കൗദാശിക സൂത്രവാക്യങ്ങളും കൂദാശയ്ക്കുള്ള വസ്തുക്കളും മാറ്റാൻ പാടില്ല!

ജോയി കരിവേലി, വത്തിക്കാൻ സിറ്റി

കൗദാശിക സൂത്രവാക്യങ്ങളിലും കൗദാശികവസ്തുക്കളിലും മാറ്റം വരുത്തിയാൽ ആ കൂദാശ അസാധുവായിരിക്കും എന്നു വ്യക്തമാക്കുന്ന ഒരു ഔദ്യോഗിക കുറിപ്പ് വിശ്വാസകാര്യങ്ങൾക്കായുള്ള വിഭാഗം പുറത്തിറക്കി.

“ജെസ്തിസ് വെർബിസ്ക്വേ” (Gestis verbisque) എന്ന ലത്തീൻ ശീർഷകത്തിലുള്ള ഈ കുറിപ്പ് ശനിയാഴ്ചയാണ് (03/02/24) വിശ്വാസകാര്യസംഘം പുറപ്പെടുവിച്ചത്. വിശ്വാസകാര്യസംഘത്തിൻറെ അദ്ധ്യക്ഷൻ കർദ്ദിനാൾ വിക്ടർ മനുവേൽ ഫെർണാണ്ടസും കാര്യദർശി മോൺസിഞ്ഞോർ അർമാന്തൊ മത്തേയൊയും ഫ്രാൻസീസ് പാപ്പാ ഇക്കൊല്ലം ജനുവരി 31-ന് (31/01/24) അംഗീകരിച്ച ഈ കുറിപ്പിൽ ഒപ്പുവച്ചിരിക്കുന്നു.

കൂദാശയുടെ പരികർമ്മത്തിനായുള്ള നിർദ്ദിഷ്ട സൂത്രവാക്യങ്ങളും അതിനുപയോഗിക്കേണ്ട വസ്തുക്കളും ക്രിയാത്മകതയുടെ മറപിടിച്ച് യഥേഷ്ടം മാറ്റാൻ പാടില്ലയെന്നും അങ്ങനെ ചെയ്യുന്ന പക്ഷം ആ കൂദാശ അസാധുവാണെന്നും, അതായത്, അങ്ങനെയൊരു കൂദാശാപരികർമ്മം നടന്നിട്ടില്ലെന്നും സുദീർഘമായ ഈ കുറിപ്പ് വ്യക്തമാക്കുന്നു.

ഈ കുറിപ്പ് കേവലം സാങ്കേതികതയുടെയോ അല്ലെങ്കിൽ "കാർക്കശ്യത്തിൻറെയോ" പ്രശ്നമല്ലെന്നും പ്രത്യുത, ദൈവത്തിൻറെ പ്രവർത്തനത്തിൻറെ മുൻഗണനയെ സുവ്യക്തമായി പ്രകടിപ്പിക്കുകയും ക്രിസ്തുവിൻറെ ഗാത്രമായ സഭയുടെ ഐക്യം താഴ്മയോടെ സംരക്ഷിക്കുകയുമാണ് ഉദ്ദേശമെന്നും കുറിപ്പിൽ കാണുന്നു.