Հարաւային արուարձաններուն վրայ դարձեալ օդային յարձակում

Իսրայէլեան օդուժը երէկ կէսօրէ ետք շուրջ ժամը 3:15-ին յարձակում գործեց Պէյրութի Հարաւային արուարձաններուն վրայ: Ասիկա 8 հոկտեմբեր 2023-էն ի վեր 6-րդ յարձակումն էր, իսկ մէկ շաբթուան ընթացքին 4-րդը:

Յարձակումի ենթարկուեցաւ Հատի Նասրալլա մայրուղիին մօտ գտնուող Ռուէյս խաչմերուկին վրայ գտնուող 10 յարկանի շէնք մը, որ մեծ վնասներ կրեց: Մեծ վնասներ կրեցին նաեւ մօտակայ շէնքերը:

Իսրայէլի պետական պատկերասփիւռի կայանը հաղորդեց, որ յարձակումը գործուած է «Էֆ-35» ռմբաձիգով, որ յարկաբաժինի մը վրայ 3 հրթիռներ արձակած է:

Յարձակումէն ժամեր առաջ իսրայէլեան անօդաչու թռչող սարքեր իրերայաջորդ թռիչքներ կատարած էին Հարաւային արուարձաններուն վերեւ:

Զինուորական աղբիւր մը իսրայէլեան բանակի ձայնասփիւռի կայանին յայտնեց, որ յարձակումը ղեկավարի մը դէմ մահափորձ է:

Իսրայէլեան բանակը հաղորդեց, որ յարձակումին թիրախը Հըզպալլայի անօդաչու թռչող սարքերու զօրամասի հրամանատարն է: «Սքայ Նիուզ» նշեց, որ անոր անունը Մոհամետ Հուսէյն Սրուր է:

Իսրայէլի բանակի ձայնասփիւռը նշեց. «Գնահատականները Հարաւային արուարձաններուն մէջ ահաբեկման գործողութեան յաջողութիւնը ցոյց կու տան»:

Լիբանանի առողջապահութեան նախարարութեան համաձայն, նախնական տուեալներով արձանագրուած են 2 զոհեր եւ 15 վիրաւորներ:

Նշենք, որ Իսրայէլ խոստացած էր հակադարձել մէկ օր առաջ Իսրայէլի մայրաքաղաք Թել Աւիւի արուարձանին մէջ Մոսատի կեդրոնատեղիին վրայ «Քատեր 1» հրթիռի արձակման:

Աղբիւրը՝ Ազդակ