Կառավարութիւնը ընդունեց Հայաստանի հանրապետութեան քայլերգը խմբագրելու ազգային ժողովի իշխող խմբակցութեան նախաձեռնութիւնը

Կառավարութիւնը երէկ ընդունեց Հայաստանի պետական քայլերգը խմբագրելու Ազգային ժողովի նախագահի եւ «Քաղաքացիական պայմանագիր» խմբակցութեան պատգամաւորներու նախաձեռնութիւնը:

Անոնք առաջարկած էին «կարգաւորել Հայաստանի Հանրապետութեան քայլերգի, ինչպէս նաեւ քայլերգի կատարման հետ կապուած որոշ յարաբերութիւններ»:

Կը նախատեսուի քայլերգի երկրորդ եւ չորրորդ քառատողերը տեղափոխել ու զայն եզրափակել այս նախադասութեամբ` «Նայիր նրան երեք գոյնով, նուիրական մէկ նշան, թող փողփողի թշնամու դէմ, թող միշտ պանծայ Հայաստան»:

«Քայլերգի ուժականութիւն ստեղծելու նպատակով կը նախատեսուի փոփոխութիւն կատարել քայլերգի բնագիրին մէջ` զայն վերադասաւորելով պետական քաղաքականութեան տրամաբանութեամբ` արժեւորելով պետութիւնը, ազատութեան փիլիսոփայութիւնը, Հայաստանի դրօշն ու պետականութիւնը, ինչպէս նաեւ քաղաքացին` փոխելով յաջորդականութիւնը», ըսաւ Հայաստանի Հանրապետութեան մշակոյթի, մարմնակրթութեան եւ երիտասարդութեան հարցերու փոխնախարար Դանիէլ Դանիէլեան:

Աղբիւրը՝ Ազդակ