ക്രൈസ്തവവിശ്വാസജീവിതത്തിൽ ക്ഷമയ്ക്കുള്ള പ്രാധാന്യം

സി. റോസ് മരിയ തെങ്ങനാംപ്ലാക്കൽ, വത്തിക്കാൻ സിറ്റി

ക്ഷമിക്കുക എന്നത് ദൈവത്തിന്റെ ദാനമാണ്. ക്ഷമിക്കുന്നത് ക്രിസ്തീയ വിശ്വാസത്തിന്റെ അടിസ്ഥാനമാണ്. ഇത് ബൈബിളിലുടനീളം കാണുന്ന ഒരു വിഷയമാണ്. സങ്കീർത്തനം 103:12 ൽ നാം വായിക്കുന്നു, “കിഴക്കും പടിഞ്ഞാറും തമ്മിൽ ഉള്ളത്ര അകലത്തിൽ നമ്മുടെ പാപങ്ങളെ അവിടുന്ന് നമ്മിൽനിന്ന് അകറ്റിനിർത്തി.” കിഴക്ക്,  പടിഞ്ഞാറിൽ നിന്ന് എത്ര അകന്ന് സ്ഥിതി ചെയ്യുന്നുവോ അതുപോലെ ദൈവം നമ്മെ പാപത്തിൽ നിന്നും അത്രയധികം അകറ്റി നിർത്തിയിരിക്കുന്നു. തൻറെ ജനവുമായി ചെയ്ത ഉടമ്പടി പാലിക്കുമെന്ന് വാഗ്ദാനം ചെയ്തതുപോലെ, ദൈവം നമ്മോട് ക്ഷമിക്കാനും, നമ്മുടെ പാപങ്ങൾ നമ്മിൽ നിന്ന് നീക്കം ചെയ്യാനും തയ്യാറാണെന്ന് ഈ വാക്യം നമ്മെ ഓർമ്മിപ്പിക്കുന്നു.

മത്തായി 6:14-15 തിരുവചനങ്ങളിൽ നാം ഇപ്രകാരം വായിക്കുന്നു, "മറ്റുള്ളവരുടെ തെറ്റുകൾ നിങ്ങൾ ക്ഷമിക്കുമെങ്കിൽ സ്വർഗ്ഗസ്ഥനായ നിങ്ങളുടെ പിതാവ് നിങ്ങളോടും ക്ഷമിക്കും. മറ്റുള്ളവരോടു നിങ്ങൾ ക്ഷമിക്കുകയില്ലെങ്കിൽ നിങ്ങളുടെ പിതാവ് നിങ്ങളുടെ തെറ്റുകളും ക്ഷമിക്കുകയില്ല.” ക്ഷമിക്കുക എന്നത് എല്ലായ്പ്പോഴും എളുപ്പമല്ലെങ്കിലും ദൈവത്തിന്റെ സഹായത്തോടെ അത് സാധ്യമാണ്. ശക്തവും, ആരോഗ്യകരവുമായ ബന്ധങ്ങൾ കെട്ടിപ്പടുക്കുന്നതിൽ, ക്ഷമ ഒരു പ്രധാന ഘടകമാണെന്ന് ബൈബിൾ നമ്മെ പഠിപ്പിക്കുന്നു. ദൈവജനമായ നാം ക്ഷമിക്കാൻ വിളിക്കപ്പെട്ടവരാണ്. യേശു പാപമോചനത്തിൻറെ മാതൃകയാണ്. അവനാണ് നമ്മോട് ക്ഷമിക്കുകയും, എല്ലായ്പ്പോഴും തൻറെ കരുണയും, ദയയും കാണിക്കുകയും ചെയ്യുന്നത്. യേശു പാപമോചനം പ്രസംഗിക്കുകയും എങ്ങനെ ക്ഷമിക്കാമെന്ന് കാണിക്കുകയും ചെയ്തു. ഇതിന്റെ ഏറ്റവും വലിയ ഉദാഹരണം അവൻ കുരിശിൽ കിടക്കുമ്പോഴാണ്.

