ഏകാന്ത സഞ്ചാരിയാകാനുള്ളവനല്ല വൈദീകൻ: ഫ്രാൻസിസ് പാപ്പാ

സി. റൂബിനി ചിന്നപ്പ൯ സി.റ്റി.സി, വത്തിക്കാ൯ ന്യൂസ്

ഒറ്റയ്ക്ക് യാത്ര ചെയ്യാനുള്ളവരല്ലെന്ന് ഊന്നിപ്പറഞ്ഞ പാപ്പാ സാഹോദര്യ ബന്ധങ്ങളുടെ ശക്തമായ ശ്രുംഖലയുടെ ആവശ്യകത ഊന്നിപ്പറഞ്ഞു. സമ്മേളനത്തെ അഭിസംബോധന ചെയ്ത ഫ്രാൻസിസ് പാപ്പാ, ലോകമെമ്പാടുമുള്ള വൈദീകർക്കും ഡീക്കന്മാർക്കും അവരുടെ അർപ്പണബോധത്തിനും ഔദാര്യത്തിനും ഹൃദയംഗമമായ നന്ദി അറിയിച്ചു. പൗരോഹിത്യ മേധാവിത്വവും ആത്മീയ ലൗകികതയും ഉയർത്തുന്ന വെല്ലുവിളികൾ അംഗീകരിച്ച പാപ്പാ, പലപ്പോഴും പ്രയാസകരമായ സാഹചര്യങ്ങളിൽ വിശ്വസ്തതയോടെ സേവിക്കുന്ന ഭൂരിഭാഗം പുരോഹിതന്മാരെയും പ്രശംസിച്ചു.

"പൗരോഹിത്യത്തിന്റെയും ആത്മീയ ലൗകികതയുടെയും അപകടസാധ്യതകൾക്കെതിരെ ഞാൻ പലപ്പോഴും മുന്നറിയിപ്പ് നൽകിയിട്ടുണ്ട്, എന്നാൽ ബഹുഭൂരിപക്ഷം പുരോഹിതന്മാരും വളരെ ഔദാര്യത്തോടും വിശ്വാസത്തോടും കൂടി ദൈവജനത്തിന്റെ നന്മയ്ക്കായി സമർപ്പിക്കുന്നു. അനേകം പേർ അധ്വാന ഭാരം വഹിച്ചുകൊണ്ടുതന്നെ വെല്ലുവിളി നിറഞ്ഞ അജപാലനവും ആത്മീയവുമായ ബുദ്ധിമുട്ടുകളും അഭിമുഖീകരിക്കുന്നു,“പാപ്പാ പങ്കുവച്ചു.

വൈദീകരുടെ പരിശീലനം സെമിനാരി ജീവിതത്തോടെ തീരുന്നില്ലെന്നും രൂപീകരണ പ്രക്രിയ തുടർന്നു കൊണ്ടേയിരിക്കേണ്ട ഒന്നാണെന്നും പാപ്പാ അടിവരയിട്ടു. അതിവേഗം മാറിക്കൊണ്ടിരിക്കുന്ന ഇന്നത്തെ ലോകത്ത് സെമിനാരി പരിശീലനം മാത്രം മതിയാകുകയില്ല എന്ന് ഫ്രാൻസിസ് പാപ്പാ ഊന്നിപ്പറഞ്ഞു. സെമിനാരി വിദ്യാഭ്യാസത്തിനപ്പുറം തുടർച്ചയായ രൂപീകരണം ആത്മീയ വളർച്ചയ്ക്കും പക്വതയ്ക്കും ആവശ്യമാണെന്ന് പാപ്പാ പറഞ്ഞു. "സെമിനാരിയിൽ പഠിച്ച കാര്യങ്ങൾ ഏകീകരിക്കാനും ശക്തിപ്പെടുത്താനും വികസിപ്പിക്കാനും നാം വിളിക്കപ്പെട്ടിരിക്കുന്നു," വൈദികർ ആത്മീയമായി പക്വത പ്രാപിക്കുകയും നവ സുവിശേഷവൽക്കരണ വെല്ലുവിളികളുമായി പൊരുത്തപ്പെടുകയും ചെയ്യേണ്ടതിന്റെ  ആവശ്യകത ഊന്നിപ്പറയുകയും ചെയ്തു.

