ಪೋಪ್ ಫ್ರಾನ್ಸಿಸ್ ಭೇಟಿ: ಪುಳಕಿತರಾದ ಅರ್ಜೆಂಟೀನಾ ಮೂಲದ ಶುಭಸಂದೇಶ ಪ್ರಸಾರಕರು

ವರದಿ: ಲೀಸಾ ಝೆಂಗಾರಿನಿ, ಅಜಯ್ ಕುಮಾರ್

ಪೋಪ್ ಫ್ರಾನ್ಸಿಸ್ ಅವರು ವನೀಮೋ ಧರ್ಮಕ್ಷೇತ್ರಕ್ಕೆ ಭೇಟಿಯನ್ನು ನೀಡಿ ವಾಪಾಸ್ಸಾಗಿದ್ದಾರೆ. ಪಪುವಾ ನ್ಯೂಗಿನಿಯ ಈ ವನೀಮೋ ನಗರವು ರಾಜಧಾನಿಯಿಂದ ಬಹಳ ದೂರವಿದ್ದು, ದುರ್ಗಮ ನಗರವೆಂದೇ ಹೆಸರುವಾಸಿಯಾಗಿದೆ. ಇಲ್ಲಿಗೆ ಭೇಟಿ ನೀಡಿದ ಪೋಪ್ ಫ್ರಾನ್ಸಿಸ್ ಅವರು ಇಲ್ಲಿ ಸೇವೆ ಸಲ್ಲಿಸುತ್ತಿರುವ ಅರ್ಜೆಂಟೀನಾ ಮೂಲದ ಶುಭಸಂದೇಶ ಪ್ರಸಾರಕ ಗುರುಗಳು ಹಾಗೂ ಕನ್ಯಾಸ್ತ್ರೀಯರನ್ನು ಭೇಟಿ ಮಾಡಿದ್ದಾರೆ. ಪೋಪ್ ಫ್ರಾನ್ಸಿಸ್ ಅವರ ಭೇಟಿಯಿಂದ ಅವರು ಪುಳಕಿತರಾಗಿದ್ದಾರೆ.

ಪೋಪ್ ಫ್ರಾನ್ಸಿಸ್ ಅವರ ಭೇಟಿಯ ಕುರಿತು ಮಾತನಾಡಿದ ಪೋಪ್ ಫ್ರಾನ್ಸಿಸ್ ಅವರ ಹಳೆ ಸ್ನೇಹಿತ ಫಾದರ್ ಮಾರ್ಟಿನ್ ಪ್ರಾದೋ ಅವರು "ಪೋಪ್ ಫ್ರಾನ್ಸಿಸ್ ಇಲ್ಲಿಗೆ ಬಂದಿದ್ದಾರೆ. ನಮ್ಮ ಜೊತೆ ಸಮಯ ಕಳೆದಿದ್ದಾರೆ ಎಂದರೆ ನಂಬಲಾಗುತ್ತಿಲ್ಲ. ಇಲ್ಲಿನ ಗುರುಗಳು ಹಾಗೂ ಧಾರ್ಮಿಕ ಭಗಿನಿಯರಿಗೆ ಈ ಭೇಟಿ ಅತ್ಯಂತ ಸಂತೋಷದಾಯಕವಾಗಿದೆ ಮಾತ್ರವಲ್ಲದೆ, ಸದಾ ನೆನಪಿನಲ್ಲುಳಿಯುವಂತದ್ದಾಗಿದೆ. ಪೋಪ್ ಫ್ರಾನ್ಸಿಸ್ ಬಹಳ ಹೃದಯವಂತರು. ಬಹಳ ದೂರದಿಂದ ಇಲ್ಲಿಗೆ ಬಂದು ನಮ್ಮನ್ನು ಭೇಟಿಯಾಗಿದ್ದಾರೆ" ಎಂದು ಹೇಳಿದರು.

ಪೋಪ್ ಫ್ರಾನ್ಸಿಸ್ ಹಾಗೂ ಇಲ್ಲಿನ ಗುರುಗಳು ಹಾಗೂ ಧಾರ್ಮಿಕ ಭಗಿನಿರ ಭೇಟಿ ಇಲ್ಲಿನ ಹೋಲಿ ಟ್ರಿನಿಟಿ ಹ್ಯೂಮನಿಸ್ಟಿಕ್ ಶಾಲೆಯಲ್ಲಿ ನಡೆಯಿತು. ಈ ಶಾಲೆಯು ಇಲ್ಲಿನ ಮಕ್ಕಳಿಗೆ ಸರ್ವತೋಮುಖ ಕಥೋಲಿಕ ಶಿಕ್ಷಣ ನೀಡುವಲ್ಲಿ ಅನೇಕ ದಶಕಗಳಿಂದ ಕಾರ್ಯನಿರ್ವಹಿಸುತ್ತಾ ಬಂದಿದೆ.