Մատենադարանին 74 հազար տոլար յատկացուեցաւ` Արցախի մէջ գրչագրուած ձեռագիր մատեանները վերականգնելու եւ հանրային դարձնելու համար

Մատենադարանին մէջ տեղի ունեցաւ «Լեռնային Ղարաբաղի մէջ գրչագրուած ժառանգութեան վերականգնմանն ու հանրայնացման» վերաբերող ծրագիրի շնորհահանդէսը՝ Ամերիկայի Միացեալ Նահանգներու դեսպանին մշակութային արժէքներու պահպանման հիմնադրամին աջակցութեամբ, որ Մատենադարանին 74 հազար տոլար յատկացուցած է` Արցախի մէջ գրչագրուած ձեռագիր մատեաններու եւ անոր հնագոյն պատմութեան վերաբերող բացառիկ վաւերագիրները վերականգնելու եւ հանրային դարձնելու համար:

Ծրագիրին ծիրին մէջ ընտրուած են Գանձասարի, Դադիվանքի, Գնդեվանքի, Խադաւանքի, Գտչավանքի եւ հայկական այլ միջնադարեան վանքերու մէջ 13րդ-18րդ դարերուն գրուած եւ նկարազարդուած այնպիսի ձեռագիրներ, եզակի արխիւային վաւերագիրներ, որոնք լոյս կը սփռեն հայկական հարուստ մշակութային ժառանգութեան եւ պատմական անցքերու վրայ:

Իր ելոյթին ընթացքին, Մատենադարանի տնօրէն Արա Խզմալեան շնորհակալութիւն յայտնեց Միացեալ Նահանգներու դեսպանին՝ այս շատ կարեւոր ծրագիրի իրականացման աջակցելուն համար։

Ան հաստատեց, որ ծագումով հայկական այս ժառանգութիւնը, այդուհանդերձ, համաշխարհային մշակոյթի փաստ է եւ համաքրիստոնէական նշանակութիւն ունեցող արժէք, ինչ որ կը նշանակէ` համաքրիստոնէական պատասխանատուութեան առարկայ:

Խօսք առին նաեւ Հայաստանի կրթութեան, գիտութեան, մշակոյթի, մարմնակրթութեան նախարար Ժաննա Անդրէասեան, Հայաստանի մօտ Միացեալ Նահանգներու արտակարգ եւ լիազօր դեսպան Քրիսթինա Քվիըն:

Քվիըն ընդգծեց, որ ինք հիացած է Մատենադարանին կողմէ իրականացուող հսկայական աշխատանքով եւ միշտ սիրով կ՛այցելէ հոն: «Ինծի համար այսօր յատուկ կարեւորութիւն ունի այստեղ ներկայ գտնուիլ եւ ազդարարել այս ծրագրին մեկնարկը, որուն տակ աշխատանքներ պիտի կատարուին Լեռնային Ղարաբաղի ձեռագիր մատեաններու պահպանման ուղղութեամբ: Մշակութային ժառանգութիւնը եւ արժէքները, որոնք կան Լեռնային Ղարաբաղի մէջ, պէտք է միանշանակ պահպանուին», ըսաւ Քվիըն։  

Ծրագրի իրականացման վերաբերեալ զեկուցումներ ներկայացուցին Մատենադարանի զարգացման խումբի միջազգային կապերու պատասխանատու Սոնա Բալոյեան եւ Միջնադարեան արուեստի բաժնի աւագ գիտաշխատող Լուսինէ Սարգսեան:

Ձեռնարկին ընթացքին Գուրգէն Դաբաղեանի կատարումով հնչեց «Ղարաբաղի Հորովելը» եւ ելոյթ ունեցան «Մեկնարկ» տաղանդի զարգացման նպատակային ծրագիրի պատանիները:

Աղբիւրը` Ասպարէզ