കർദിനാൾ പരോളിൻ ഇറാൻ രാഷ്ട്രപതിയുമായി സംസാരിച്ചു

ഫാ. ജിനു ജേക്കബ്, വത്തിക്കാൻ സിറ്റി

യുദ്ധം രൂക്ഷമാകാനുള്ള സാധ്യതയെക്കുറിച്ചുള്ള പരിശുദ്ധ സിംഹാസനത്തിൻ്റെ ആശങ്ക പ്രകടിപ്പിക്കാനും, സംഭാഷണത്തിനും, ചർച്ചകൾക്കും, സമാധാനത്തിനും വേണ്ടി അഭ്യർത്ഥനകൾ നടത്തുന്നതിനും, ആഗസ്റ്റ് മാസം പന്ത്രണ്ടാം തീയതി വത്തിക്കാൻ സ്റ്റേറ്റ് സെക്രട്ടറി കർദിനാൾ പിയെത്രോ പരോളിൻ, ഇറാന്റെ പുതിയ പ്രസിഡന്റ് മസൂദ് പെസെഷ്കിയാനുമായി ഫോണിൽ ബന്ധപ്പെട്ടു സംസാരിച്ചു. യുഎസ് സ്രോതസ്സുകൾ അനുസരിച്ച്, അടുത്ത നാൽപ്പത്തിയെട്ട് മണിക്കൂറിനുള്ളിൽ തന്നെ നടക്കുമെന്ന് പ്രതീക്ഷിക്കുന്ന ഇസ്രയേലിനെതിരായ ഇറാനിയൻ ആക്രമണത്തിൻ്റെ നിഴൽ, ആശങ്കകൾ ഉണർത്തുമ്പോഴാണ്, കർദിനാൾ സമാധാനാഭ്യർത്ഥനയുമായി ഫോൺ സംഭാഷണം നടത്തിയത്. വത്തിക്കാൻ മാധ്യമ വക്താവ് മത്തേയോ ബ്രൂണി യാണ് ഇതിനെക്കുറിച്ചുള്ള സ്ഥിരീകരണം മാധ്യമപ്രവർത്തകരെ അറിയിച്ചത്.

പുതിയതായി തിരഞ്ഞെടുക്കപ്പെട്ട രാഷ്ട്രപതിയുടെ പ്രവർത്തനങ്ങൾ എല്ലാം ശുഭകരമാകട്ടെയെന്ന് കർദിനാൾ ആശംസിച്ചു. എന്നാൽ അതേസമയം, നിലവിലുള്ള സാഹചര്യങ്ങളിന്മേൽ വത്തിക്കാൻ ഏറെ ഉത്ക്കണ്ഠയിലാണെന്ന യാഥാർഥ്യവും കർദിനാൾ പരോളിൻ പങ്കുവച്ചു. ജൂലൈ 31 ന് ടെഹ്‌റാനിൽ കൊല്ലപ്പെട്ട ഹമാസിൻ്റെ രാഷ്ട്രീയ നേതാവ് ഇസ്മായിൽ ഹനിയയുടെ മരണത്തിന് മറുപടിയായി ഇറാൻ ഇസ്രായേലിൽ ആക്രമണം നടത്തുമെന്ന മുന്നറിയിപ്പ് വന്നതിനു പിന്നാലെയാണ്, കർദിനാൾ സമാധാനത്തിനുള്ള ആഹ്വാനവുമായി മുൻപോട്ടു വന്നത്.

കഴിഞ്ഞ ബുധനാഴ്ച വത്തിക്കാനിൽ നടന്ന പൊതുകൂടിക്കാഴ്ചാവേളയിൽ  ഫ്രാൻസിസ് പാപ്പായും  മധ്യ പൂർവേഷ്യയിൽ നിലവിലിരിക്കുന്ന സാഹചര്യങ്ങളെ ക്കുറിച്ചുള്ള ആശങ്കകൾ പങ്കുവച്ചിരുന്നു. ഈ രാജ്യങ്ങളുടെ സ്ഥിരതയെ അപകടപ്പെടുത്തുന്ന ആക്രമണം ഒഴിവാക്കാൻ മുഴുവൻ അന്താരാഷ്ട്ര സമൂഹത്തിൽ നിന്നും ആഹ്വാനങ്ങൾ വന്നിട്ടുണ്ട്. "സമാധാനത്തിനായുള്ള ആത്മാർത്ഥമായ അന്വേഷണം തർക്കങ്ങളെ ഇല്ലാതാക്കുമെന്നും, സ്നേഹം വിദ്വേഷത്തെ മറികടക്കുമെന്നും, പ്രതികാരം ക്ഷമയാൽ നിരായുധമാക്കപ്പെടുമെന്നും അതിനായി താൻ ആത്മാർത്ഥമായി പ്രാർത്ഥിക്കുന്നുവെന്നുമാണ്" ഫ്രാൻസിസ് പാപ്പാ പറഞ്ഞത്.