Audience générale : « Charisme ezali likabo esalemi mpo na bolamu ya bato banso »

Jean- René Bompolonga- Kinshasa

Papa François abimisi likanisi na ye na tango ya audience générale ya mokolo ya misato 20 ya sanza ya zomi na moko na kobianga bandimi mpo na kokanisa na maye matali charismes maye bizali mpo na ye bikabo lolenge na lolenge ya Elimo. « Charismes bizali bilembo, maye Elimo Santu akokaba mpo na kobongisa Mwasi ya Kristu », elobaki episkopo ya Rome, liboso ya bozui ngonga ya bopemi mpo na bozongeli maye matali ba katekisi misato ya suka, o eleko « alobaka mosala ya bosantisi ya Elimo Santu, eye ekosalema na ba sacramento, na losambo mpe na bolandi ndakisa ya Mama ya Nzambe ». Ya mbala eye ya sika, « ngonga ekomi ya koloba lolenge ya mibale ya mosala ya Elimo Santu na Eklezia, oyo ezali mosala ya charisme », elobaki ye. «Biloko mibale bikosunga mpo na kopesa ntina ya oyo ezali charisme”, esembolaki ye. “Liboso mpenza, charisme ezali likabo esalemi mpo na bolamu ya bato banso”.

Bolamu ya bato banso, eloko ekolakisa charisme

Ya mibale, Mokitani ya Petelo atalaki litangi ya mokolo ena, eye ewutaki na maloba ya santu Polo na ba Kolinti, mpo na kolimbola  ete Elimo ezali kopesa makabo lolenge na lolenge na moto nyoso. “Charisme ezali likabo esalemi “na moko”, to “na ndambo ya bato” mpo na bango, kasi na banso te lolenge moko, mpe yango wana ekokabola ngolu ya bosantisi, biloko ya ntina ya théologie mpe ba sacramento, biye bizali lolenge moko mpe mpo na banso”, elobaki ye. Bikabo wana bizali mpo ya lokumu ya moto ye moko te kasi mpo ba nkita bibongisame mpo na kopesa bomengo na Eklezia mpo na lisanga.

Bomoni lisusu ba charismes mpo na kotombola mosala ya basi

Na bokobi likanisi na ye mpo na ntina ya ba charismes, Papa François alimbolaki ete bomoni mango lisusu ekosunga mpo na kosala ete botomboli ya ba laïcs mpe, mingi mpenza ya basi, emanyolama “kaka lokola likambo ya insitutions to ya société te, kasi monene na yango na Biblia mpe na molimo”. Mpo na bongo, elobaki ye lisusu, “ba laïcs bazali lokola basali ya libanda te to mampinga ya bosungi basango te, kasi bazali na ba charismes ya bango moko mpe makabo baye bazali kosunga etinda ya Eklezia”, elobaki ye.

“Bokabi ekobakisa ba charismes”

Mpo na kosukisa katekisi na ye ya mokolo, Papa François alobaki mposa na ye ya “kosilisa mindondo”. Pamba tè, elobaki ye, “bakristu ebele, na boyoki koloba likambo ya charismes, bazali na mawa mpe libungi, bazali kokanisa mpenza ete bango bazali na yango te mpe bazali komona lokola batie bango pembeni to bazali bakristu ya mosika”. Mosantu papa azongelaki koloba lisusu ete ndimbola ya solo ya charisme ezali na ntina”, pamba tè bizali “makabo biyebani maye mazali kozua motuya ya monene ntango biwuti bipayi ya Elimo Santu mpe bizali kozua bomoyi na bolingo na kati ya bileko ya bomoyi”. Nabokanisi mosantu Augustin, episkopo ya Roma alimboli bokabi (charité) “lokola nzela eye esengeli”, eye ekosunga mpo na kokabola ba charismes nyoso na kati ya bomoko ya Eklezia. Bokabi, “ekotinda ngai nalinga Eklezia, to mpe lisanga eye nazali kobika mpe, na bomoko, ba charismes binso, kaka ndambo te, bizali ya ngai, lokola mpe ba charismes na ngai, ata ko bizali komonana malonga te, bizali ya banso mpe mpo na bolamu ya banso”, elobaki ye.  “Bokabi ekobakisa ba charismes, ezali kosala charisme ya moko charisme ya banso», esukisaki ye.