Hebdomada Papae: o boletim de notícias em latim do Vatican News

“HEBDÓMADA PAPAE”

Notítiae Vaticánae Latíne rédditae

Die duodevicésimo mensis decémbris anno bis millésimo vicésimo primo

(TÍTULI)

In Audiéntia Generáli catechéses proséquitur Papa de sancto Ioseph, viro “siléntii”, et dolórem signíficat pro víctimis deflagratiónis in Haítia.

Francíscus in Salutatione Angélica ádmonet, ut témpore Nativitátis fidem in ópera immutémus, et precátur pro Ucraína.

Póntifex in Audiéntia Institútis Vitae Consecrátae concéssa: Caveátur a malis úsibus potestátis et auctoritátis.

Ómnibus vobis cómiter salútem dicit Catharína Agorelius: optáti audiátis editiónem hanc nuntiórum latína língua prolatórum.

(NOTÍTIAE PRAECÍPUAE)

In meditatióne, quae Salutatiónem Angélicam diéi duodécimi mensis decémbris praecéssit, Póntifex síngulos admónuit, qui quómodo Nativitátem apparatúri sint consisténtes quaerant. De his refert Rosárius Tronnolone.

«Quid nobis faciéndum?». De hac quaestióne, quae in médio Evangélio est litúrgiae domínicae tértiae Advéntus, intérrogant turbae Ioánnem Baptístam, dum in precatióne sua Dóminum iam subésse annúntiat. Quam – dixit Papa Francíscus in Salutatióne Angélica diei duodécimi mensis decémbris – numquam nobis a Dómino quǽrere esset timéndum. Papa síngulos adhortátus est, ut consístant quaeréntes quómodo apparánda sit Natívitas, cum fides speculátio non sit, sed carnem attíngat et vitam commútet. Expléta mariáli precatióne, Póntifex mentem ad angústias pópuli Ucraíni inténdit, pacem expóscens et tamquam viam unam ad contentiónes componéndas diálogum suádens.

In catechési quarta sancto Ioseph dicáta, die décimo quinto mensis decémbris Papa Francíscus mónuit ad virtútem interióris hóminis a patre Iesu in terris discéndam, qui voci Dei concédit ut in córdibus se éxprimat. In salutatiónibus proximitátem suam pópulo Haitiáno significávit, qui víctima est novíssimae calamitátis. De his Monia Parente:

«Discámus a Ioseph, qui numquam in Evangéliis lóquitur, sed siléntium récolens locum Dei Verbo facit et sinit Spíritum Sanctum refícere nos et línguam nostram sanáre, ne ámplius frátribus vúlnera ínferat. Ab eo discámus siléntio operatiónem coniúngere». Hoc mónitum ad omnes vertit Papa Francíscus in quarta catechési in Audiéntia Generáli patri Iesu terréno dicáta. Audiéntia expléta, Papa de calamitáte deflagratiónis cistérnae automatáriae commónuit, quae in Haítia vehiculórum propulsórium óleum advehébat, et oratiónes postulávit «pro his frátribus sororibúsque persevére vexátis».

(NOTÍTIAE BREVÍSSIMAE)

In Audiéntia Coetus Plenárii Congregatiónis pro Institútis Vitae Consecrátae et Societátibus Vitae Apostólicae particípibus praetérito die undécimo mensis decémbris concéssa, Papa in duóbus verbis innísus est allocutiónem suam, vidélicet discérnere et comitári, et omnes vocávit ut summa cura atténderent ad exercítium auctoritátis in vita religiósa, quod tamquam ministérium, non autem potestátis acérvus est habénda.

Haec ómnia sunt pro hac editióne; conveniémus íterum sábbato próximo, eádem hora.