O boletim em latim do Vatican News

“HEBDOMADA PAPAE”

Notitiae Vaticanae Latine redditae

Die 10 (décimo) mensis Iúlii anno 2021

(bis millésimo uno et vicésimo)

(TITULI)

Papa in valetudin­­ário Gemélli ob praevísam sectiónem chirúrgicam – bonus cursus post interventiónem. Summus Póntifex pro oratiónibus grátias agit

Francíscus in oratióne “Ángelus”: oportet pateámus inopinátis Dei. Post oratiónem Papa hortátur ad diálogum in Svazilándia

Sancta Sedes: áditus universális ad vaccína praebeátur

Salútat vos omnes Cathárina Agorélius editiónem notitiárum Latíne prolatórum auscultántes.

(NOTITIAE PRAECIPUAE)

Die Domínica, nempe 4 (quarto) die Iúlii, post merídiem Summus Póntifex praevísae sectióni chrirúgicae intestíni est subiéctus. Cursus post sectiónem est bonus. Papa ob núntios et oratiónes ex toto orbe adveniéntes commovétur. Lóquitur Monia Parente.

“Innúmeris movémur núntiis atque afféctu his diébus accépto. Grátias ágimus ómnibus propter proximitátem et oratiónem”. Brevilóquio diéi 7 (séptimi) Iúlii Papa suam gratiárum actiónem erga omnes concrédit, étiam moderatóres religiósos et praésides Státuum et gubernatiónum, qui suam proximitátem voluérunt ei osténdere  in valetudinário degénti. Vésperi die 4 (quárto) Iúlii Papa Francíscus praevísae sectióni chirúrgicae est subiéctus in valetudinário Gemelli Romae ob stenósim diverticulárem denuntiatívam coli, quae provocávit hemicolectómiam sinistram. Moderátor Sedis diurnáriis edocéndis Sanctae Sedis, Matthaéus Bruni, públice assert  de bona condicióne Papae atque de cursu post sectiónem qui recte procédit. Póntifex in valetudinário circa septem díes déget, nisi evéniant implicatiónes.

Ante oratiónem “Ángelus” die 4 (quarto) Iúlii, Papa Evangélium domenicále est interpretátus et evéntum ubi Iesus véluti prophéta reiéctus est a suis concívibus de Názareth. Póstea ad reconciliatiónem adhortátus est in Svazilándia. Lóquitur Olga Sakun.

Iesus véluti Prophéta sua in urbe Názareth despícitur quia éius concíves “scándalum Incarnatiónis non accípiunt”. Ita Papa Francíscus interpretátus est, in catechési quae oratiónem “Ángelus” praecéssit die IV (quarto) Iúlii, incredulitátem incolárum Názareth, in Evangélio secúndum Marcum descríptam. Étiam nos omnes in perículo versámur dum nóstris in praeiudíciis cláudimur, dixit Póntifex et explanávit responsiónem adésse in ánimo stupórem in occúrsu cum Iesu. Post oratiónem Mariálem “Ángelus” Francíscus admonitiónem prótulit, de contentiónibus et violéntiis in Svazilándia sollícitus, adhórtans “ad óperam commúnem pro diálogo suscipiéndam, ad reconciliatiónem et pacíficam compositiónem diversárum pártium”.

(NOTITIAE BREVISSIMAE)

Adhortátio ad mundum ut solidarietáte pandémiam aggrediátur, aéqua vaccinórum distributióne, utque migrántes et prófugae defendántur. Plúrima sunt arguménta quae Sancta Sedes in lucem pósuit per divérsos sermónes apud Natiónes Unítas Genávae pronuntiátos inter diem 24 (vicésimum quártum) Iúnii et 6 (sextum) Iúlii.

Ipse Póntifex confirmávit, in conclusióne precis “Ángelus” die 4 (quarto) Iúlii, in Foro Petriáno, iter suum in Slováchiam próximis diébus 12-15 (a duodécimo usque ad quíntum décimum) Septémbris, explánans mane diéi 12 (duodécimi), ántequam Bratisláviam petat, Budapestíni, in urbe cápite Hungáriae, Missam in conclusióne Congréssus Eucharístici Internationális se celebratúrum.

Haec háctenus, próxima hebdómada conveniémus.