ആധുനിക സാമൂഹ്യ വിനിമയോപാധികൾ സഭയുടെ സുവിശേഷവത്ക്കരണ ദൗത്യത്തിന് സംഭാവനയേകും!

ജോയി കരിവേലി, വത്തിക്കാൻ സിറ്റി

ആധുനിക സാമൂഹ്യവിനിമയോപാധികൾ നരകുലത്തിൻറെ സേവനത്തിനുള്ള ദൈവിക ദാനങ്ങളാണെന്ന് ഏഷ്യയിലെ കത്തോലിക്കാമെത്രാൻ സംഘങ്ങളുടെ സംയുക്തസമിതിയുടെ സാമൂഹ്യവിനിമയ കാര്യാലയം (FABC-OSC).

ഈ കാര്യാലയം തായ്ലൻറിൻറെ തലസ്ഥാനമായ ബോങ്കോക്കിൽ നവമ്പർ 20 മുതൽ 24 വരെ സംഘടിപ്പിച്ച അതിൻറെ ഇരുപത്തിയെട്ടാം സമ്മേളനത്തിൻറെ സമാപന രേഖയിലാണ് ഈ പ്രസ്താവനയുള്ളത്. മെത്രാന്മാരും വൈദികരും അൽമായരുമുൾപ്പടെ വിവിധരാജ്യക്കാരായ മുപ്പതുപേരാണ് ഈ സമ്മേളനത്തിൽ സംബന്ധിച്ചിരുന്നത്.

ഓരൊ ക്രൈസ്തവനും ആശയവിനിമയം ചെയ്യുന്നവനാണെന്നും ദൈവമാണ് ആശയവിനിമയം ഏറ്റവും പരിപൂർണ്ണമായി നടത്തുന്നവനെന്നും അനുസ്മരിക്കുന്ന രേഖ നിർമ്മിത ബുദ്ധിയുൾപ്പടെയുള്ള എല്ലാ നൂതനസാങ്കേതിക വിദ്യകളും എന്താണെന്നു മനസ്സിലാക്കി വിമർശന ബുദ്ധിയോടുകൂടി ഉപയോഗപ്പെടുത്തണമെന്നും  ഈ സാങ്കേതിക വിദ്യകൾ സഭയ്ക്കും അവളുടെ വിനിമയ ശുശ്രൂഷയ്ക്കും സുവിശേഷപ്രഘോഷണദൗത്യത്തിനും സംഭാവനയേകുകയും അവസരങ്ങൾ പ്രദാനം ചെയ്യുകയും ചെയ്യുമെന്നും പറയുന്നു.

സുവിശേഷവത്ക്കരണമെന്നത് ജീവൻ പകർന്നു നൽകലും നമ്മുടെ മദ്ധ്യേ സന്നിഹിതനായ ഉത്ഥിതനുമായുള്ള സമാഗമത്തിൻറെ സൗന്ദര്യം പങ്കുവയ്ക്കലുമാണെന്ന് രേഖയിൽ കാണുന്നു