ՄԱԿ. «ՖԻՆԻՒԼ-ի ուժերը տակաւին իրենց դիրքերուն վրայ են, եւ Կութիերես կը յայտնէ, թէ զանոնք թիրախաւորելը կրնայ պատերազմական ոճիր ըլլալ»
ՄԱԿ-ի ընդհանուր քարտուղար Անթոնիօ Կութիերեսի բանբեր Սթեֆան Տիւժարիք յայտնեց. «Հարաւային Լիբանանի մէջ շարունակուող թշնամական արարքներու լոյսին տակ, եւ հակառակ անցնող քանի օրուան ընթացքին ՄԱԿ-ի դիրքերը հարուածած ու խաղաղապահ շարք մը զինուորներ վիրաւորած յարձակումներուն, ՖԻՆԻՒԼ-ի խաղաղապահները տակաւին բոլոր դիրքերուն վրայ են, եւ ՄԱԿ-ի դրօշը տակաւին կը ծածանի, եւ ընդհանուր քարտուղարը կ՛ողջունէ ՖԻՆԻՒԼ-ի նուիրեալ պաշտօնեաները»:
«Պէտք է երաշխաւորել ՄԱԿ-ի պաշտօնեաներու եւ կալուածներու ապահովութիւնն ու անվտանգութիւնը, եւ պէտք է առանց բացառութեան ամէն ժամանակ յարգել ՄԱԿ-ի շէնքերու անձեռնմխելիութիւնը: Այսօր տեղի ունեցած շատ մտահոգիչ դէպքի մը ընթացքին ՄԱԿ-ի դիրքի մուտքի դուռը դիտաւորեալ կերպով շրջանցուեցաւ իսրայէլեան բանակին պատկանող զրահապատ մեքենաներու կողմէ», նշեց Կութիերեսի բանբերը:
«ՖԻՆԻՒԼ-ը շարունակաբար կը գնահատէ բոլոր ազդակները` ճշդելու համար իր կացութիւնն ու ներկայութիւնը, եւ առաքելութիւնը բոլոր կարելի քայլերը կ՛որդեգրէ երաշխաւորելու համար իրեն պատկանող խաղաղապահ ուժերու անվտանգութիւնը: ՖԻՆԻՒԼ-ի դերակատարութիւնն ու հարաւային Լիբանանի մէջ ներկայութիւնը լիազօրուած է ՄԱԿ-ի Ապահովութեան խորհուրդի կողմէ: Այս առումով, ՖԻՆԻՒԼ-ը յանձնառու կը մնայ պահպանելու թիւ 1701 որոշումին հիմամբ դիւանագիտական լուծումին աջակցելու իր կարողութիւնը, ինչ որ յառաջ ընթանալու միակ ուղին է», աւելցուց ան:
Ըստ հաղորդագրութեան, Կութիերես դարձեալ նշած է, որ «երբեք պէտք չէ թիրախաւորել Լիբանանի մէջ ՄԱԿ-ի ժամանակաւոր ուժն ու անոր շէնքերը: Խաղաղապահ ուժերուն վրայ յարձակումը խախտում է միջազգային օրէնքին, ներառեալ միջազգային մարդասիրական օրէնքին, եւ կրնայ պատերազմական ոճիր ըլլալ»:
ՄԱԿ-ի ընդհանուր քարտուղարը բոլոր կողմերուն, ներառեալ իսրայէլեան բանակին կոչ ուղղած է «ետ կանգնելու որեւէ եւ բոլոր արարքներէն, որոնք մեզի պատկանող խաղաղապահ ուժերը վտանգի կ՛ենթարկեն»:
Ան վերստին կոչ ուղղած է` «դադրեցնելու թշնամական արարքները եւ ամբողջապէս գործադրելու ՄԱԿ-ի Ապահովութեան խորհուրդի թիւ 1701 որոշումը»:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
