പാപ്പാ: വൈവിധ്യരായിരുന്ന ആദിമ ശിഷ്യരുടെ ഐക്യം യേശുവിലായിരുന്നു

സി. റൂബിനി ചിന്നപ്പ൯ സി.റ്റി.സി, വത്തിക്കാ൯ ന്യൂസ്

ജനുവരി പന്ത്രണ്ടാം തിയതിയാണ് പാപ്പാ ഇവരുമായി വത്തിക്കാനിൽ കൂടിക്കാഴ്ച നടത്തിയത്.  കർദ്ദിനാൾ കോഹ്നെയും, അവിടെ സമ്മേളിച്ചിരുന്ന എല്ലാവരെയും  അഭിവാദ്യം ചെയ്ത പാപ്പാ അവർക്കു  ഊഷ്മളമായ സ്വാഗതമരുളി. ക്രൈസ്തവ ഐക്യത്തിനായുള്ള പ്രാർത്ഥനാവാരാചരണത്തിന് മുന്നോടിയായുള്ള ഈ ദിവസങ്ങളിലും സാംസ്കാരിക സഹകരണത്തിനായുള്ള കത്തോലിക്കാ കമ്മിറ്റി സ്ഥാപിതമായതിന്റെ അറുപതാം വാർഷികത്തോടനുബന്ധിച്ചും ഈ പുതുവത്സരത്തിന്റെ  തുടക്കത്തിൽ  അവരെ കണ്ടുമുട്ടാൻ കഴിഞ്ഞതിൽ പാപ്പാ തന്റെ സന്തോഷം പ്രകടിപ്പിച്ചു.

ഓർത്തഡോക്സ്, പൗരസ്ത്യ  ഓർത്തഡോക്സ് സഭകളിൽ നിന്നുള്ള വിദ്യാർത്ഥികൾക്ക് കത്തോലിക്കാ അക്കാദമിക് ഇൻസ്റ്റിറ്റ്യൂട്ടുകളിൽ അവരുടെ രൂപീകരണം പൂർത്തിയാക്കാനും തുടർന്ന് സ്വന്തം സമൂഹങ്ങളിലേക്കു  മടങ്ങാനും അവർ നേടിയ അറിവും അനുഭവവും പങ്കിടാനും അവസരം നൽകുന്ന  കമ്മിറ്റിയെ പാപ്പാ അഭിനന്ദിച്ചു. സഭയോടുള്ള സ്നേഹത്തിൽ അധിഷ്ഠിതമായ ഈ പദ്ധതിയിൽ ഉൾപ്പെട്ട  എല്ലാവരോടും, പ്രത്യേകിച്ചും കമ്മിറ്റിയുടെ പ്രവർത്തനങ്ങൾ നയിക്കുന്ന  ക്രൈസ്തവ  ഐക്യം പ്രോത്സാഹിപ്പിക്കുന്നതിനുള്ള വത്തിക്കാന്റെ ഡികാസ്റ്ററിയിലെ ഉദ്യോഗസ്ഥരോടും പാപ്പാ  തന്റെ കൃതജ്ഞത പ്രകടിപ്പിച്ചു. സ്കോളർഷിപ്പ് ജേതാക്കളെ പാർപ്പിച്ചിരിക്കുന്ന സഭാ കോളേജുകളുടെ റെക്ടർമാർക്കും അവരുടെ തുറന്ന മനോഭാവത്തിനും വിദ്യാർത്ഥികളെ സ്വാഗതം ചെയ്യുകയും അനുഗമിക്കുകയും ചെയ്യുന്ന കരുതലിനും പാപ്പാ നന്ദി പറഞ്ഞു.

