Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die duodécimo mensis Mártii anno bis millésimo vicésimo secúndo

(TÍTULI)

Bellum perniciósum in Ucraína ómnibus víribus est componéndum: hoc eláte dixit Summus Póntifex in Angélica salutatióne die domínico, qui intérea Intercessiónis munus Sanctae Sedis óbtulit.

Duo cardináles in Ucraínam a Francísco Papa sunt missi gentes illas comitatúri, ut adiuménta item deférrent atque proximitátem sollicitudinémque Ecclésiae manifestárent.

Per núntium televisíficum, precatiónem mense Mártio dicéndam secum feréntem, Francíscus quaesívit ut precarémur ad christiánas ratiónes in bioéthicam inferéndas.

Salútem plúrimam ómnibus vobis auscultántibus núntios Latína lingua prolátos dicit Philíppus Herrera-Espaliat.

NOTÍTIAE PRAECÍPUAE)

Páctio est ineúnda et humanitátis viae in Ucraína praestituéndae: hoc ácriter praetérito die domínico postulávit Francíscus Papa post Angélicam salutatiónem. Ipse ínsuper de pace instánter deprecánda est locútus. Lóquitur Márius Galgano.

Palam illud asséruit Póntifex: quod in Ucraína áccidit non est tantum militáre opus, sed ipsum bellum, quod mortem, úrbium eversiónes et calamitátes secum fert. Verba haec merídie in foro Petriáno enuntiávit, cum ádmodum permótum se osténderet Póntifex coram proéliis, quae abhinc duas hebdómadas commísit Rússia advérsum próximam Natiónem. Huc áddidit quod in Ucraína gravíssime necéssitas aúcta est homínibus subveniéndi, ideóque postulávit ut inter natiónes ius servarétur, cívibus tutéla praestarétur atque darétur cópia ut commeátus locis obséssis transmitteréntur. Íterum confirmávit Summus Póntifex ómnia Sanctam Sedem factúram, ut conténtio componerétur, paci útique inserviéntem.

Duo cardináles in Ucraínam sunt profécti et in próximas Natiónes nómine Summi Pontíficis, ut condiciónes exquírerent profugórum ac subsídia deférrent et Ecclésiae propinquitátem nuntiárent iis qui bello implicántur. Dicit Catharína Agorelius.

Eleemosynárius pontifícius Conrádus Krajewski, primus fuit cardinális a Francísco Papa missus ut Ucraínam ingrederétur, ubi bellum exardéscit. Post commoratiónem nonnúllis diébus apud Polonórum fines, ipse ingrédi pótuit Leópolim, Ucraínam urbem, ut prófugis totíque Natióni spiritále verúmque Pontíficis subsídium testarétur, qui pecúniam cóntulit súmptibus pro autocíneto onerário instruéndo, ad opem feréndam. Cardinális áutem Míchaël Czerny per fines Hungarórum tránsiens, ad vicum Beregove pervénit, ubi pyróboli non cecidérunt, sed illuc innúmeri prófugi pervenérunt. Illis verba et acta soláminis ac spei sunt dispertíta. Máximae grates voluntáriis referúntur institúti quod est Cáritas Hungárica, qui óperam dedérunt frátribus sororibúsque recipiéndis, vim fugiéntibus.

(NOTÍTIAE BREVÍSSIMAE)

Per núntium televisíficum, precatiónem mense Mártio dicéndam secum feréntem, Francíscus confirmávit biotechnológiam adhibéndam persónam et ámbitum observáre debére. Altiórem usque discretiónem flágitat ne alicúius arbitrátu technológicum progréssum patiámur, sed ut eúndem comitémur, hómini serviéntem. