Hebdomada Papae: o boletim em latim de 3 de agosto

“HEBDOMADA PAPAE”

Notitiae Vaticanae Latine redditae

Die tertio mensis Augusti anno bis millesimo undevicesimo

Verba Papae prostitutione oppressis: «Persona nunquam venditári potest».

Visitatio Francisci Domus Provincialis «Regina Mundi», Sororum Congregationis Sancti Vincentii de Paul.

Ambulatio et statio orans in Sanctuario: insolitus dies aestivus Benedicti Decimi Sexti per Castra Romana.    

Salutem ex animo omnibus vobis dicit Alexander De Carolis audientibus novos nuntios latina lingua prolatos.

«Quaevis forma prostitutionis reductio est in servitutem». Id affirmat Papa in prooémio libri cui titulus «Mulíeres crucifixae. Infamia commercii e via narrati», a Reverendo Domino Aldo Buonaiuto scripto, e Sodalitate «Papa Ioannes Vicesimus Tertius», quae semper tradita est muliéribus hac tristi condicione oppressis opitulándo. Singularia refert Emmanuela Campanile:

Franciscus ambágibus non utitur ad reprobandum id quod definit «vulnus conscientiae communis». Eius prooémium libri Reverendi Dómini Aldi Buonaiuto textus brevis est, qui autem patefácit omnem dolorem Papae pro trístibus mulierum prostitutione oppressarum. «Sunt profécto – dicit Papa commémorans titulum libri – mulíeres crucifíxae», mulíeres quae dolorem, iniustítiam et iniúriam cognoverunt. «Persona – scribit Papa – nunquam venditari potest», non est «merx uténda ac póstea abiciénda». Itaque, «liberare has míseras servas gestus est misericordiae et officium ómnium hóminum bonae voluntatis.

Alium aedifícium auxílium paupéribus Romae praebéndo destinátum accépit superiore die dominica inexpectátam visitatiónem Papae Francisci. Ágitur de Domo «Regina Mundi», Filiarum Caritatis Sancti Vincentii de Paul. Tempus fuit simplicis fraternitatis, quod Póntifex degit cum religiosis. Refert nobis Eugenius Murrali:

Franciscus ad límina Domus religiosarum cónstitit, tintinnábulum movens sicuti quílibet hospes. Sic incepit insólitum tempus postmeridiánum Sororum Sancti Vincentii et hóspitum qui in Domo Regina Mundi ministrantur. Papa occursum valde benevolum habuit in aegrotántium cubículo Domus cum Sorore Maria Mucci, superioribus annis culínae sedis Sanctae Martae in Civitate Vaticana addicta. Auscultávit deinde Sororum narratiónem de relíquiis Sancti Ioannis Pauli Secundi in domo asservatis, de tunícula a Pontifice indúta die insidiárum anno millesimo nongentesimo octogesimo primo in eum illatárum. Fuit «praesentia, quae corda sanavit», dixit redactioni vulgo dictae Vatican News Antístita sodalitátis, Soror Maria Rosária Matranga.

Nova caédes in Mediterraneo – centum et quinquagínta mortuórum in naufragio diéi vicesimo quinto mensis Iulii – ímpulit Pontificem ad novum mónitum pro migrántibus. Post Salutatiónem Angélicam, die dominica vicesima octava mensis Iulii, Papa incitávit communitatem internationalem ad agéndum «sine mora ac dubitatióne, ut vitétur quin iteréntur tantae calamitátes et secúritas dignitásque ómnibus praesténtur».

Dies dominica fuit inter locos carissimos, quam Benedictus Decimus Sextus degit die duodetricesimo mensis Iulii. Aetate provectus, Papa Emeritus Castra Romana invisit, ab Episcopo Tusculano Raphaële Martinelli invitato, atque cónstitit sive in hortis sedis papalis Arce Gandulfi sive in oratione apud Sanctuarium quod «Madonna del Tufo» appellatur in vico Álgido. Benedictus Decimus Sextus ínsuper, nuntium dírigens ad parochum oppidi vulgo dicti Romano Canavese, memoriam fecit decénnii a visitatióne aestívo témpore perácta inter locos pedemontanos.

 Finis fit huius editionis, gratias agimus pro attentione; conveniemus iterum hebdomada proxima.