Hebdomada Papae, o boletim em latim do Vatican News

“HEBDÓMADA PAPAE”
   Notítiae Vaticánae Latíne rédditae
             Die décimo mensis Octóbris anno bismillésimo vicésimo

(MANCHETES)

Francíscus in Audiéntia Generáli ait: opórtet sint Christiáni audáces.

Papa instítuit Commissiónem de Negótiis reservátis.

Póntifex exhortátur, praesértim témpore pestiléntiae, ut cuncta provehántur quae subsídium persónae humánae ac societáti férant.

Salútem plúrimam ómnibus vobis audiéntibus dicit Márius Galgano bene felicitérque sit vobis audiéntibus núntios latína lingua prolátos.

(REPORTAGENS)

In Audiéntia Generáli die séptimo mensis Octóbris hábita, Papa Francíscus íterum de oratióne lóquitur, post sériem curatiónis Creáto dicátam, in mundo pestiléntia vulneráto. Oráre, affírmat Papa, “non ídem est ac ánimam fucáre”, sed est “quǽdam cum Deo conspirátio” qui íncitat “ad frátribus inserviéndum”. Réfert nobis Alexánder De Cárolis:

“Opórtet spíritum Elíae habeámus”, hóminis vitae contemplatívae ac eódem témpore actívae, “cui est ánimus contra regem ac regínam pugnándi, póstquam hi Nabot necavérunt, ut víneam eius occupárent”. Sic in Audiéntia Generáli in Áula Páuli Sexti hábita, Papa rursus de oratióne disséruit, id excípiens quod hic prophéta est expértus. Ántequam catechésim incíperet, salútans fidéles praeséntes, Papa paulísper morátur cum quibúsdam sacerdótibus nuper ordinátis et cum aliquíbus capellánis cárcerum.

Papa Francíscus nominávit Prǽsidem ac Membra Commissiónis de Negótiis reservátis. Núntium dedit Offícium Communicatiónis Sanctae Sedis. “Summus Póntifex die undetricésimo mensis Septémbris, anno bis millésimo vicésimo, nominávit Prǽsidem Commissiónis de Negótiis reservátis Cardinálem Coëmgénum Farrell ac Secretárium Excellentíssimum Dóminum Philíppum Iannone. Elégit etiam Membra huius Commissiónis, Excellentíssimos Dóminos Ferdinándum Vérgez Alzaga et Núntium Galantinum ac Reveréndum Patrem Ioánnem Antónium Guerrero.” Agit Olga Sakun.

Haec erit Commíssio quae síngulis in cásibus státuet de quibus áctibus oeconómicae natúrae opus est cautéla adhibeátur. Ad intellegéndam significatiónem decréti, necésse est id consideráre, quod légitur in “Normis de perspicuitáte, inspectióne et contentióne pactórum publicórum Sanctae Sedis et Status Civitátis Vaticánae”, mense Iunio praetérito éditis. In articúlo quarto huius textus, qui a Papa probátus est ac bréviter definíri potest Codex conductiónum, diligéntius explicátum erat normárum applicatiónem respícere cuncta pacta pública, excéptis quibúsdam cásibus.

(NOTICIAS)

Convéniens moderatóres et minístros Institúti “Depósitae pecúniae mutuandǽque Aerárii”, centum septuagínta annis elápsis a constitutióne huius Institúti itálici, Póntifex cohortátur, praesértim témpore pestiléntiae, ut “quaedam audácter suscipiántur et agántur in humánae persónae ac societátis benefícium”.

Die quarto Octóbris in Cavǽdio Sancti Dámasi in Civitáte Vaticána, iusiurándum dedérunt duodequadragínta mílites tirónes Cohórtis Helvéticae Pontifíciae. Adstábant solum próximi familiáres, qui sedébant seórsum et persónulas induébant, sine legatióne regiónis hospitális. Caeremónia státuit ut mílites tirónes pónant mánum laevam in vexíllo Cohórtis ac manus déxtera elevétur cum tribus dígitis apértis, secúndum sýmbolum Trinitátis.

Finis fit huius editiónis, conveniémus íterum hebdómada próxima.