ಕನ್ಸೆಟ್ಟಾ ಬ್ರೆಸಿಯಾ ಮೊರ್ರಾ ಅವರನ್ನು ವ್ಯಾಟಿಕನ್ನಿನ ಹಣಕಾಸು ಮಾಹಿತಿ ಪ್ರಾಧಿಕಾರದ ಸದಸ್ಯರನ್ನಾಗಿ ನೇಮಿಸಿದ ಪೋಪ್ ಫ್ರಾನ್ಸಿಸ್

ವರದಿ: ವ್ಯಾಟಿಕನ್ ನ್ಯೂಸ್

ವಿಶ್ವಗುರು ಫ್ರಾನ್ಸಿಸ್ ಅವರು ಖ್ಯಾತ ಆರ್ಥಿಕ ತಜ್ಞೆಯಾಗಿರುವ ಡಾ. ಕನ್ಸೆಟ್ಟಾ ಬ್ರೆಸಿಯಾ ಮೊರ್ರಾ ಅವರನ್ನು ವ್ಯಾಟಿಕನ್ನಿನ ಆರ್ಥಿಕ ಹಾಗೂ ಹಣಕಾಸು ಮಾಹಿತಿ ಪ್ರಾಧಿಕಾರದ ಸದಸ್ಯರನ್ನಾಗಿ ನೇಮಿಸಿದ್ದಾರೆ.

ಇದಕ್ಕೂ ಮುಂಚಿತವಾಗಿ ಈ ಪ್ರಾಧಿಕಾರದ ಸದಸ್ಯರಾಗಿದ್ದ ಡಾ. ಅಂಟೋನೆಲ್ಲಾ ಸಿಯಾರೋನೆ ಅಲಿಬ್ರಾಂದಿ ಅವರನ್ನು ಇಟಾಲಿಯನ್ ಸಾಂವಿಧಾನಿಕ ನ್ಯಾಯಾಲಯದ ನ್ಯಾಯಾಧೀಶರನ್ನಾಗಿ ನೇಮಕ ಮಾಡಲಾಗಿದೆ. ಈ ಹಿನ್ನೆಲೆಯಲ್ಲಿ ಇವರಿಂದ ತೆರವಾದ ಸ್ಥಾನಕ್ಕೆ ಡಾ. ಕನ್ಸೆಟ್ಟಾ ಬ್ರೆಸಿಯಾ ಮೊರ್ರಾ ಅವರನ್ನು ನೇಮಿಸಿದ್ದಾರೆ.

ಪ್ರಸ್ತುತ ಡಾ. ಕನ್ಸೆಟ್ಟಾ ಬ್ರೆಸಿಯಾ ಮೊರ್ರಾ ಅವರು ರೋಮ್ ವಿಶ್ವವಿದ್ಯಾನಿಲಯದಲ್ಲಿ ಆರ್ಥಿಕ ಕಾನೂನಿನ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಈ ವಿಶ್ವವಿದ್ಯಾನಿಲಯದಲ್ಲಿ ಹಣಕಾಸು ಹಾಗೂ ಬ್ಯಾಂಕಿಂಗ್ ಕಾನೂನುಗಳನ್ನು ವಿದ್ಯಾರ್ಥಿಗಳಿಗೆ ಭೋದಿಸುತ್ತಿದ್ದಾರೆ ಎಂದು ವರದಿಯಾಗಿದೆ.