Hebdomada Papae, o boletim em latim do Vatican News

“HEBDOMADA PAPAE”

Notitiae Vaticanae Latine redditae

Die secundo mensis Novembris anno bis millesimo undevicesimo

xplícuit Sýnodus de Amazónia. Papa ait: cor sit iudícium pastorále, culturále, oecológicum atque sociále.

In Civitate Vaticana data est Declarátio coniúncta religiónum abrahamiticárum de vita tutánda.

Lítterae Cardinális Piacenza: indulgéntia plenária gestus est, qui aeternitátem sapit.

Ómnibus vobis audiéntibus salútem imo ex corde dicit Catharína Agorelius, quae hanc editiónem nuntiórum Latína língua prolatórum confert.

Papa Franciscus cláusit sábbato vicésimo sexto mensis Octobris, ópera Sýnodi speciális Regióni Panamazónicae dicátae, superióribus tribus hebdómadis peráctae. Agit Michaël Raviart:

In conclusióne Sýnodi speciális Amazóniae dicátae et novis peragrándis itinéribus ecclesiálibus sub luce propositórum oecológiae integrális, Póntifex resúmpsit ópera Sýnodi in quattuor cápitibus: culturáli, oecológico, sociáli ac pastoráli. Franciscus locutus est de moménto inculturatiónis Ecclésiae et consciéntiae oecológicae ac denuntiávit labem culturális identitátis. Quartum caput, pastorále scílicet et Evangélii núntium, ómnia ampléctitur et urgens est, ait Papa, qui enarrávit in opéribus synodálibus peragéndis de novis ministériis disputátum esse, ad permitténdum indígenis iter sacerdotale et munus mulíerum in Ecclésia prolatándum.

Data est Romae Declarátio coniúncta legatórum religiónum, quae fidem uníus Dei confiténtur, abrahamiticárum quoad finem vitae et mortem voluntáriam medicórum ope ministrátam. Prǽses Pontifíciae Académiae pro Vita, Excellentíssimus Dóminus Vincéntius Paglia, explicávit diálogum annum ac seméstre perseverásse «méntium commutatiónibus ac convéntibus» et pervenísse ad concúrsum trium religiónum, praeter dissimilitúdines. Agit Monia Parente:

Declarátio «histórica»: his verbis Archiepíscopus Vincéntius Paglia, Prǽses Pontificiae Academiae pro Vita, descríbit Documentum de euthanásia et morte voluntária medicórum ope ministráta, die duodetricésimo mensis Octóbris in Civitáte Vaticána signátum a legátis religiónum abrahamiticárum. Prǽsul elátius expréssit nunc primum Hebrǽos, Christiáni ac Mahometáni «subscripsísse una simul declarationem de vita tutánda, declaratiónem quae vitam amat usque ad tránsitum finálem, qui mors est». Áddidit quoque Declaratiónem explanáte censére recusatiónem et repugnántiam cuiúsvis géneris euthanásiae, quóniam haec «facínora sunt omnino impugnántia prétium vitae humánae».   

Paucis diébus ante Sollemnitátem Ómnium Sanctórum et Commemoratiónem Ómnium Fidélium Defunctórum, Cardinális Maurus Piacenza, Paenitentiárius Maior, in littéris affirmávit moméntum precatiónis, paeniténtiae et óperum misericórdiae. Indulgéntia plenária pro caris, sícuti scripsit, actio est «pónderis infiníti».

Motu Proprio Papa Franciscus státuit Archívum Secrétum Vaticánum, ámplius quadringéntos annos in ministério Sanctae Sedis, nuncupatúrum esse «Archívum Apostólicum Vaticánum» ad pravas quasdam interpretatiónes diriméndas vocábulo «secrétum» adiunctas. 

Haec ómnia sunt pro hac editióne, conveniémus íterum hebdómada próxima.