ക്ഷമ: ക്രിസ്തീയ ജീവിതത്തിന്റെ ഒരു പ്രധാന ഭാഗം

ദൈവത്തിന് നമ്മോട്  ക്ഷമിക്കുന്നതിൽ  മടുപ്പ് തോന്നാറില്ല. എന്നാൽ ചിലപ്പോൾ  നമ്മോട്  ക്ഷമിക്കാൻ  ആവശ്യപ്പെടുമ്പോൾ  നാം  അതിൽ വിമുഖത കാണിക്കാറുണ്ട്. ദൈവത്തോട് ക്ഷമ ചോദിക്കുന്നതിൽ നമുക്ക് ഒരിക്കലും മടുപ്പ് തോന്നാതിരിക്കട്ടെ. എല്ലായ്പ്പോഴും ക്ഷമിക്കുന്ന, സ്നേഹമുള്ള പിതാവാണ് നമുക്കുള്ളത് (Vatican, Pope Francis,:Sunday angelus 17 March 2013). ക്ഷമ, നമ്മുടെ വ്യക്തിപരമായ ജീവിതത്തിലും, സാമൂഹികജീവിതത്തിലും പലവിധത്തിൽ നമ്മെ സഹായിക്കുന്നു. മാപ്പ് തേടുന്നതും, മാപ്പ് സ്വീകരിക്കുന്നതും രണ്ടും വളരെ പ്രധാനമാണ്. ക്ഷമിക്കുക എന്നുള്ളത്, ക്രിസ്തുവിലുള്ള ഒരു വ്യക്തിയുടെ ജീവിതത്തിന്റെ ഭാഗമായിരിക്കണം. ക്ഷമിക്കാൻ എളുപ്പമല്ലെങ്കിലും, ദൈവകൃപ ഓരോ വ്യക്തിയെയും ക്ഷമിക്കാൻ സഹായിക്കുന്നു, കാരണം യേശുവാണ് നമ്മുടെ മാതൃക. അത് ദൈവത്തിൻറെ ശൈലിയായതിനാൽ നാം അതിനെ ജീവിതത്തിൻറെ ഭാഗമാക്കണം. ക്ഷമയുടെ കാര്യത്തിൽ നമുക്ക് മാതൃകയായിത്തീരുന്ന നിരവധി വ്യക്തികളുണ്ട്. നമ്മുടെ അയൽക്കാരന് നാം മാപ്പ് നൽകുന്നില്ലെങ്കിൽ ദൈവം നമ്മോട് ക്ഷമിക്കുമെന്ന് പ്രതീക്ഷിക്കാൻ നമുക്കും കഴിയില്ല (Pope Francis, Angelus Sep 13, 2020). ഇന്നത്തെ ലോകം വെല്ലുവിളി നിറഞ്ഞതാണ്. മനുഷ്യൻ  ജീവിതത്തിന്റെ നാനാതുറകളിൽ പലതരത്തിലുള്ള വെല്ലുവിളികളെ അഭിമുഖീകരിച്ചുകൊണ്ട് ജീവിക്കുന്ന ഈ കാലഘട്ടത്തിൽ ക്ഷമിക്കുക എന്നത് വളരെ ബുദ്ധിമുട്ടുള്ള കാര്യമാണ്, പക്ഷേ അത് അസാധ്യമായ ഒന്നല്ല. നമ്മെ വേദനിപ്പിക്കുന്ന വ്യക്തികൾക്ക് വേണ്ടി പ്രാർത്ഥിച്ചുകൊണ്ടും, സ്നേഹത്തോടെ അവരെ സ്വീകരിച്ചുകൊണ്ടും, ക്ഷമ എന്ന പുണ്യം നമുക്ക് വളർത്തിയെടുക്കാൻ കഴിയും. നാമെല്ലാവരും പാപികളാണെന്നും, നമ്മൾ മറ്റുള്ളവരോട് ക്ഷമിക്കുമ്പോൾ ദൈവത്തിന്റെ കരുണയും, കൃപയും നമുക്കെല്ലാവർക്കും ലഭ്യമാണെന്നും ക്രൈസ്തവവിശ്വാസം നമ്മെ ഓർമ്മിപ്പിക്കുന്നു. ദൈവത്തിന്റെ സഹായത്തോടെ നമുക്ക് ക്ഷമിക്കാനും, വെല്ലുവിളികൾക്കിടയിലും മുന്നോട്ട് പോകാനും പഠിക്കാം. ദയയും, ക്ഷമയും വളരെ ബന്ധപ്പെട്ടിരിക്കുന്നു, ഒന്ന് പരിശീലിക്കുമ്പോൾ, അടുത്തത് അതിനെ അനുഗമിക്കുന്നു.  ക്ഷമയും, ദയയും കേവലം വികാരങ്ങളല്ലെന്നും എല്ലാ ദിവസവും നമുക്ക് സ്വീകരിക്കാവുന്ന തിരഞ്ഞെടുപ്പുകളാണെന്നും ജീവിതത്തിലൂടെയും,  പ്രബോധനങ്ങളിലൂടെയും യേശു തന്റെ തിരുവചനത്തിലൂടെ  നമുക്ക് വ്യക്തമാക്കി തരുന്നു.

