Եւրոպական խորհրդարանի պատգամաւորներուն յայտարարութիւնը` Պաքուի մէջ կայանալիք ՔՈՓ29-ին ընդառաջ
«2024 թուականի նոյեմբերին Ազրպէյճանի մէջ կայանալիք ՔՈՓ 29 վեհաժողովին ընդառաջ մենք կ՛ուզենք ընդգծել, որ, բացի կլիմայի վերաբերեալ ազդեցիկ եւ նշանակալից համաժողով ըլլալէ, անիկա նաեւ իր մէջ կը ներառէ հաւատարմութիւն` արդարութեան եւ մարդկային արժանապատուութեան սկզբունքներուն: Ուստի ընդունող երկրի, այս պարագային Ազրպէյճանի համար պէտք է առաջնահերթ ըլլայ հաւատարմութիւնը այս սկզբունքներուն:
«Համաձայն Եւրոպական խորհրդարանին կողմէ 2021-ի մայիսէն ընդունուած համապատասխան բանաձեւերու եւ զեկուցումներու` մենք կոչ կ՛ուղղենք Ազրպէյճանի կառավարութեան`
«- Անյապաղ եւ անվերապահօրէն ազատ արձակելու Պաքուի մէջ պահուող բոլոր հայ ռազմագերիները, պատանդներն ու գերիները, որոնց մէջ` Լեռնային Ղարաբաղի ռազմաքաղաքական ղեկավարութիւնը:
«- Ապահովելու, որ Լեռնային Ղարաբաղի մէջ հայկական մշակութային եւ կրօնական ժառանգութիւնը, ներառեալ վանքերը, խաչքարերը, մնան անձեռնմխելի եւ զերծ «ալպանացումէն», ինչպէս նաեւ պատմութեան վերախմբագրումէն:
«- Ձեռնպահ մնալու Հայաստանի Հանրապետութեան դէմ սպառնալիքներէն եւ որեւէ յարձակումէ, դուրս բերելու ազրպէյճանական զինուժը Հայաստանի Հանրապետութեան բռնագրաւուած տարածքներէն:
«Աւելի՛ն, մենք` Եւրոպական խորհուրդին, յանձնաժողովին, Եւրոպական Միութեան արտաքին յարաբերութիւններու եւ ապահովութեան քաղաքականութեան հարցերով բարձր ներկայացուցիչին կոչ կ՛ուղղենք` հաշուի առնելու Եւրոպական խորհրդարանին կողմէ ընդունուած վերոյիշեալ բանաձեւերը եւ գործելու անոնց ոգիին համապատասխան»:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