ഇവിടെ വന്നു പഠിക്കുന്ന വിദ്യാർത്ഥികൾക്ക് അക്കാദമിക് കോഴ്സുകൾ മാത്രമല്ല, കത്തോലിക്കാ വിദ്യാർത്ഥികളുടെ രൂപീകരണപരവും ആത്മീയവും ആരാധനാപരവുമായ വളർച്ചയും വ്യക്തിപരമായി പിന്തുടരാനും എല്ലാറ്റിനുമുപരിയായി സഭാ കോളേജുകളിലെ സമൂഹ  ജീവിതത്തിന്റെ അനുഭവം അവരുമായി പങ്കിടാനും കഴിയും എന്ന് പാപ്പാ പ്രത്യാശ പ്രകടിപ്പിച്ചു. കർത്താവായ യേശുക്രിസ്തുവിനെ അനുഗമിക്കാനും അവന്റെ  സഭയെ സേവിക്കാനുമുള്ള  ഒരേ ആഗ്രഹം പങ്കിടുന്ന സമൂഹങ്ങളുമായുള്ള ഈ സുപ്രധാനവും നേരിട്ടുള്ളതുമായ സമ്പർക്കം ഓർത്തഡോക്സ്, പൗരസ്ത്യ ഓർത്തഡോക്സ് വിദ്യാർത്ഥികളെ മാത്രമല്ല, കത്തോലിക്കാ വിദ്യാർത്ഥികളെയും മുൻവിധികളെ മറികടക്കാനും മതിലുകൾ തകർക്കാനും സംവാദത്തിന്റെയും സൗഹൃദത്തിന്റെയും പാലങ്ങൾ പണിയാനും സഹായിക്കുന്നു. പാപ്പാ വ്യക്തമാക്കി.

ആദിമ ക്രൈസ്തവ സമൂഹങ്ങളെക്കുറിച്ചും, ആദ്യ ശിഷ്യന്മാരും നമ്മുടെ പാരമ്പര്യങ്ങൾ ഉത്ഭവം കണ്ടെത്തിയ അപ്പോസ്തലരെക്കുറിച്ചും പരാമർശിച്ച പാപ്പാ നാം അവരെ സൂക്ഷ്മമായി അനുധാവനം ചെയ്താൽ, അവർ തികച്ചും വൈവിധ്യത നിറഞ്ഞവരായിരുന്നെന്ന് കാണാ൯ കഴിയുമെന്ന് പാപ്പാ പറഞ്ഞു. സ്നാപകന്റെ ശിഷ്യന്മാർ, മതതീവ്രവാദികൾ, മത്സ്യത്തൊഴിലാളികൾ, ചുങ്കകാർ എന്നിവരടങ്ങിയ  ശിഷ്യഗണത്തിന്റെ പശ്ചാത്തലവും, സ്വഭാവവും, മമതയും വളരെ വ്യത്യസ്തമായിരുന്നു. എങ്കിലും അവരെക്കാൾ കൂടുതൽ ഐക്യമുള്ള ഒരു സമൂഹത്തെക്കുറിച്ച് ചിന്തിക്കാൻ പ്രയാസമാണ്.  വ്യത്യസ്തരായിരുന്ന അവർ യേശുവിലാണ് തങ്ങളുടെ ഒത്തൊരുമ കണ്ടെത്തിയത്.  അവന്റെ കാലടിപ്പാടുകൾ പിന്തുടർന്ന് അവർ പരസ്പരം യാത്ര ചെയ്തു.  ദാനധർമ്മങ്ങളിൽ അവരുടെ ഐക്യം പരിശുദ്ധാത്മാവിനാൽ ദൃഢമായി. അവൻ അവരെ ദൂരേക്ക് അയച്ചു, അങ്ങനെ അവരെ പരസ്പരം കൂടുതൽ അടുപ്പിച്ചു. പാപ്പാ വ്യക്തമാക്കി.

ഒരേ ആത്മാവിനാൽ നയിക്കപ്പെടുന്ന യേശുവിന്റെ കാൽപ്പാടുകളിൽ അവർ ഒരുമിച്ച് യാത്ര ചെയ്യുമ്പോൾ പിന്തുടരേണ്ട പാത കൂടിയാണിതെന്ന് പാപ്പാ അവരോടു പറഞ്ഞു. റോമിൽ പഠിക്കുമ്പോൾ, അവർക്ക് ക്രിസ്തു ആരാണെന്നും, അവർ അവനെ കണ്ടുമുട്ടിയതെങ്ങനെയെന്നും, അവൻ അവരുടെ ഹൃദയങ്ങൾ കീഴടക്കി ജീവിതത്തെ എങ്ങനെ പിടിച്ചടക്കിയെന്നും, അവർ സ്തുതിക്കുകയും അവരുടെ കർത്താവായി അംഗീകരിക്കുകയും ചെയ്യുന്ന വൈവിധ്യമാർന്ന പാരമ്പര്യങ്ങളും പരസ്പരം പങ്കിടാൻ അവർക്ക് മികച്ച അവസരങ്ങളുള്ളത് വിനിയോഗിക്കാൻ പാപ്പാ അവരെ ഉപദേശിച്ചു.