգային օժանդակութիւններու չհասնիլը:
Եւրոպական Միութեան արտաքին քաղաքականութեան բարձրագոյն յանձնակատար Ճոզեփ Պորել յայտնեց. «Միջազգային քրէական դատարանը անկախ միջազգային հաստատութիւն է»: Ան աւելցուց. «Անոր հիմնական կանոնադրութիւնը վաւերացուցած երկիրները անոր որոշումները գործադրելու պարտաւորութեան տակ են»:
Իտալիոյ արտաքին գործոց նախարար Անթոնիօ Թայանի իտալական «Քորիերէ տելլա Սերա» օրաթերթին հետ հարցազրոյցի ընթացքին յայտնեց, որ «Համասն ու Իսրայէլը նոյն նժարին վրայ դնելը բացարձակապէս անընդունելի է»` նշելով. «Պէտք է զգուշ ըլլալ Իսրայէլի նկատմամբ թշնամական կեցուածքները օրինականացնելէ, ինչ որ կրնայ հակասեմականութեան երեւոյթը խթանել»:
Չինաստանի արտաքին գործոց նախարարութիւնը յոյս յայտնեց, որ Միջազգային քրէական դատարանը «պահպանէ իր առարկայական ու անկողմնակալ դիրքորոշումը, եւ իր լիազօրութիւնները կիրարկէ օրէնքին համահունչ»: Նախարարութիւնը կոչ ուղղեց վերջ տալու «պաղեստինցի ժողովուրդին դէմ հաւաքական պատիժը»:
Քաթարի արտաքին գործոց նախարարութեան բանբերը յայտնեց, որ իրենք միջազգային քրէական դատարանի որոշումը չեն կանխեր, «որովհետեւ մենք Միջազգային քրէական դատարանի կանոնադրութեան մաս չենք կազմեր»:
«Հռոմի կանոնադրութեան մաս չենք կազմեր, սակայն յանձնառու ենք միջազգային ընտանիքին մէջ մեր դերակատարութեան», ըսաւ ան:
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
