Ազրպէյճան կը սպառնայ «Համապատասխան դիւանագիտական քայլեր կիրարկել»` ի պատասխան Լեհաստանի նախագահի Հայաստան-Ազրպէյճան սահման այցելութեան

«Լեհաստանի նախագահ Անճէյ Տուտայի Հայաստանի մէջ Եւրոպական Միութեան առաքելութեան անդամներու ուղեկցութեամբ Հայաստան-Ազրպէյճան սահման այցելութիւնը, ցաւօք, Եւրոպական Միութեան անդամ տարբեր երկիրներու եւ եւրոպական կառոյցներու «հակաազրպէյճանական քաղաքականութեան» հերթական ցուցադրութիւն է», այս մասին յայտնած է Ազրպէյճանի արտաքին գործոց նախարարութիւնը`  մեկնաբանելով Տուտայի սահման այցելութիւնը:

«Խորապէս կը ցաւինք, որ պաշտօնապէս Ազրպէյճանի «ռազմավարական գործընկեր» երկրի նախագահը մասնակցած է անընդունելի դիւանագիտական «հեռադիտակային շոուին», որ կը յանգեցնէ Ազրպէյճանի եւ Լեհաստանի միջեւ յարաբերութիւններու սրման: Հակառակ Ազրպէյճանի պաշտօնատարներու բազմաթիւ դիմումներուն` ուղղուած Լեհաստանի նախագահի աշխատակազմին եւ արտաքին գործոց նախարարութեան, լեհական կողմը զերծ չէ մնացած այս սադրիչ քայլէն: Ազրպէյճան ինքն իրեն իրաւունք կը վերապահէ այս ոչ բարեկամական գործողութեան դէմ համապատասխան դիւանագիտական քայլեր ձեռնարկելու», կը նշուի Ազրպէյճանի արտաքին գործոց նախարարութեան հրապարակած յայտարարութեան մէջ:

Նշենք, որ Լեհաստանի նախագահը Երասխի մէջ հանդիպած է Հայաստանի Հանրապետութեան մէջ տեղակայուած Եւրոպական Միութեան դիտորդական առաքելութեան անձնակազմի հետ:

Նախքան այդ, հաղորդուած էր, որ Լեհաստանի նախագահը 25-27 նոյեմբերին Հայաստան կատարած այցելութեան ծիրին մէջ պիտի այցելէ Երասխ համայնք` մասնակցելու Հայաստանի մէջ Եւրոպական Միութեան դիտորդական առաքելութեան հետ միացեալ պարեկութեան:

Հայաստանի Հանրապետութեան մէջ Եւրոպական Միութեան առաքելութեան ղեկավարն է Մարքուս Ռիթերը, իսկ անոր տեղակալը լեհ Մարեք Քուպերսքին է:

Առաքելութիւնը ստեղծուած է փետրուար 2023-ին` երկու տարուան ժամկէտով, եւ անոր նպատակները կը ներառեն վերահսկել կացութիւնը եւ պարեկութիւն կատարել Հայաստանի եւ Ազրպէյճանի սահմանին վրայ:

Աղբիւրը՝ Ազդակ