Հարաւային Լիբանանէն Հայֆայի եւ անոր ծոցին վրայ մեծագոյն յարձակումը

Իսրայէլեան բանակը յայտարարեց, որ հարաւային Լիբանանէն երկու հերթով 105 հրթիռներ արձակուած են հիւսիսային Իսրայէլի վրայ, մասնաւորաբար Հայֆա քաղաքին ու Գալիլիոյ բնակեցման վայրերուն վրայ:

Հրթիռարձակումը կատարուեցաւ Հըզպալլայի ընդհանուր քարտուղարի տեղակալ շէյխ Նայիմ Քասեմի պատկերասփռուած ուղերձէն վայրկեաններ ետք: Անիկա, ըստ իսրայէլեան բանակին, Հայֆա քաղաքը թիրախաւորած մեծագոյն հրթիռային յարձակումն էր:

Իսրայէլեան ներքին ճակատը յայտարարեց Աքքայի հարաւը գտնուող Քաֆար Մասրիք գիւղին, Քիրիաթ Մացուքինի եւ Հայֆայի ծոցին մէջ նիւթական վնասներու մասին: Իսրայէլեան «Ուայնեթ» կայքը նշեց, որ հրթիռարձակումը կատարուած է շրջանէ մը, ուր իսրայէլեան բանակը երկուշաբթի օր սկսած է ներթափանցել:

Հայֆայի քաղաքապետը իր կարգին հաղորդեց, որ քաղաքի ծոցի շրջանին մէջ գտնուող շէնք մը ուղղակի հարուած ստացած է, եւ պահանջած է Հայֆայի ծոցի շրջանին մէջ գտնուող քիմիական գործարան մը դատարկել, սակայն որեւէ պատասխան չէ ստացած:

Հըզպալլա յայտարարեց, որ հրթիռակոծած է Տիշոնի եւ Տելթոնի մէջ իսրայէլեան բանակի հրետանիի դիրքերը, ինչպէս նաեւ Թել Աւիւի արուարձանին մէջ գտնուող զինուորական տեղեկահաւաքի 8200-րդ միաւորի «Կելիլոթ» ռազմակայանը:

Հըզպալլա նաեւ յայտարարեց, որ հրթիռակոծած է Շլոմիի, Հանիթայի եւ Մարժ դիրքին վրայ իսրայէլեան ուժերու կուտակումները:

Միւս կողմէ, իսրայէլեան բանակը յայտարարեց, որ իր զինուորներէն մէկը հարաւային Լիբանանի մէջ բախումներու ընթացքին ծանրօրէն վիրաւորուած է, ինչպէս նաեւ ցամաքային գործողութեան յաւելեալ զինուորական խումբի մը միացումը յայտարարեց:

Բանակը աւելցուց, որ 146-րդ խումբը հարաւային Լիբանանի մէջ սկսած է Հըզպալլայի թիրախներուն եւ ենթակառոյցներուն դէմ որոշակի գործողութիւններ:

Իսրայէլեան աղբիւր մը «Սքայ Նիուզ»-ին յայտնեց. «Հսկայական ուժերով մուտք կը գործենք` Հըզպալլայի մեզ դիմակայելը դժուարացնելու համար»:

«Մեր նպատակը Հըզպալլայի յարձակումներ գործելու կարողութեան վերջ տալն է», նշեց աղբիւրը:

Իսրայէլեան բանակը երէկ պնդեց. «Կոլանի» զօրամասը իր վերահսկողութեան տակ առաւ Հարաւային Լիբանանի Մարուն Ռաս գիւղին մէջ Հըզպալլայի մարտական համալիր մը»:

Իսրայէլեան բանակը նաեւ յայտարարեց, որ երէկ Պէյրութի մէջ օդային յարձակում գործելով սպաննած է Հըզպալլայի սպայակոյտի համակարգի ղեկավար Սուհէյլ Հուսէյն Հուսէյնին:

«Մայատին» արբանեակային պատկերասփիւռի կայանը հաղորդեց, որ իսրայէլեան մասնայատուկ ուժ մը փորձած է Լապպունէի մէջ ներթափանցել լիբանանեան հողեր եւ տեղաւորուիլ ՖԻՆԻՒԼ-ի դիրքին ետին, սակայն Հըզպալլայի մարտիկները թակարդ մը լարելով արգելք հանդիսացած են: Մեծ գործողութիւնը իսրայէլեան մասնայատուկ ուժին շարքերուն մէջ մեծաթիւ զոհեր ու վիրաւորներ պատճառած է:

Ամերիկացի պաշտօնատարներ «Սի.Էն.Էն.»-ին յայտնեցին. «Ուաշինկթըն ներկայիս չի ջանար վերակենդանացնել Իսրայէլի եւ Հըզպալլայի միջեւ զինադադարի բանակցութիւնները»:

Ամերիկացի բարձրաստիճան պաշտօնատար մըն ալ նշեց. «Ներկայիս յստակ չէ, թէ Ուաշինկթըն զինադադարի հաստատման որեւէ բանակցութեան մէջ լիբանանեան որ կողմին հետ պիտի աշխատի»:

«Միացեալ Նահանգներու նախագահ Ճօ Պայտընի վարչակազմը կը վախնայ, որ Իսրայէլի (Հարաւային Լիբանանի մէջ) սահմանափակ գործողութիւն կատարելու խոստումը լայնածաւալ ու երկարատեւ տագնապի փոխուի», նշեցին ամերիկացի պաշտօնատարները:

«Սի.Էն.Էն.» կը հաղորդէ, որ անոնք նաեւ նշած են. «Ուաշինկթըն Իսրայէլը կը զգուշացնէ Իրանէն վրէժ լուծելու հարուած հասցնելու ճամբով չափազանցուած մագլցում կատարելէ: Այն, ինչ որ Իսրայէլ պատշաճ պատասխան կը նկատէ, կրնայ չհամապատասխանել աշխարհի եւ անոնց կողքին Ուաշինկթընի «սերտուած պատասխան» հասկացողութեան»:

Միւս կողմէ, ամերիկացի պաշտօնատարներ ամերիկեան «Աքսիոս» կայքին յայտնած են. «Նախագահ Ճօ Պայտընի վարչակազմը այլեւս չի վստահիր իր զինուորական ու դիւանագիտական ծրագիրներուն մասին Իսրայէլի կառավարութեան ըսածին»:

Ամերիկացի պաշտօնատար մը շեշտած է, որ «իսրայէլացիներուն նկատմամբ մեր վստահութիւնը ներկայիս շատ ցած է եւ արդար պատճառով»` նշելով. «Պայտընի վարչակազմը քանի մը անգամ անակնկալի եկաւ իսրայէլեան զինուորական կամ հետախուզական գործողութիւններէն: Երբեմն Ուաշինկթընի հետ խորհրդակցութիւն չկատարուեցաւ կամ գործողութեան գործադրութենէն քիչ ժամանակ առաջ տեղեակ պահուեցաւ»:

Ամերիկացի պաշտօնատարներ յայտնեցին. «Միացեալ Նահանգներու պաշտպանութեան նախարար Լոյտ Օսթին բարկացաւ, երբ անոր իսրայէլացի պաշտօնատարը գործողութենէն քանի մը վայրկեան առաջ զինք Հըզպալլայի ընդհանուր քարտուղար Հասան Նասրալլայի ահաբեկումին մասին յայտնեց»:

Աղբիւրը՝ Ազդակ