ഏകാന്തത

സാഹോദര്യ ബന്ധങ്ങളുടെ പിന്തുണയുള്ള ഒരു ശൃംഖലയുടെ പ്രധാന പങ്ക് ചൂണ്ടിക്കാട്ടി പുരോഹിതന്മാർക്കിടയിലെ ഏകാന്തതയുടെ നിർണ്ണായകമായ പ്രശ്നത്തെ പാപ്പാ ചൂണ്ടിക്കാട്ടി. “ഈ യാത്ര ഒറ്റയ്‌ക്ക് നടത്താനുള്ളതല്ല,” പാപ്പാ പറഞ്ഞു. തുടർ രൂപീകരണത്തിന്റെ ഭാഗമായി വൈദികർക്ക് പിന്തുണയും ശക്തിയും  അനുഭവപ്പെടുന്നുവെന്ന് ഉറപ്പാക്കാൻ ഒരു ആഗോള ശൃംഖല വളർത്തുന്നത് തുടരാൻ ഡികാസ്റ്ററിയെ പാപ്പാ പ്രേരിപ്പിച്ചു.

വൈദീക ദൈവവിളിയുടെ കുറവ്

പൗരോഹിത്യത്തിലേക്കുള്ള ദൈവവിളികൾ ഗണ്യമായി കുറഞ്ഞുവെന്ന് ഫ്രാൻസിസ് പാപ്പാ അംഗീകരിക്കുകയും സമർപ്പിത ജീവിതം ഒരു സമ്മർദ്ദപരമായ വെല്ലുവിളിയായി അംഗീകരിക്കുകയും ചെയ്തു. വിവാഹത്തിലേക്കുള്ള  വിളി ബാധിക്കുന്ന പ്രതിസന്ധിയെ കുറിച്ചും പാപ്പാ പരാമർശിച്ചു.  ഇത് പരിഹരിക്കുന്നതിന്, എല്ലാ ക്രൈസ്തവ വിളികളിലും നവമായിട്ടുള്ള  ശ്രദ്ധ കേന്ദ്രീകരിക്കാൻ പാപ്പാ അത്രം ആഹ്വാനം ചെയ്തു.

സ്ഥിരം ഡയകോണേറ്റ്

സ്ഥിരമായ ഡയക്കണേറ്റിനെക്കുറിച്ച് വിചിന്തനം നടത്തിക്കൊണ്ട്, ഫ്രാൻസിസ് പാപ്പാ അതിന്റെ പ്രത്യേക സ്വത്വത്തെക്കുറിച്ചും പ്രത്യേകിച്ചും സമീപകാല ബിഷപ്പുമാരുടെ സിനഡിൽ നിന്നുള്ള ശുപാർശകളുടെ വെളിച്ചത്തിൽ  ആഴത്തിലുള്ള വിചിന്തനം ആഹ്വാനം ചെയ്തു. ഉപവിയും ദരിദ്രർക്കുള്ള സേവനവുമാണ് ഡയകോണേറ്റിന്റെ കേന്ദ്രമെന്ന് പാപ്പാ ഊന്നിപ്പറഞ്ഞു.

ഈ ശുശ്രൂഷയിൽ നടന്നുകൊണ്ടിരിക്കുന്ന പരിചിന്തനങ്ങളെയും സംഭവവികാസങ്ങളെയും പിന്തുണയ്ക്കാൻ ഡികാസ്റ്ററിയെ പ്രോത്സാഹിപ്പിച്ചുകൊണ്ട്, ക്രിസ്തുവിന്റെ ഹൃദയത്തിനനുസരിച്ചുള്ള അജപാലകർ ദൈവജനത്തിന് ഉണ്ടെന്ന് ഉറപ്പാക്കണമെന്ന് പാപ്പാ  പറഞ്ഞു. എല്ലാ വിളികളുടെയും മാതൃകയായ പരിശുദ്ധ മറിയത്തെ ഭരമേൽപ്പിച്ചാണ് പാപ്പാ തന്റെ സന്ദേശം ഉപസംഹരിച്ചു.