ക്ഷമ: ഒരു തിരഞ്ഞെടുപ്പാണ്

ഫ്രാൻസിസ് പാപ്പാ തന്റെ  അപ്പോസ്തോലിക പ്രബോധനം എവഞ്ചേലി ഗൗദിയൂമിൽ (Evangelii Gaudium) കുറിക്കുന്നു, ലോകത്തിൽ തന്റെ കാരുണ്യത്തിന്റെ അടയാളമായിത്തീരുന്നതിന്, അവന്റെ ക്ഷമയുടെ ഉപകരണങ്ങളാകാൻ കർത്താവ് നമ്മോട് ആവശ്യപ്പെടുന്നു. ക്രിസ്തീയജീവിതത്തിന്റെ ഒരു പ്രധാന ഭാഗമാണ് ക്ഷമയെന്നും, മറ്റുള്ളവരുമായും, ദൈവവുമായുള്ള ബന്ധം കെട്ടിപ്പടുക്കുന്നതിന് അത് അനിവാര്യമാണെന്നും പാപ്പാ നമ്മെ ഓർമിപ്പിക്കുന്നു.                                                                                                                വിശുദ്ധ പൗലോസ്ശ്ലീഹാ എഫേസോസുകാർക്ക് എഴുതിയ ലേഖനം                                    4:32ൽ ഇങ്ങനെ വിശദീകരിക്കുന്നു, “ദൈവം ക്രിസ്തുവഴി നിങ്ങളോട്   ക്ഷമിച്ചതുപോലെ നിങ്ങളും പരസ്പരം ക്ഷമിച്ചും, കരുണകാണിച്ചും ഹൃദയാർദ്രതയോടെ  പെരുമാറുവിൻ.”  ക്ഷമിക്കുക എന്നത് ഒരു വികാരം മാത്രമല്ല, മറ്റുള്ളവരുമായുള്ള ആരോഗ്യകരമായ ബന്ധം വളർത്തിയെടുക്കുന്നതിന് നാം എടുക്കേണ്ട ഒരു തിരഞ്ഞെടുപ്പു കൂടിയാണെന്ന് ഇത് നമ്മെ ഓർമ്മിപ്പിക്കുന്നു. നാം ക്ഷമിക്കാൻ തീരുമാനിക്കുമ്പോൾ, നമ്മുടെ കോപത്തിന്റെയും നീരസത്തിന്റെയും ഭാരത്തിൽ നിന്ന് നാം വീണ്ടെടുക്കപ്പെടുക മാത്രമല്ല മറിച്ച് സ്നേഹത്തിന്റെയും, അനുരഞ്ജനത്തിനും അവസരം സൃഷ്ടിക്കുകകൂടിയാണ്.

