ഡോക്ടർ ഫ്രേയ ഫ്രാൻസീസ് വത്തിക്കാൻറെ അന്താരാഷ്ട്ര യുവജന ഉപദേശക സമിതിയിൽ!

ജോയി കരിവേലി, വത്തിക്കാൻ സിറ്റി

വത്തിക്കാൻറെ, അൽമായർക്കും കുടുംബത്തിനും ജീവനും വേണ്ടിയുള്ള വിഭാഗത്തിൻറെ കീഴിലുള്ള അന്താരാഷ്ട്ര യുവജന ഉപദേശക സമിതിയിലെ, ഐ വൈ എ ബിയിലെ - IYAB (International Youth Advisory Body -IYAB) അംഗങ്ങളിൽ കോയമ്പത്തൂർക്കാരിയായ ഡോക്ടർ ഫ്രേയ ഫ്രാൻസിസും.

മൊത്തം ഇരുപതുരാജ്യങ്ങളിൽനിന്നുള്ള യുവജനപ്രതിനിധികളാണ് ഈ സമിതിയിലുള്ളത്.

ആസ്ത്രേലിയ, ബ്രസീൽ, കാനഡ, കൊളോംബിയ, ക്യൂബ, ഡെന്മാർക്ക്, ഫ്രാൻസ്, ഗിനി, ഹങ്കറി, ഇന്തൊനേഷ്യ, കൊറിയ, ലെബനോൺ, മെക്സിക്കൊ, നൈജീരിയ, പെറു, ഫിലിപ്പീൻസ്, പോർച്ചുഗൽ, അമേരിക്കൻ ഐക്യനാടുകൾ, സിംബാവ്വെ എന്നീ നാടുകളിൽ നിന്നുള്ളവരാണ് ഇതര യുവജന പ്രതിനിധികൾ.

ഏഴാം തീയതി തിങ്കളാഴ്ചയാണ് (07/10/24) ഈ നിയമനം പരസ്യപ്പെടുത്തിയത്. മൂന്നുവർഷമാണ് ഇവരുടെ അംഗത്വ കാലാവധി. അൽമായർക്കും കുടുംബത്തിനും ജീവനും വേണ്ടിയുള്ള വിഭാഗത്തിൻറെ യുവജന കാര്യാലയത്തെ സഹായിക്കുകയാണ് ഇവരുടെ ദൗത്യം. കോയമ്പത്തൂർ സ്വദേശിനിയും ജീസസ് യൂത്ത് പ്രസ്ഥാനത്തിൽ സജീവാംഗവുമായ 27 വയസ്സു പ്രായമുള്ള ഫ്രേയ ഫ്രാൻസീസ് ഹോമിയൊപ്പതി ഡോക്ടറാണ്.