ഐക്യരാഷ്ട്രസംഘടനയുടെ പൊതുസഭയുടെ അദ്ധ്യക്ഷൻ വത്തിക്കാനിൽ!

ജോയി കരിവേലി, വത്തിക്കാൻ സിറ്റി

ഐക്യരാഷ്ട്രസംഘടനയുടെ പൊതുസഭയുടെ അദ്ധ്യക്ഷൻ ഡെന്നീസ് ഫ്രാൻസീസിനെ ഫ്രാൻസീസ് പാപ്പാ വത്തിക്കാനിൽ സ്വീകരിച്ചു.

ഇരുപത്തിയൊമ്പതാം തീയതി തിങ്കളാഴ്ച (29/07/24) ആയിരുന്നു ഈ കൂടിക്കാഴ്ച.

പാപ്പായുടെ വാസയിടമായ “ദോമൂസ് സാംക്തെ മാർത്തെ” മന്ദിരത്തിൽ വച്ചായിരുന്നു ഈ സ്വകാര്യ കൂടിക്കാഴ്ചയെന്ന് പരിശുദ്ധസിംഹാസനത്തിൻറെ വാർത്താവിതരണ കാര്യാലയം, പ്രസ്സ് ഓഫീസ് ഒരു പത്രക്കുറിപ്പിൽ വെളിപ്പെടുത്തി.

കരീബിയൻ ദ്വദീപായ ട്രിനിദാദ് ആൻഡ് തൊബാഗൊ സ്വദേശിയാണ് നയതന്ത്രജ്ഞനായ ഡെന്നീസ് ഫ്രാൻസീസ്. 68 വയസ്സു പ്രായമുള്ള അദ്ദേഹം 2023 ജൂൺ 1-നാണ് ഐക്യരാഷ്ട്രസംഘടനയുടെ പൊതുസഭയുടെ അദ്ധ്യക്ഷനായി തിരഞ്ഞെടുക്കപ്പെട്ടത്. അക്കൊല്ലം തന്നെ സെപ്റ്റംബർ 5-ന് ചുമതലയേല്ക്കുകയും ചെയ്തു. ഡെന്നീസ് ഫ്രാൻസീസ് 2021 മുതൽ ഐക്യരാഷ്ട്രസഭയിൽ ട്രിനിദാദ് ആൻഡ് തൊബാഗൊയുടെ സ്ഥിരം പ്രതിനിധിയായിരുന്നു.