നമ്മുടെ ജീവിതത്തിൽ രോഗശാന്തിയും, സമാധാനവും കൊണ്ടുവരാൻ കഴിയുന്ന ഒരു ശക്തമായ ഉപകരണമാണ് ക്ഷമ. ദൈവത്തിന്റെ ക്ഷമയുടെ പൂർണ്ണത അനുഭവിക്കാൻ നമ്മുടെ ജീവിതത്തിൽ പാലിക്കേണ്ട ഒന്നാണിത്.  ക്ഷമിക്കുക എന്നത് ഒരു തവണ മാത്രമല്ല, മറിച്ച് തുടർച്ചയായ പരിശ്രമവും, പ്രതിബദ്ധതയും ആവശ്യമുള്ള ഒരു പ്രക്രിയയാണെന്നും ബൈബിൾ നമ്മെ പഠിപ്പിക്കുന്നു. വിശുദ്ധ മത്തായിയുടെ സുവിശേഷം 18:22 ൽ, നാം ഇങ്ങനെ വായിക്കുന്നു “അപ്പോൾ പത്രോസ് വന്ന് അവനോട് ചോദിച്ചു: കർത്താവേ എന്നോട് തെറ്റ് ചെയ്യുന്ന എന്റെ സഹോദരനോട് ഞാൻ എത്ര പ്രാവശ്യം ക്ഷമിക്കണം? ഏഴു പ്രാവശ്യമോ? യേശു അരുളിചെയ്തു ഏഴെന്നല്ല, ഏഴ് എഴുപത് പ്രാവശ്യം എന്ന് ഞാൻ നിന്നോട് പറയുന്നു.”

ക്ഷമ: പ്രതീക്ഷയിലേക്കുള്ള ഒരു വഴി

ക്ഷമിക്കുക, എന്നത് യാത്രയാണ്. സമയവും, പരിശ്രമവും ആവശ്യമുള്ള ഒരു പ്രക്രിയയാണ്, അത് എല്ലായ്പ്പോഴും എളുപ്പമല്ല, പക്ഷേ ക്ഷമിക്കാനുള്ള തീരുമാനം നാം എടുക്കുമ്പോൾ അത് എല്ലായ്പ്പോഴും വിലമതിക്കുന്നു. നമ്മുടെ  സ്നേഹരാഹിത്യത്തിനും, വൈകാരികതയ്ക്കും  അടിമപ്പെടുന്നതിൽ നിന്നും  നാം സ്വതന്ത്രരാകുക മാത്രമല്ല, നമ്മുടെ മനസ്സിന്റെ ഭാരം കുറയ്ക്കാൻ കഴിയുന്ന ഏറ്റവും വലിയ ഒരു ഉപകരണമായി മാറുകയും ചെയ്യുന്നു. ക്ഷമിക്കുമ്പോൾ, പ്രതീക്ഷയോടും, ശുഭാപ്തിവിശ്വാസത്തോടും കൂടി ഭാവിയിലേക്ക് നീങ്ങാൻ ഓരോ വ്യക്തിക്കും സാധിക്കുന്നു. നമ്മൾ മറ്റുള്ളവരുടെ പെരുമാറ്റത്തെ ന്യായീകരിക്കുകയല്ല ചെയ്യുന്നത് മറിച്ച് സ്വന്തം ജീവിതത്തിൽ തനിക്കുണ്ടായ മാറ്റത്തെകുറിച്ച് വിലയിരുത്തുകയും, അർപ്പണബോധത്തോടെ മുന്നോട്ട് പോകാനുള്ള ഒരു സാഹചര്യമായി അതിനെ മാറ്റുകയും ചെയ്യുന്നു. അനുരഞ്ജനത്തിൻറെ, ഈ പാത നമ്മുടെ ഹൃദയത്തിൻറെ ആഴങ്ങളിൽ ക്ഷമയുടെ ശക്തിയും, പരസ്പരം മറ്റുള്ളവരെ സഹോദരീസഹോദരന്മാരായി അംഗീകരിക്കാനുള്ള കഴിവും കണ്ടെത്താനുള്ള ഒരു ഭാഗമായി മാറുന്നു. ക്ഷമയോടെ ജീവിക്കാൻ പഠിക്കുമ്പോൾ, സമാധാനത്തിന്റെ മനുഷ്യനാകാനുള്ള നമ്മുടെ ശേഷി വർദ്ധിക്കുന്നു. സ്വയം വിമർശനങ്ങൾ ഒഴിവാക്കാനും, ദയയോടും, സൗമ്യതയോടും കൂടി മറ്റുള്ളവരോട് പെരുമാറുന്നതിനുമുള്ള ഒരു ഗുണമായി ക്ഷമ മാറുന്നുണ്ട്.  നാം മറ്റുള്ളവരോട് ക്ഷമിക്കുമ്പോൾ നാമുമായുള്ള, ബന്ധത്തെക്കുറിച്ചും ഇത് കൂടുതൽ വ്യക്തമാക്കി തരുന്നു. നമ്മൾ മനുഷ്യരാണെന്നും, തെറ്റുപറ്റിയെക്കാമെന്നും, എല്ലാം തികഞ്ഞവരല്ലെന്നും തിരിച്ചറിയാൻ നമുക്ക് കഴിയും.  ഇന്നത്തെ ലോകത്ത് ക്ഷമ എന്നത്, ഒരു ധാർമ്മികത മാത്രമല്ല, കൂടുതൽ യോജിപ്പുള്ളതും, സമാധാനമുള്ളതുമായ ഒരു സമൂഹം സൃഷ്ടിക്കുന്നതിനുള്ള ഒരു അനിവാര്യമായ ചുവടുവെപ്പാണ്. പരസ്പരം ക്ഷമിച്ചുകൊണ്ട് വ്യക്തികളും, സമൂഹങ്ങളും ഒരുമിച്ച് പ്രവർത്തിക്കുമ്പോൾ, എല്ലാവർക്കും അഭിവൃദ്ധി പ്രാപിക്കാനുള്ള അവസരവും, സ്നേഹാനുഭൂതി ഉളവാക്കുന്ന ഒരു ലോകവും നമുക്ക് സൃഷ്ടിക്കാൻ കഴിയും. യേശുക്രിസ്തു ക്ഷമയുടെ ആത്യന്തിക മാതൃകയാണ്, അവന്റെ പഠിപ്പിക്കലുകളും, പ്രവർത്തനങ്ങളും ക്ഷമയാണ് നമുക്ക് മുൻപിൽ അവതരിപ്പിക്കുന്ന പാഠം. ക്ഷമ, യേശുവിന്റെ വാക്കുകളിലും, പ്രവർത്തികളിലും കാണുന്ന ശക്തമായ പ്രചോദനമാണ്.

