Ebandeli ya likambo ya koponama lokola mosantu ya Baudouin, mokonzi ya kala ya ba Belges
Jean-René Bompolonga-Kinshasa
Kosambisama ya likambo ya koponama mosantu ya mokonzi Baudouin ya ba Belges ebandi, ekomaki mokolo ya poso mokanda moko ya dicastère ya Makambo ya basantu. Papa abimisaka likanisi ya bofungoli likambo ya mokonzi katoliko o eleko ya mobembo na Belgique na sanza ya libwa ya mobu nkoto mibale na ntuku mibale na minei. Na bozali mokonzi kobanda 1951 kino liwa na ye na 1993, Baudouin ayebani mpo na kotika bokonzi na boumeli ngonga ntuku misato na motoba mpo na koboya kotia maboko na mobeko etali kolongola zemi na ekolo na ye.
« Na bolingi kolandela likambo eye elobamaki, dicastère abandi molulu elongobami na bokeli mokolo ya zomi na sambo ya sanza ya zomi na mibale ya mobu nkoto mibale na ntuku mibale na minei Lisanga ya lisapo ya bongobongo, esalemi na bato ya nzebi ya boluki luki na ba archives mpe na lisolo ya Belgique, mpo na kosangisa mpe kotala nkoma etali mokonzi Baudouin », elimbolaki mokanda ya dicastère.
Nsakola na Belgique
O eleko ya mobembo na ye na Bruxelles, Papa, kati na bokutani lolenge na lolenge, alukaki kokende na lilita ya Baudouin na crypte royale eye ezali na nse ya ndako ya Nzambe Notre-Dame ya Laeken. Mokonzi Philippe na mwasi na ye Mathilde bazalaki wana. Mosantu Papa apesaki longonya “na mpiko ya Baudouin ntango aponaki kotika ebonga na ye ya bokonzi mpo na kotia maboko te na mobeko ya koboma” mpe atangi ye lokola ndakisa o eleko eye “bazalaki kosala mibeko ya mbemba”, elobamaki bongo na Ndako ya bapanzi nsango ya Vatican. François alobaki mposa na ye o eleko ena mpo ete “likambo na ye ya koponama mosantu epusana”. Mposa eye ebongwamaki nsakola ya solosolo, na ntango y’Angélus eye elandaki misa ya bosukisi na libanda ya masano eye ezali na kombo ya mokonzi, ya kobanda molulu tango akozonga na Rome. “Ndakisa na ye ya moto ya boyambi engengisa baye bazali kokamba bikolo, elobaka François, nasengi na ba episkopo ya Belgique bamipesa mpo na komema malamu likambo ena”.
