നിക്കരാഗ്വയുടെ സർക്കാൻ സഭയ്ക്കെതിരായ നിയന്ത്രണങ്ങൾ കർക്കശമാക്കുന്നു !

ജോയി കരിവേലി, വത്തിക്കാൻ സിറ്റി

മദ്ധ്യഅമേരിക്കൻ നാടായ നിക്കരാഗ്വയിൽ കത്തോലിക്കാസഭയ്ക്കെതിരായ നിലപാടുകൾ സർക്കാർ കടുപ്പിക്കുന്നു.

തിരുപ്പിറവിതിരുന്നാളിനോടനുബന്ധിച്ച് വീഥികളിൽ പരമ്പരാഗതമായി നടത്തിവരാറുള്ള തിരുജനനത്തിൻറെ ജീവൻതുടിക്കുന്ന ദൃശ്യാവീഷ്ക്കാരങ്ങൾ, ഈ നിയന്ത്രണങ്ങളുടെ ഭാഗമായി, പ്രസിഡൻറ് ദാനിയേൽ ഒർത്തേഗയുടെ ഭരണകൂടം നിരോധിച്ചിരുന്നു.

തിരുപ്പിറവിയാഘോഷ പരിപാടികൾ ദേവാലയത്തിനകത്തുമാത്രമായി ചുരുക്കണമെന്ന് പോലീസ് വൃത്തങ്ങൾ വ്യക്തമാക്കിയിരുന്നു.  വീഥികളിൽ തിരുജനനരംഗാവിഷ്ക്കാരങ്ങൾ നടത്തുന്നതിന് കടിഞ്ഞാണിടുന്നതിനു വേണ്ടി പോലീസ് ഇടവകദേവാലയങ്ങൾ കയറിയിറങ്ങി വൈദികരെ വിലക്കിയിരുന്നു.

ഇക്കൊല്ലം അതായത്, 2023-ൽ നിക്കരാഗ്വയിൽ കത്തോലിക്കാ സഭയ്ക്കെതിരായ നടപടികൾ വർദ്ധമാനമായിട്ടുണ്ട്. കത്തോലിക്ക സംഘടനക്കുള്ള വിലക്ക്, കത്തോലിക്കാ സർവ്വകലാശാലകൾ അടപ്പിക്കൽ, വൈദികരുടെയും സമർപ്പിതരുടെയും അറസ്റ്റ് എന്നിവയുൾപ്പടെ 275 കത്തോലിക്കാസഭാവിരുദ്ധ സംഭവങ്ങൾ അന്നാട്ടിൽ അരങ്ങേറിയിട്ടുണ്ട്.