ക്ഷമ, സ്നേഹത്തിന്റെ അഗാധമായ പ്രകടനമാണ്. ക്ഷമയുടെ തുടർച്ചയായ പ്രക്രിയ മറ്റുള്ളവരോട് ക്ഷമിക്കുക മാത്രമല്ല, ദൈവത്തിൽ നിന്ന് പാപമോചനം തേടുക കൂടിയാണ്. സ്നേഹവും, കരുണയും നിറഞ്ഞ ജീവിതത്തിലൂടെ ഒരു  ക്ഷമിക്കുന്ന സമൂഹത്തെ സൃഷ്ടിക്കാൻ ഓരോ വ്യക്തിയും വിളിക്കപ്പെട്ടിരിക്കുന്നു. യേശുവിന്റെ ക്ഷമയുടെ മാതൃക പിന്തുടരുന്നതിലൂടെ നമുക്ക് സ്വാതന്ത്ര്യവും, രോഗശാന്തിയും അനുഭവിക്കാൻ കഴിയും. വിദ്വേഷത്തിന്റെ വായുവിനെ ശുദ്ധീകരിക്കുന്ന ഓക്‌സിജനാണ് ക്ഷമ, നീരസത്തിന്റെ വിഷങ്ങൾക്കുള്ള മറുമരുന്നാണ് ക്ഷമ, കോപം ശമിപ്പിക്കാനും, സമൂഹത്തെ മലിനമാക്കുന്ന നിരവധി രോഗങ്ങൾ സുഖപ്പെടുത്താനുമുള്ള മാർഗമാണത് (Pope Francis,  Angelus 17 September 2023).

