രാജസ്ഥാനിലെ അജ്മീർ രൂപതയ്ക്ക് പുതിയ മെത്രാൻ!

ജോയി കരിവേലി, വത്തിക്കാൻ സിറ്റി

വൈദികനായ ജോൺ കർവാല്ലൊയെ രാജസ്ഥാനിലെ അജ്മീർ രൂപതയുടെ പുതിയ മെത്രാനായി മാർപ്പാപ്പാ നാമനിർദ്ദേശം ചെയ്തു.

റോമിലെ ജെമേല്ലി ആശുപത്രിയിൽ ചികിത്സയിൽ കഴിയുന്ന ഫ്രാൻസീസ് പാപ്പാ ശനിയാഴ്ചയാണ് (01/03/25) ഈ നിയമന ഉത്തരവ് പുറപ്പെടുവിച്ചത്.

1924 ജൂൺ 1-ന് ബിഷപ്പ് പയസ് തോമസ് ഡിസൂസ രൂപതാഭരണത്തിൽ നിന്നു വിരമിച്ചതിനെ തുടർന്നുള്ള ഒഴിവിലാണ് പുതിയ നിയമനം.

1969 ഏപ്രിൽ 10-ന് കർണ്ണാർടകയിലെ ഉഡുപ്പി രൂപതാതിർത്തിക്കുള്ളിൽപ്പെട്ട മർഗോളിയിലാണ് നിയുക്തമെത്രാൻ ജോൺ കർവാല്ലൊയുടെ ജനനം. സാമൂഹ്യപ്രവർത്തനത്തിൽ ബിരുദാനന്തരബിരുദമുള്ള അദ്ദേഹം 1996 മെയ് 13-ന് പൗരോഹിത്യം സ്വീകരിച്ചു. തുടർന്ന് കോട്ട എന്ന സ്ഥലത്ത് വിശുദ്ധ പൗലോസിൻറെ ഇടവകയിൽ സഹവികാരി, ലദ്പുരയിൽ ഇടവകവികാരി, അജ്മീർ രൂപതാ സാമൂഹ്യസേവന വിഭാഗത്തിൻറെ മേധാവി, തുടങ്ങിയ വിവിധ തലങ്ങളിൽ പ്രവർത്തിച്ചിട്ടുള്ള നിയുക്ത മെത്രാൻ കർവാല്ലൊ സെൻറ് പോൾസ് മദ്ധ്യമ വിദ്യാലയത്തിൻറെ ചുമതല വഹിച്ചുവരവെയാണ് രൂപതാഭരണസാരഥിയായി നിയുക്തനായിരിക്കുന്നത്.