ಧಾರ್ಮಿಕ ವ್ಯಕ್ತಿಗಳಿಗೆ ಪೋಪ್: ಧೈರ್ಯ ಮತ್ತು ಭರವಸೆಯ ಸಾಕ್ಷಿಗಳಾಗಿರಿ
ವರದಿ: ಕ್ರಿಸ್ಟೊಫರ್ ವೆಲ್ಸ್, ಅಜಯ್ ಕುಮಾರ್
ಪಪುವಾ ನ್ಯೂಗಿನಿ ದೇಶಕ್ಕೆ ತಮ್ಮ ಪ್ರೇಷಿತ ಭೇಟಿಯ ಭಾಗವಾಗಿ ಪೋಪ್ ಫ್ರಾನ್ಸಿಸ್ ಅವರು ಈ ದೇಶದ ರಾಜಧಾನಿ ಪೋರ್ಟ್ ಮೋರ್ಸ್ಬಿಯಲ್ಲಿರುವ ಕ್ರೈಸ್ತರ ಸಹಾಯ ಮಾತೆ ಪ್ರಧಾನಾಲಯದಲ್ಲಿ ಪಪುವಾ ನ್ಯೂಗಿನಿ ಹಾಗೂ ಸೊಲೋಮೊನ್ ದ್ವೀಪಗಳ ಧರ್ಮಾಧ್ಯಕ್ಷರು, ಗುರುಗಳು, ಧಾರ್ಮಿಕ ಸಹೋದರ-ಸಹೋದರಿಯರನ್ನು ಭೇಟಿ ಮಾಡಿ, ಅವರೊಂದಿಗೆ ಸಮಾಲೋಚನೆಯನ್ನು ನಡೆಸಿದ್ದಾರೆ.
ಈ ವೇಳೆ ಅವರು ಸಂತ ಜಾನ್ ಬೋಸ್ಕೋ ಅವರ ಉದಾಹರಣೆಯನ್ನು ಅವರಿಗೆ ಹೇಳಿದರು. ಅದೇನೆಂದರೆ ಮಾತೆ ಮರಿಯಮ್ಮನವರು ಸಂತ ಜಾನ್ ಬೋಸ್ಕೋ ಅವರಿಗೆ ದರ್ಶನವಿತ್ತು ಆ ಪ್ರದೇಶದಲ್ಲಿ ದೇವಾಲಯವನ್ನು ಕಟ್ಟಲು ಹೇಳಿದರು. ಒಂದು ವೇಳೆ ದೇವಾಲಯವನ್ನು ಕಟ್ಟುವ ಧೈರ್ಯವನ್ನು ಜಾನ್ ಬೋಸ್ಕೋ ತೋರಿಸಿದರೆ, ಅಲ್ಲಿ ಅನೇಕ ವರದಾನಗಳು ಜನರಿಗೆ ಲಭಿಸುತ್ತವೆ ಎಂದು ಹೇಳಿದ್ದರು ಎಂಬುದನ್ನು ಪೋಪ್ ಫ್ರಾನ್ಸಿಸ್ ನೆರೆದಿದ್ದ ಧರ್ಮಸಭೆಯ ಸೇವಾಕರ್ತರಿಗೆ ತಿಳಿಸಿದರು.
ಮುಂದುವರೆದು ಮಾತನಾಡಿದ ಅವರು "ಈ ನಿದರ್ಶನ ನಮಗೆ ಒಳ್ಳೆಯ ಮಾದರಿ ಹಾಗೂ ಸ್ಪೂರ್ತಿಯಾಗಬಹುದು" ಎಂದು ಹೇಳಿದರು.
ಈ ಪ್ರದೇಶದಲ್ಲಿ ಶುಭಸಂದೇಶ ಸೇವಾಕರ್ತರ ಬದ್ಧತೆಯನ್ನು ಶ್ಲಾಘಿಸಿದ ಅವರು ಇಲ್ಲಿಗೆ ಆಗಮಿಸಿ, ಕ್ರೈಸ್ತ ವಿಶ್ವಾಸವನ್ನು ಪಸರಿಸಿದ ಎಲ್ಲಾ ಗುರು ಹಾಗೂ ಕನ್ಯಾಸ್ತ್ರೀಯರನ್ನು ಸ್ಮರಿಸಿಕೊಂಡರು.
