Միացեալ Նահանգներ Հայաստանի մէջ հետազօտութիւն կը կատարեն փոքր չափի հիւլէական կայան կառուցելու հարցին շուրջ
Ամերիկեան ընկերութիւն մը Հայաստանի Հանրապետութեան մէջ թեքնիք-տնտեսական հետազօտութիւն կը կատարէ փոքր չափի հիւլէական կայանի կառուցման նպատակայարմարութեան շուրջ: Այս մասին «Սփութնիք Արմենիա»-ի գրաւոր հարցումին ի պատասխան յայտնած է Հայաստանի Հանրապետութեան տարածքային կառավարման եւ ենթակառոյցներու նախարարութիւնը:
Նախարարութիւնը, սակայն, չի նշեր ամերիկեան ընկերութեան անունը:
«Ամերիկեան հեղինակաւոր ընկերութիւններէն մէկը Միացեալ Նահանգներու կառավարութեան պատուէրով հայկական կողմին հետ համատեղ կը կատարէ թեքնիք-տնտեսական հետազօտութիւն ամերիկացի արտադրողներու կողմէ առաջարկուող փոքր չափի ճարտարագիտութիւններու վերաբերեալ: Հետազօտութեան նպատակն է բացայայտել, թէ ո՛ր արտադրողին ճարտարագիտութիւնը աւելի յարմար է Հայաստանի կարիքներու բաւարարման համար, եւ թէ Հայաստանի պարագային ի՛նչ ճարտարագիտութիւն եւ ի՛նչ հզօրութիւն ունեցող կայանը առաւել արդիւնաւէտ եւ տնտեսապէս շահաւէտ կ՛ըլլայ», նշուած է նախարարութեան պատասխանին մէջ:
Կը նշուի նաեւ, որ հետազօտութիւնը կը նախատեսուի աւարտել ամէնէն ուշը 2025 թուականի գարնան:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
