Արամ Ա. Կաթողիկոսը Նուպար Աֆէեանը պարգեւատրեց «Կիլիկեան Իշխան» շքանշանով

Կիրակի, 13 Հոկտեմբերին Արամ Ա. կաթողիկոսը իր հայրապետական պատգամը ուղղեց Պոսթընի հայութեան, Ս. Ստեփանոս եկեղեցւոյ մէջ, յընթացս Ս. եւ անմահ պատարագին, որ մատուցուեցաւ Արեւելեան Ամերիկայի Հայոց թեմի առաջնորդ Գեղամ արք. Խաչերեանի ձեռամբ:

Պոսթընէն եւ շրջակայից արուարձաններէն հայորդիներ հոծ բազմութեամբ ներկայ էին՝ մասնակցելու սուրբ պատարագին, լսելու պատգամը վեհափառին եւ ստանալու անոր հայրական օրհնութիւնը:

Պատարագէն անմիջապէս ետք, Պոսթընի Ս. Ստեփանոս եկեղեցւոյ սրահին մէջ տեղի ունեցաւ ճաշկերոյթ մը՝ ի պատիւ Արամ Ա. կաթողիկոսին:

Ճաշկերոյթին ընթացքին, յանուն եկեղեցւոյ հոգաբարձութեան, խօսք առաւ եկեղեցւոյ հոգեւոր հովիւ Հրանդ Ծ. վրդ. Թահանեան: Նախ, ան իր որդիական երախտագիտութիւնը յայտնեց վեհափառին՝ հովուապետական օրհնաբեր այցելութեան համար, եւ Պոսթընի հայութեան թարգմանը հանդիսանալով՝ հայր սուրբը յայտնեց, թէ կաթողիկոսին այցելութիւնը հոգեւոր խանդավառութեան եւ վերանորոգութեան առիթ հանդիսացաւ շրջանին մէջ:

Ճաշկերոյթի ընթացքին եկեղեցւոյ կիրակնօրեայ վարժարանի աշակերտները հայ ասմունքով ու երգով ճոխացուած հակիրճ յայտագիր մը ներկայացուցին:

Ճաշկերոյթին աւարտին, վեհափառը իր հայրական յորդորը ուղղեց ներկաներուն: Ան իր խօսքին սկիզբը ընդհանուր գիծերով ներկայացուց ժամանակակից աշխարհը՝ զայն բնորոշելով արմատական ու յեղափոխական փոփոխութիւններով լեցուն աշխարհ մը, ընկերութեան բոլոր բնագաւառներուն մէջ: Ապա, կաթողիկոսը յիշեալ փոփոխութիւններուն մասին խօսեցաւ մանրամասնօրէն եւ յայտնեց անոնց անդրադարձը հայ կեանքին վրայ: Կաթողիկոսը շեշտեց Սփիւռքի վերակազմակերպումին հրամայականը՝ իր պատկերացումը ներկայացնելով չորս հիմնական կէտերու մէջ՝ ինքնութիւն, գաղութներու վերակազմակերպում, Հայաստան-Սփիւռք յարաբերութեանց ամրապնդում եւ երիտասարդներու մասնակցութիւն հայ կեանքին մէջ:

Ջերմ ծափողջոյններով ընդունուեցաւ կաթողիկոսին խօսքը, որ, ինչպէս միշտ, կատարուեցաւ անգլերէնով, նկատի ունենալով ամերիկածին երիտասարդներու ներկայութիւնը:

Ճաշկերոյթին աւարտին, Արամ Ա. կաթողիկոսը «Կիլիկեան Իշխան» շքանշանով պարգեւատրեց Նուպար Աֆէեանը: Վերջինս, խօսք առնելով՝ յիշեց իր անցեալը, Լիբանանը եւ Պոսթընի հայ կեանքին մէջ տարած աշխատանքը:

Յայտնենք, որ Աֆէեան զոյգը բարերար հանդիսացած է Ս. Ստեփանոս վարժարանին մէկ շէնքին եւ զանազան պատասխանատուութիւններ ստանձնած է գաղութին մէջ:

Ճաշկերոյթէն ետք, վեհափառը իր իջեւանած պանդոկին մէջ ընդունեց Նուպար Աֆէեանի այցելութիւնը: Երկար հանդիպումին ընթացքին քննարկուեցան Հայաստանին եւ Սփիւռքին վերաբերող շարք մը հարցեր:

Նուպար Աֆէեան կաթողիկոսին իր պատրաստակամութիւնը յայտնեց՝ նպաստելու Սփիւռքի վերակազմակերպման վերաբերող ծրագիրներուն՝ կրթական, մշակութային եւ այլ բնագաւառներու մէջ:

Աղբիւրը` Ասպարէզ