നമ്മെ വേദനിപ്പിച്ചവർക്ക് ക്ഷമ നൽകുന്നത്, വെല്ലുവിളി നിറഞ്ഞതും, ബുദ്ധിമുട്ടുള്ളതുമായ പ്രക്രിയയാണ്. പക്ഷേ ഇത് രോഗശാന്തിയിലേക്കും, മുൻപോട്ടുപോകാനുമുള്ള ഒരു നിർണായക ചുവടുവെപ്പാണ്. മറ്റുള്ളവരുടെ കാഴ്ചപ്പാടിൽ  നിന്ന് കാര്യങ്ങൾ കാണാൻ ശ്രമിക്കേണ്ടതുണ്ട്. മറ്റുള്ളവർക്ക് അവർക്കുണ്ടാകുന്ന വേദനയിൽ നിന്നുമാണ് ക്ഷമിക്കാൻ സാധിക്കാത്തതെന്ന് അറിയാൻ സാധിക്കണം.  നമുക്ക് ക്ഷമയിലൂടെ, നമ്മുടെ ചുറ്റുപാടും കൂടുതൽ  അനുകമ്പയുള്ള ഒരു ലോകത്തെ സൃഷ്ടിക്കാൻ സാധിക്കണം.

കുടുംബം: ക്ഷമയുടെ വാസസ്ഥലം

കുടുംബം ജീവന്റെ സ്ഥലമായിരിക്കണം, മരണസ്ഥലമല്ല; പാപമോചനത്തിനുള്ള സ്ഥലം, പറുദീസയുടെ സ്ഥലം, നരകമല്ല; രോഗശാന്തിയുടെ സ്ഥലം, ക്ഷമയുടെ സ്ഥലം. ദുഃഖം ഉള്ളടത്ത്, ക്ഷമ സന്തോഷം നൽകുന്നു; പിന്തുണയുടെ ഇടം. പരസ്‌പരം പരദൂഷണം പറയലുകളല്ല, മറിച്ച് എല്ലാവരെയും സ്വാഗതം ചെയ്യുന്ന ഒരു സ്ഥലമായി അത് മാറണം. കുടുംബം തിരസ്കരണത്തിന്റെ സ്ഥലമായി മാറരുത്, അതിനേക്കാൾ ഉപരിയായി സ്നേഹത്തിന്റെയും, മറ്റുള്ളവർക്ക് ഇടം നൽകുന്നതിന്റെയും ഒരു   വാസസ്ഥലമായി  മാറണം  (J.V. Mazibuko, “Family, Place of Forgiveness”). സ്നേഹത്തിന്റെയും, പരസ്പര ക്ഷമയുടെയും പരിശീലന കേന്ദ്രമാണ് കുടുംബം. കുടുംബത്തിൽ, പരസ്പരം ക്ഷമിക്കാതെ നമുക്ക് ജീവിക്കാൻ കഴിയില്ല. ക്ഷമിക്കാൻ കാത്തിരിക്കരുതെന്ന് പാപ്പാ കുടുംബാംഗങ്ങളെ ഉപദേശിച്ചു. ഒരാൾക്ക് ക്ഷമ ചോദിക്കാതെ ജീവിക്കാൻ കഴിയില്ല, അല്ലെങ്കിൽ കുറഞ്ഞത്, ഒരാൾക്ക് സമാധാനത്തോടെ ജീവിക്കാൻ കഴിയില്ല. നമ്മുടെ ബലഹീനതയും, സ്വാർത്ഥതയും മൂലമുള്ള ഈ തെറ്റുകൾ നാം കണക്കിലെടുക്കണം. നമ്മൾ ഉണ്ടാക്കുന്ന മുറിവുകൾ വേഗത്തിൽ സുഖപ്പെടുത്തുക, കുടുംബത്തിനുള്ളിൽ തകരുന്ന ബന്ധങ്ങൾ ഉടൻ പുനർനിർമ്മിക്കുക. നാം വളരെക്കാലം ക്ഷമിക്കാൻ കാത്തിരിക്കുകയാണെങ്കിൽ, എല്ലാം കൂടുതൽ ബുദ്ധിമുട്ടാകും.

