മനുഷ്യത്വനിഷേധങ്ങൾ ന്യായീകരിക്കാനാവില്ല: പാപ്പാ

ഫാ.ജിനു ജേക്കബ്,വത്തിക്കാൻ സിറ്റി

ജനുവരി മാസം ഇരുപത്തിയേഴാം തീയതി മനുഷ്യക്കുരുതിയുടെ ഇരകളെ അനുസ്മരിക്കുന്ന ആഗോള ദിനമായി ആഘോഷിക്കുകയാണ്. ജനുവരി ഇരുപത്തിനാലാം തീയതി നടന്ന പൊതുകൂടിക്കാഴ്ചാവേളയിൽ ഫ്രാൻസിസ് പാപ്പാ ഈ വലിയമനുഷ്യത്വനിഷേധത്തെ അനുസ്മരിക്കുകയും, ഇതിനെതിരെ പോരാടുവാൻ എല്ലാവരെയും ആഹ്വാനം ചെയ്യുകയും ചെയ്തു.

ആറ് ദശലക്ഷം ജൂതന്മാരെയും, യൂറോപ്പിലെ ജൂത ജനസംഖ്യയുടെ മൂന്നിൽ രണ്ട് ഭാഗത്തെയും മറ്റ് ദശലക്ഷക്കണക്കിന് ആളുകളെയും നാസി ഭരണകൂടം ഇല്ലായ്മ ചെയ്തതിനെയാണ് ഈ ദിനത്തിൽ അനുസ്മരിക്കുന്നത്. അതേസമയം മനുഷ്യാവകാശങ്ങളോടുള്ള നമ്മുടെ പ്രതിബദ്ധത വീണ്ടും ഊട്ടിയുറപ്പിക്കേണ്ടതിന്റെ ആവശ്യകതയും ഈ ദിനം നമ്മെ ഓർമ്മിപ്പിക്കുന്നു.

കഴിഞ്ഞ നൂറ്റാണ്ടിന്റെ ആദ്യപകുതിയിൽ നടന്ന ഈ വലിയ മനുഷ്യകൂട്ടക്കുരുതി ന്യായീകരിക്കാനാവാത്തതാണെന്നു പാപ്പാ അടിവരയിട്ടു പറഞ്ഞു.ഈ ഓർമ്മദിനം വിദ്വേഷത്തിന്റെയും അക്രമത്തിന്റെയും യുക്തി ഒരിക്കലും ന്യായീകരിക്കാനാവില്ലെന്നുള്ള ബോധ്യം നമുക്ക് പകർന്നുനൽകുവാൻ ഉപകരിക്കപ്പെടണമെന്നു പാപ്പാ കൂട്ടിച്ചേർത്തു.നമ്മുടെ മനുഷ്യത്വത്തെ നിഷേധിക്കുന്ന ഇത്തരം പ്രവൃത്തികൾ ന്യായീകരിക്കാനാവാത്തതാണെന്നും പാപ്പാ എടുത്തു പറഞ്ഞു.