സമാധാന അഭ്യർത്ഥനയുമായി ഫ്രാൻസിസ് പാപ്പാ

ഫാ. ജിനു ജേക്കബ്, വത്തിക്കാൻ സിറ്റി

സെപ്തംബർ മാസം പതിനഞ്ചാം തീയതി ഞായറാഴ്ച്ച വത്തിക്കാനിലെ വിശുദ്ധ പത്രോസിന്റെ ചത്വരത്തിൽ ഫ്രാൻസിസ് പാപ്പാ നയിച്ച മധ്യാഹ്ന പ്രാർത്ഥനയ്ക്കു ശേഷം വിവിധ യുദ്ധങ്ങളെപ്പറ്റി പരാമർശിച്ചതിനുശേഷം, സമാധാനത്തിനായി എല്ലാവരും ഒറ്റക്കെട്ടായി പ്രവർത്തിക്കുവാൻ ആഹ്വാനം ചെയ്തു. ഹിസ്ബുള്ളയും ഇസ്രായേലും തമ്മിലുള്ള വെടിവയ്പ്പ് തുടരുന്ന മധ്യപൂർവേഷ്യയിൽ സമാധാനം എത്രയും വേഗം കരഗതമാകട്ടെയെന്നാണ് ഫ്രാൻസിസ് പാപ്പായുടെ ആശംസ. ആയുധങ്ങളുടെ ഉപയോഗം നിർത്തിവച്ചുകൊണ്ട്, പരസ്പരം കരാറിൽ ഏർപെട്ടുകൊണ്ട് സമാധാനം കൈവരുവാൻ മുൻകൈയെടുക്കുവാനും പാപ്പാ ആവശ്യപ്പെടുന്നു.

യുദ്ധത്തിൽ ഇരകളാകുന്ന പതിനായിരക്കണക്കിന് നിരപരാധികളായ മനുഷ്യജീവനുകൾ സംരക്ഷിക്കപ്പെടണമെന്ന ആവശ്യം പാപ്പാ മുൻനിർത്തി സംസാരിക്കുമ്പോൾ, ഇരകളുടെ അമ്മമാരുടെ ദുഖവും പാപ്പാ അടിവരയിട്ടു പറയുന്നു. ഹമാസ് ഗവൺമെൻ്റിൻ്റെ ആരോഗ്യ മന്ത്രാലയത്തിൻ്റെ കണക്കനുസരിച്ച്, 2023 ഒക്ടോബർ 7 ന് ഇസ്രായേലുമായുള്ള യുദ്ധം ആരംഭിച്ചതിന് ശേഷം ഗാസയിൽ 41,206 പേർ കൊല്ലപ്പെടുകയും 95,337 പേർക്ക് പരിക്കേൽക്കുകയും ചെയ്തു.

കഴിഞ്ഞ സെപ്തംബർ മാസം പത്താം തീയതി ഗാസയിൽ മരിച്ച നിലയിൽ കണ്ടെത്തിയ ഹമാസ് ബന്ദികളിൽ ഒരാളായ ഹെർഷ് ഗോൾഡ്‌ബെർഗ്-പോളിനെ പറ്റിയും ഫ്രാൻസിസ് പാപ്പാ അനുസ്മരിച്ചു. യുവാവിന്റെ മാതാവിനെ, കഴിഞ്ഞ നവംബർ മാസം, മറ്റ് ബന്ദികളാക്കപ്പെട്ടവരുടെ കുടുംബാംഗങ്ങളോടൊപ്പം ഫ്രാൻസിസ് പാപ്പാ വത്തിക്കാനിൽ സന്ദർശിച്ചിരുന്നു. ഒക്ടോബർ ഏഴിന് നടന്ന സംഗീതവിരുന്നിനിടയിലാണ് ഗോൾഡ്ബർഗിനെ ഹമാസ് തീവ്രവാദികൾ തട്ടിക്കൊണ്ടുപോയത്. യുദ്ധത്തിന്റെ ഇരകൾക്കായി താൻ പ്രാർത്ഥിക്കുന്നുവെന്നും, ബന്ദികളാക്കപ്പെട്ടവരുടെ കുടുംബാംഗങ്ങളുമായി താൻ നിരന്തരം ബന്ധപ്പെടുന്നുണ്ടെന്നും പാപ്പാ തന്റെ സന്ദേശത്തിൽ പറഞ്ഞു.