Հայաստանի Նախագահը ՄԱԿի Մարդու Իրաւունքներու յանձնակատարին եւ Կարմիր Խաչի ներկայացուցիչին հետ քննարկեց Արցախի վերաբերող հարցեր
Հայաստանի Հանրապետութեան նախագահ Վահագն Խաչատուրեան Զուիցերիա կատարած աշխատանքային այցելութեան ընթացքին հանդիպում ունեցաւ ՄԱԿի Մարդու իրաւունքներու բարձր յանձնակատար Վոլթըր Թիւրքի հետ: Զրոյցին ընթացքին, անդրադառնալով աշխարհի զանազան տարածաշրջաններու մէջ ընթացող զինուած հակամարտութիւններուն՝ զրուցակիցները կարեւոր նկատեցին բազմակողմանիութեան ամրապնդումը` մարդու իրաւունքներու պաշտպանման ուղղութեամբ:
Քննարկումի առանցք հանդիսացան նաեւ Արցախէն բռնի տեղահանուած անձերու կարիքներու հասցէագրման ուղղութեամբ Հայաստանի կողմէ իրականացուող ծրագիրները:
Կողմերը ընդգծեցին մարդու իրաւունքներու պաշտպանման եւ մարդասիրական հարցերու յաղթահարման ուղղութեամբ միջազգային բարձր հեղինակութիւն ունեցող կազմակերպութիւններու եւ երկիրներու քաղաքական իշխանութիւններուն կողմէ ջանքերու մէկտեղման անհրաժեշտութիւնը:
Խաչատուրեան հանդիպում ունեցաւ նաեւ Կարմիր Խաչի միջազգային կոմիտէի նախագահ Միրիանա Սփոլեարիչ Էկերի հետ. անոնք քննարկեցին անհետ կորսուածներու, գերիներու եւ այլ պահուող անձերու եւ մարդասիրական բնոյթի այլ հարցեր:
Խաչատուրեան կարեւոր նկատեց Կարմիր Խաչի միջազգային կոմիտէին հետ սերտ համագործակցութիւնը` ընդգծելով անոր դերը մարդասիրական ճգնաժամերու յաղթահարման եւ միջազգային մարդասիրական իրաւունքներու պաշտպանման մէջ:
Աղբիւրը` Ասպարէզ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
