Պայտըն. «Գործարքի չգործադրուելուն պատասխանատուն Համասն է, եւ կրնայ այս հարցին վաղը իսկ վերջ տալ»

Միացեալ Նահանգներու նախագահ Ճօ Պայտըն յայտնեց. «Գոյութիւն ունի պատճառ մը, որ մարդոց կը մղէ եզրակացնելու, որ Իսրայէլի վարչապետ Պենիամին Նեթանիահու իր քաղաքական գոյութիւնը պահպանելու համար աշխատանք կը տանի պատերազմը երկարաձգելու»:

Պայտըն ամերիկեան «Թայմ» պարբերաթերթին յայտնեց. «Նեթանիահու պատանդներու հարցով հսկայական ճնշումներու կ՛ենթարկուի, ուստի ան պատրաստ է զանոնք վերադարձնելու համար որեւէ բան ընելու»:

«Պէտք է երկու պետութիւններու լուծումին անցում ըլլայ, եւ այդ է Նեթանիահուի հետ իմ մեծագոյն տարակարծութիւնս», ըսաւ Սպիտակ տան ղեկավարը:

«Նեթանիահուի հետ մեծագոյն տարակարծութիւնս Կազայի մէջ պատերազմէն ետք տեղի պիտի ունենայ, իսկ Համաս գործարքի չգործադրուելուն պատասխանատուութիւնը կը կրէ, եւ կրնայ այդ հարցը վաղը իսկ աւարտել», ըսաւ ան:

Նշենք, որ Միացեալ Նահանգներու արտաքին գործոց նախարարութիւնը երկուշաբթի օր յայտարարած էր. «Մենք բացարձակ կերպով վստահ ենք, որ Իսրայէլ համաձայն է զինադադարի առաջարկին»:

Պայտըն նաեւ շեշտեց. «Մենք Միջազգային քրէական դատարանը չենք ճանչնար»:

Քաթարի արտաքին գործոց նախարարութեան բանբեր Մաժետ Անսարի յայտարարեց. «Ստանձնեցինք իսրայէլեան առաջարկ մը, որ կ՛արտացոլէ Պայտընի նշած սկզբունքները, եւ զայն մեր կարգին յանձնեցինք Համասին»:

«Փաստաթուղթը այժմ երկու կողմերուն աւելի մօտիկ դիրքորոշումներ կը բովանդակէ», ըսաւ ան` նշելով. «Մեր առաւելագոյն ջանքը կը թափենք համաձայնութեան հասնելու համար վերջին շտկրտումները կատարելու»:

Անսարի նախքան այդ յայտնեց, որ «մինչեւ հիմա իսրայէլեան եւ պաղեստինեան կողմերէն Պայտընի առաջարկին վերաբերեալ յստակ կեցուածքներ չկան»` նշելով. «Տեսակապով երէկ գումարուած հնգակողմ ժողովը յարձակումի դադրեցման եւ բռնագրաւողին հեռացման կարեւորութիւնը շեշտեց»:

Նշենք, որ Սէուտական Արաբիոյ, Յորդանանի, Արաբական Միացեալ Էմիրութիւններու, Քաթարի եւ Եգիպտոսի արտաքին գործոց նախարարները երկուշաբթի երեկոյեան տեսակապով ժողով մը գումարած էին` կոչ ուղղելով «լրջութեամբ ու դրական կերպով ընկալելու» Պայտընի առաջարկը: Վերջինս երկուշաբթի օր նաեւ հեռաձայնային հաղորդակցութեան մը ընթացքին Քաթարի իշխանը յորդորած էր Համասի վրայ ճնշում բանեցնելու, որպէսզի ընդունի Կազայի մէջ զինադադարի համաձայնութիւնը:

Ամերիկեան իշխանութիւնները յայտարարեցին, որ ՄԱԿ-ի Ապահովութեան խորհուրդին ներկայացուցած են բանաձեւ մը, որ կը զօրակցի Պայտընի առաջարկին: ՄԱԿ-ի մօտ Միացեալ Նահանգներու դեսպան Լինտա Թամըն Կրինֆիլտ յայտնեց. «Շարք մը ղեկավարներ եւ կառավարութիւններ, ներառեալ շրջանէն պատասխանատուներ, զօրակցեցան այս ծրագիրին»:

ԱՖՓ լրատու գործակալութիւնը կը հաղորդէ, որ նախագիծը կ՛ողջունէ 31 մայիսին յայտարարուած նոր համաձայնութիւնը եւ Համասին կոչ կ՛ուղղէ` «զայն ամբողջովին ընդունելու եւ անոր պայմանները առանց ուշացումի կամ նախապայմաններու գործադրելու»:

Աղբիւրը՝ Ազդակ