Իտալիոյ վարչապետը Պէյրութէն յայտարարեց. «ՖԻՆԻՒԼ-ի թիրախաւորումը անընդունելի է»
Իտալիոյ վարչապետ Ճորճիա Մելոնի երէկ կէսօրէ ետք հասաւ Պէյրութ, ուր հանդիպում ունեցաւ Լիբանանի վարչապետի պաշտօնակատար Նեժիպ Միքաթիի հետ:
Միքաթի վարչապետարանին մէջ հանդիպումէն ետք Մելոնիի հետ միացեալ մամլոյ ասուլիսի ընթացքին յայտնեց, որ Իտալիոյ վարչապետին այցելութիւնը Լիբանանի եւ անոր ժողովուրդին զօրակցութեան արտայայտութիւնն է, ինչպէս նաեւ ՖԻՆԻՒԼ-ի առաքելութեան իտալական աջակցութեան պատգամ:
«Քննարկեցինք հարաւի մէջ ընթացող պատերազմը եւ վերահաստատեցինք, որ դիւանագիտական լուծումը պէտք է պատերազմէն, բռնութենէն ու քանդումէն առաջնակարգ ըլլայ, եւ անիկա նախ եւ առաջ կ՛ենթադրէ Իսրայէլի կողմէ զինադադարի լիարժէք յարգում, կառչիլ միջազգային օրէնքին ու ՄԱԿ-ի Ապահովութեան խորհուրդի թիւ 1701 որոշումի ամբողջական կերպով գործադրութեան»:
Իտալիոյ վարչապետը իր արտասանած խօսքին մէջ նշեց, որ ՖԻՆԻՒԼ-ի թիրախաւորումը անընդունելի է, եւ պէտք է երաշխաւորել անոր անվտանգութիւնը:
Նշենք, որ Իտալիան ՖԻՆԻՒԼ-ին մաս կազմող երկիրներէն է:
«Բոլորս կ՛աշխատինք Կազայի եւ Լիբանանի մէջ զինադադարի համար», ըսաւ Մելոնի:
Իտալիոյ վարչապետը նաեւ նշեց. «Յանձնառու ենք Լիբանանի մէջ տեղահանուածներուն հարցը եւրոպական մակարդակի վրայ քննարկելու»:
Մելոնի ապա այցելեց Այն Թինէ, ուր հանդիպում ունեցաւ խորհրդարանի նախագահ Նեպիհ Պըրրիի հետ:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
