ಟಿಮೋರ್ ಲೆಸ್ಟೆ ಪ್ರೇಷಿತ ಪ್ರಯಾಣ ಮುಗಿಸಿದ ಪೋಪ್ ಫ್ರಾನ್ಸಿಸ್

ವರದಿ: ಡೆವಿನ್ ವಾಟ್ಕಿನ್ಸ್, ಅಜಯ್ ಕುಮಾರ್

ಪೋಪ್ ಫ್ರಾನ್ಸಿಸ್ ಅವರು ಟಿಮೋರ್ ಲೆಸ್ಟೆ ಪ್ರೇಷಿತ ಪ್ರಯಾಣವನ್ನು ಮುಗಿಸಿ, ತಮ್ಮ ಪ್ರೇಷಿತ ಭೇಟಿಯ ಮುಂದಿನ ದೇಶವಾದ ಸಿಂಗಪೋರ್'ಗೆ ತೆರಳಿದ್ದಾರೆ. ತಮ್ಮ 45ನೇ ವಿದೇಶ ಪ್ರಯಾಣದ ಭಾಗವಾಗಿ ಅವರು ನಾಲ್ಕು ದೇಶಗಳಿಗೆ ಈ ತಿಂಗಳಲ್ಲಿ ಭೇಟಿ ನೀಡಲಿದ್ದಾರೆ ಎಂದು ತಿಳಿಸಲಾಗಿತ್ತು. ಈಗಾಗಲೇ ಅವರು ಇಂಡೋನೇಷಿಯಾ, ಪಪುವಾ ನ್ಯೂಗಿನಿ ಮತ್ತು ಟಿಮೋರ್ ಲೆಸ್ಟೆಗಳಿಗೆ ಭೇಟಿ ನೀಡಿದ್ದು, ಈ ಸರಣಿಯ ಭಾಗವಾಗಿ ಅಂತಿಮವಾಗಿ ಅವರು ಸಿಂಗಪೋರ್ ದೇಶಕ್ಕೆ ಭೇಟಿ ನೀಡಲಿದ್ದಾರೆ.

ಟಿಮೋರ್ ಲೆಸ್ಟೆಗೆ ಪೋಪ್ ಫ್ರಾನ್ಸಿಸ್ ಅವರ ಪ್ರೇಷಿತ ಭೇಟಿಯ ಮುಖ್ಯಾಂಶಗಳು

ಪೋಪ್ ಫ್ರಾನ್ಸಿಸ್ ಟಿಮೋರ್ ಲೆಸ್ಟೆ ರಾಜಧಾನಿ ಡಿಲಿ ನಗರದಲ್ಲಿ ಬಲಿಪೂಜೆಯನ್ನು ಅರ್ಪಿಸಿದರು. ಈ ವೇಳೆ ಈ ದೇಶದ ಸುಮಾರು ಆರು ಲಕ್ಷ ಜನರು ಅಂದರೆ ಅರ್ಧದಷ್ಟು ಜನರು ಈ ಬಲಿಪೂಜೆಯಲ್ಲಿ ಭಾಗವಹಿಸಿದ್ದರು. ಮಕ್ಕಳನ್ನು ಕುರಿತು ತಮ್ಮ ಪ್ರಭೋದನೆಯಲ್ಲಿ ಮಾತನಾಡಿರುವ ಪೋಪ್ ಫ್ರಾನ್ಸಿಸ್ ಅವರು ಮಕ್ಕಳು ನಮಗೆ ನೀಡಲಾಗಿರುವ ವರದಾನ ಹಾಗೂ ಸಂಕೇತ ಎಂದು ಹೇಳಿದ್ದಾರೆ.

ವಿಶೇಷಚೇತನ ಮಕ್ಕಳೊಂದಿಗೆ ಸಂವಾದ; ಆರೈಕೆ ಮಾಡುವವರಿಗೆ ಪೋಪ್ ಕೃತಜ್ಞತೆ

ಇಲ್ಲಿನ ಇರ್ಮಾಸ್ ಆಲ್ಮಾ ಶಾಲೆಗೆ ಭೇಟಿ ನೀಡಿದ ಪೋಪ್ ಫ್ರಾನ್ಸಿಸ್ ಅವರು ಮಕ್ಕಳೊಂದಿಗೆ ಬೆರೆತು ಮಾತನಾಡಿದರು. ಪೋಪ್ ಫ್ರಾನ್ಸಿಸ್ ಅವರನ್ನು ನೋಡಲು ಇಲ್ಲಿನ ಜನತೆ ತಮ್ಮ ಸಾಂಪ್ರದಾಯಿಕ ಉಡುಗೆಯೊಂದಿಗೆ ಬಂದಿದ್ದರು.

ಈ ವೇಳೆ ಮಕ್ಕಳ ಕುರಿತು ಮಾತನಾಡಿದ ಪೋಪ್ ಫ್ರಾನ್ಸಿಸ್ ಅವರು ದೇವರು ನಿಮ್ಮನ್ನು ವಿಶೇಷವಾಗಿ ಪ್ರೀತಿಸುತ್ತಾರೆ. ಸೇವೆ ಹಾಗೂ ಆರೈಕೆಯನ್ನು ಮಾಡಲು ನಮಗೆ ಕಲಿಸುತ್ತಿರುವುದಕ್ಕಾಗಿ ನಿಮಗೆ ಕೃತಜ್ಞತೆಗಳನ್ನು ತಿಳಿಸುತ್ತೇನೆ ಎಂದು ಅವರು ವಿಶೇಷ ಚೇತನ ಮಕ್ಕಳ ಆರೈಕೆಯನ್ನು ಮಾಡುತ್ತಿರುವ ಸೇವಕರಿಗೆ ಹೇಳಿದರು.

ಧಾರ್ಮಿಕ ಸಹೋದರ ಸಹೋದರಿಯರೊಂದಿಗೆ ಭೇಟಿ

ಟಿಮೋರ್ ಲೆಸ್ಟೆ ದೇಶಕ್ಕೆ ತಮ್ಮ ಪ್ರೇಷಿತ ಭೇಟಿಯ ಹಿನ್ನೆಲೆ, ಪೋಪ್ ಫ್ರಾನ್ಸಿಸ್ ಅವರು ರಾಜಧಾನಿ ಡಿಲಿ ನಗರದ ಅಮಲೋಧ್ಭವಿ ಮಾತೆ ಪ್ರಧಾನಾಲಯದಲ್ಲಿ ಟಿಮೋರ್ ಲೆಸ್ಟೆಯ ಗುರುಗಳು, ಭಗಿನಿಯರು, ಧಾರ್ಮಿಕ ಸಹೋದರ ಸಹೋದರಿಯರು, ಗುರು ಅಭ್ಯರ್ಥಿಗಳು ಹಾಗೂ ಶ್ರೀಸಾಮಾನ್ಯ ಧರ್ಮೋಪದೇಶಕರನ್ನು ಭೇಟಿ ಮಾಡಿ, ಅವರನ್ನು ಉದ್ದೇಶಿಸಿ ಮಾತನಾಡಿದ್ದಾರೆ. ಯೇಸುಕ್ರಿಸ್ತರ ಶುಭಸಂದೇಶದ ಸುಗಂಧವನ್ನು ಸೂಸುವವರು ಹಾಗೂ ಅದನ್ನು ಪಸರಿಸುವವರು ನೀವಾಗಿದ್ದೀರಿ ಎಂದು ಹೇಳಿದ್ದಾರೆ.