Ֆրանսայի խորհրդարանը 1962-էն է վեր առաջին անգամ ըլլալով անվստահութիւն յայտնեց կառավարութեան

Ֆրանսայի խորհրդարանը չորեքշաբթի գիշեր անվստահութիւն յայտնեց կառավարութեան, ինչ որ կը նշանակէ, որ կառավարութիւնը պէտք է հրաժարի: Այս զարգացումներու լոյսին տակ կը նախատեսուէր, որ Ֆրանսայի նախագահ Էմանուել Մաքրոն ժողովուրդին պատկերասփռուած ուղերձ մը յղէ:

Ֆրանսայի Ազգային ժողովը 4 դեկտեմբերին վարչապետ Միշել Պառնիէի կառավարութեան անվստահութիւն յայտնելու բանաձեւ որդեգրեց: Անվստահութեան թեր քուէարկեց 331 երեսփոխան: Ազգային ժողովի նախագահ Եաէլ Պրոն Փիվէ յայտարարեց, որ Ֆրանսայի սահմանադրութեան համաձայն, Պառնիէն պէտք է հանրապետութեան նախագահին հրաժարականի դիմում ներկայացնէ:

1962-էն ի վեր առաջին անգամն է, որ խորհրդարանը Ֆրանսայի կառավարութեան անվստահութիւն կը յայտնէ: Միշել Պառնիէի նախարարաց խորհուրդը ընդամէնը 90 օր գոյատեւած է եւ դարձած Հինգերորդ Հանրապետութեան պատմութեան մէջ ամէնէն կարճատեւը:

Երէկ երեկոյեան Ֆրանսայի նախագահ Էմանուել Մաքրոն ընդունեց վարչապետ Պարնիէի հրաժարականը:

Աղբիւրը՝ Ազդակ