ക്ഷമാപണം നടത്താതെ, ഭാര്യാഭർത്താക്കന്മാർക്കിടയിൽ, മാതാപിതാക്കൾക്കും കുട്ടികൾക്കുമിടയിൽ, സഹോദരങ്ങൾക്കും, സഹോദരിമാർക്കുമിടയിൽ, സമാധാനം സ്ഥാപിക്കാതെ ദിവസം അവസാനിക്കരുത്. ഉടനടി ക്ഷമ ചോദിക്കാനും, പരസ്പരം ക്ഷമിക്കാനും നാം പഠിക്കുകയാണെങ്കിൽ, മുറിവുകൾ സുഖപ്പെടും, വിവാഹം കൂടുതൽ ശക്തമാകും, കുടുംബം കൂടുതൽ ശക്തമായ ഒരു വീടായി മാറും, അത് നമ്മുടെ ചെറുതോ, വലുതോ ആയ തെറ്റുകൾ സഹിക്കുന്നു. കാരണം ഒരൽപം വാത്സല്യം മതി, ഒരാൾക്ക് പുതുതായി ജീവിതം ആരംഭിക്കാൻ. വഴക്കിൽ ദിവസം അവസാനിപ്പിക്കരുത്. (Pope Francis, General Audience, Wednesday, 4 November 2015).

ക്ഷമിക്കാനുള്ള ധൈര്യം

ക്ഷമിക്കാൻ ധൈര്യം ആവശ്യമാണ്. അത് എല്ലായ്പ്പോഴും എളുപ്പമല്ല, പക്ഷേ അങ്ങനെ ചെയ്യുമ്പോൾ സമാധാനത്തിന്റെയും, സ്വാതന്ത്ര്യത്തിന്റെയും ആഴങ്ങളിലേക്ക് എത്തിച്ചേരാൻ നമുക്ക് കഴിയും. ക്ഷമിക്കുക എന്നത് ഭൂതകാലത്തെക്കുറിച്ചു മാത്രമല്ല, വർത്തമാനകാലത്തെയും ഭാവികാലത്തെയും കുറിച്ചുള്ളതാണ്. അപ്പോൾ നമുക്ക് മെച്ചപ്പെട്ട ഒരു ഭാവികാലത്തെ സ്വപ്നം കാണാനും, പ്രത്യാശാബോധത്തോടെയും, ശുഭാപ്തിവിശ്വാസത്തോടെയും മുന്നോട്ട് പോകാനും കഴിയും. ധാരണയും, അനുകമ്പയും ആവശ്യമുള്ള ഒരു യാത്രയാണ് ക്ഷമ. സങ്കീർത്തനം 103:10 ൽ,  നാം  ഇങ്ങനെ വായിക്കുന്നു, “നമ്മുടെ പാപങ്ങൾക്കൊത്ത് അവിടുന്ന് നമ്മെ ശിക്ഷിക്കുന്നില്ല. നമ്മുടെ അകൃത്യങ്ങൾകൊത്തു നമ്മോടു പകരം ചെയ്യുന്നില്ല.” മറ്റുള്ളവർക്ക് നൽകാൻ കഴിയുന്ന ഒരു സമ്മാനമാണ് ക്ഷമ. “ക്ഷമിക്കുന്നത് ബലഹീനതയാണെന്ന് തോന്നിയേക്കാം, പക്ഷേ അത് നൽകുന്നതിനും, സ്വീകരിക്കുന്നതിനും, വലിയ ആത്മീയ ശക്തിയും, ധൈര്യവും ആവശ്യമാണ്. അത് ഏതെങ്കിലും വിധത്തിൽ നമ്മെ ദുർബലപ്പെടുത്തുന്നതായി തോന്നിയേക്കാം, എന്നാൽ വാസ്തവത്തിൽ അത് നമ്മെ പൂർണ്ണവും, സമ്പന്നവുമായ മനുഷ്യത്വത്തിലേക്ക് നയിക്കുന്നു” (Saint John Paul II, Message for World Day of Peace, 1 January 2002). എല്ലായ്പ്പോഴും ക്ഷമിക്കുകയെന്നത് നമ്മുടെ ജീവിതത്തിന്റെയും വ്യക്തിത്വത്തിന്റെയും ഭാഗമായി മാറട്ടെ. ക്ഷമിക്കുകയും, ക്ഷമ ചോദിക്കുകയും ചെയ്യുക എന്നത് ക്രിസ്തീയ ജീവിതത്തിന്റെ വഴിയാണെന്ന് മറക്കാതിരിക്കാം. ആത്മാർത്ഥമായ ക്ഷമിക്കാനും, എളിമയോടെ ക്ഷമ ചോദിക്കാനും ദൈവം നമുക്ക് കൃപയും, സന്നദ്ധതയും നൽകട്ടെ.