Никогаш не се потклекнувајте на корупцијата, грижете се да не се случи

Во понеделник наутро, 11 декември 2023 година, папата Фрањо се сретна со членовите на Канцеларијата на главниот ревизор во Ватикан.

Телото, кое е основано од папата Фрањо пред девет години, служи како антикорупциско тело на Светиот Престол и државата Ватикан и врши финансиски ревизии на субјектите кои им припаѓаат.

Борбата против корупцијата

Во своето обраќање до вработените, папата Фрањо ја истакна важноста од елиминирање на корупцијата во Ватикан.

Бидејќи Светиот Отец закрепнува од бронхитис, не го одржа подготвениот говор, туку го предаде за да се прочита дополнително.

Оние кои работат за Светиот Престол и градот Ватикан секако го прават тоа верно и чесно, стои во говорот на Папата, но мамката на корупцијата е толку опасна што мораме да бидеме крајно внимателни, истакна Петровиот наследник.

Знам дека посветувате многу време на оваа работа, со чии плодови се управува одлучно и во исто време со милосрдна дискреција, забележа Папата, нагласувајќи ја потребата од апсолутна транспарентност, бидејќи скандалите повеќе служат за пополнување на страниците на весниците отколку длабински да се поправи однесувањето.

Освен тоа, заклучи Папата, ве повикувам да им помогнете на одговорните за управување со имотот на Светиот Престол да создадат заштитни мерки кои можат да спречат да се материјализира подмолноста на корупцијата.

Независност, меѓународни принципи и професионализам

Папата Фрањо го продолжи своето обраќање истакнувајќи ги трите фундаментални карактеристики на Канцеларијата за ревизија: независност, внимателност кон меѓународните принципи и професионализам.

Канцеларијата е навистина независна, истакна Папата, бидејќи хиерархиски не зависи од други ентитети.

Далеку од тоа да имплицира некакво самоволие, сепак, нагласи Папата, оваа независност треба да води до делување кое секогаш е добро осмислено и вдахновено од највисокиот принцип на милосрдието.

Во меѓувреме, примената на најдобрите меѓународни пракси, додаде Светиот Отец, е важна за промовирање на еднаквост и усогласеност со остатокот од меѓународната заедница.

На крајот, Папата истакна дека професионалноста е сепак клучна. Тој посочи дека многу членови на Канцеларијата имаат децениско искуство на високи нивоа и се посветени на континуирана едукација на работното место.

Папата Фрањо на вработените во Канцеларијата им посочи дека за нив е вистинска морална обврска да бидат во чекор со континуираната еволуција на тоа подрачје.

Служење на сиромашните

Папата Фрањо го заврши своето обраќање со повик до вработените во Канцеларијата во врска со нешто што ја надминува нивната работа.

Знам дека некои од вас служат во народната кујна на Каритас, рече Папата. Тоа е убава работа и сакам да ви кажам: правете го тоа со отворено срце, едноставно и слободно и одвојте време да разговарате со луѓето и да ги слушате нивните приказни, рече Папата.

Ви благодарам за вашата работа и ви испраќам најубави желби за Светиот Божиќ до вас и вашите семејства, им посака на крајот Римскиот бискуп.