ಪೋಪ್ ಫ್ರಾನ್ಸಿಸ್ ಭೇಟಿ: ನೃತ್ಯ ಪ್ರದರ್ಶಿಸಲಿರುವ ಪಪುವಾ ನ್ಯೂಗಿನಿ ಮಕ್ಕಳು
ವರದಿ: ಲಿಕಾಸ್ ನ್ಯೂಸ್
ಮುಂಬರುವ ಸೆಪ್ಟೆಂಬರ್ ತಿಂಗಳಲ್ಲಿ ಪೋಪ್ ಫ್ರಾನ್ಸಿಸ್ ಅವರು ಏಷ್ಯಾ ಖಂಡದ ಹಲವು ದೇಶಗಳಿಗೆ ಪ್ರೇಷಿತ ಭೇಟಿಯನ್ನು ನೀಡಲಿದ್ದಾರೆ. ಪಪುವಾ ನ್ಯೂಗಿನಿ ಪೋಪ್ ಫ್ರಾನ್ಸಿಸ್ ಅವರು ಭೇಟಿ ನೀಡುತ್ತಿರುವ ದೇಶಗಳಲ್ಲಿ ಒಂದಾಗಿದೆ. ಈ ಹಿನ್ನೆಲೆಯಲ್ಲಿ ಅಲ್ಲಿನ ಕ್ವೀನ್ ಆಫ್ ಪ್ಯಾರಡೈಸ್ ಪ್ರಾಜೆಕ್ಟ್ ಮಕ್ಕಳು ಅವರಿಗಾಗಿ ಐದು ನಿಮಿಷದ ವಿಶೇಷ ನೃತ್ಯ ಪ್ರದರ್ಶನವನ್ನು ನೀಡಲಿದ್ದಾರೆ ಎಂದು ವರದಿಯಾಗಿದೆ.
ಸುಮಾರು ಎಪ್ಪತ್ತು ಮಕ್ಕಳು ಕಾರ್ಯಕ್ರಮವನ್ನು ನೀಡಲಿದ್ದಾರೆ ಎಂದು ವರದಿಯಾಗಿದೆ. ಸ್ಥಳೀಯ ಪತ್ರಿಕೆ "ದಿ ನ್ಯಾಷನಲ್" ಗೆ ನೀಡಿದ ಸಂದರ್ಶನದಲ್ಲಿ ಇಲ್ಲಿನ ಗುರುಗಳೊಬ್ಬರು ಈ ಮಕ್ಕಳ ಕುರಿತು ಮಾತನಾಡುತ್ತಾ "ಪೋಪ್ ಫ್ರಾನ್ಸಿಸ್ ಅವರು ನಮ್ಮ ಕಾರ್ಯಕ್ರಮವನ್ನು ನೋಡಲಿದ್ದಾರೆ ಎಂದು ತಿಳಿದು ಎಲ್ಲಾ ಮಕ್ಕಳು ಉತ್ಸುಕರಾಗಿದ್ದಾರೆ" ಎಂದು ಹೇಳಿದ್ದಾರೆ.
ಪೋಪ್ ಫ್ರಾನ್ಸಿಸ್ ಅವರು ಪಪುವಾ ನ್ಯೂಗಿನಿ ದೇಶದ ವನೀಮೋ ಎಂಬಲ್ಲಿಗೆ ಭೇಟಿ ನೀಡುತ್ತಿದ್ದು, ಅವರನ್ನು ವನೀಮೋ ನಗರಕ್ಕೆ ಸ್ವಾಗತಿಸಲು ಮಕ್ಕಳು ಕಾತುರರಾಗಿದ್ದಾರೆ ಎಂದು ಫಾದರ್ ಮಿಗುಯೇಲ್ ಅವರು ಹೇಳಿದ್ದಾರೆ.
ಪೋರ್ಟ್ ಮೋರ್ಸ್ಬಿ ಮಹಾಧರ್ಮಕ್ಷೇತ್ರದ ಮಹಾಧರ್ಮಾಧ್ಯಕ್ಷರಾಗಿರುವ ಕಾರ್ಡಿನಲ್ ಜಾನ್ ರಿಬಾತ್ ಅವರು ಪಪುವಾ ನ್ಯೂಗಿನಿ ದೇಶಕ್ಕೆ ಪೋಪ್ ಫ್ರಾನ್ಸಿಸ್ ಅವರು ಭೇಟಿ ನೀಡುತ್ತಿರುವುದನ್ನು "ಅವರ ಭೇಟಿ ನಮಗೆ ವರದಾನ" ಎಂದು ಹೇಳಿದ್ದಾರೆ.
