ಹಿಮಭರಿತ ಮಾತೆಯ ಮಹೋತ್ಸವದಂದು ಪೋಪ್ ಫ್ರಾನ್ಸಿಸ್ ಸೈಂಟ್ ಮೇರಿ ಮೇಜರ್ ದೇವ

ವರದಿ:ಡೆಬೋರಾ ಕ್ಯಾಸ್ಟಲೀನೋ ಲುಬೋವ್, ಅಜಯ್ ಕುಮಾರ್

ಆಗಸ್ಟ್  ಐದರಂದು ಸೈಂಟ್ ಮೇರಿ ಮೇಜರ್  ದೇವಾಲಯದಲ್ಲಿ  ಹಿಮಭರಿತ ಮಾತೆಯ ಮಹೋತ್ಸವ ಹಾಗೂ  ಆ ದೇವಾಲಯದ ವಾರ್ಷಿಕೋತ್ಸವವನ್ನು ಆಚರಿಸುತ್ತಿರುವ ಹಿನ್ನಲೆಯಲ್ಲಿ ವಿಶ್ವಗುರು ಫ್ರಾನ್ಸಿಸ್ ಇದರಲ್ಲಿ ಭಾಗಿಯಾಗಿ ಅಲ್ಲಿ ತಮ್ಮ ಸಂಜೆ ಪ್ರಾರ್ಥನೆಯನ್ನು ಸಲ್ಲಿಸಲಿದ್ದಾರೆ. ರೋಮ್ ನಗರದ  ಹಲವು ಕ್ರೈಸ್ತ ದೇವಾಲಯಗಳಲ್ಲಿ ವಿಶ್ವಗುರು ಫ್ರಾನ್ಸಿಸ್ ಅವರ  ಹೃದಯಕ್ಕೆ ಹತ್ತಿರವಾಗಿರುವ ದೇವಾಲಯಗಳಲ್ಲಿ ಇದು ಸಹ ಒಂದಾಗಿದೆ.

ವ್ಯಾಟಿಕನ್ ಮಾಧ್ಯಮ ಕಚೇರಿಯ ವರದಿಗಳ ಪ್ರಕಾರ ಈ ದಿನದಂದು ವಿಶ್ವಗುರು ಫ್ರಾನ್ಸಿಸ್ ಅವರು ಸಂಜೆ 5:30ಕ್ಕೆ ಈ ದೇವಾಲಯದಲ್ಲಿ ತಮ್ಮ ಪ್ರಾರ್ಥನೆಯನ್ನು ಸಲ್ಲಿಸಲಿದ್ದು, ಇದೇ ಸಂದರ್ಭದಲ್ಲಿ ಈ ದೇವಾಲಯದ ಪ್ರಧಾನ ಗುರುಗಳಾಗಿರುವ ಆರ್ಚ್'ಬಿಷಪ್ ರೊಲಾಂಡಾಸ್ ಮಾಕ್ರಿಕಾಸ್ ಅವರು ಉಪಸ್ಥಿತರಿರಲಿದ್ದಾರೆ. 

ಈ ಮಹಾ ದೇವಾಲಯವು ವಿಶ್ವಗುರು ಫ್ರಾನ್ಸಿಸ್ ಅವರ ಹೃದಯಕ್ಕೆ ಹತ್ತಿರವಾಗಿದೆ ಏಕೆಂದರೆ ಅವರು ಅನೇಕ ಬಾರಿ ಇಲ್ಲಿಗೆ ತಪ್ಪದೆ ಭೇಟಿ ನೀಡಿ ಪ್ರಾರ್ಥಿಸುತ್ತಾರೆ. ಅವರು ಪ್ರತಿ ಬಾರಿ ವಿವಿಧ ದೇಶಗಳಿಗೆ ತಮ್ಮ ಪ್ರೇಷಿತ ಭೇಟಿಯನ್ನು ಕೈಗೊಂಡ ನಂತರ ಇಲ್ಲಿಗೆ ಬಂದು ದೇವಮಾತೆಗೆ ಕೃತಜ್ಞತೆಯನ್ನು ಸಲ್ಲಿಸುತ್ತಾರೆ.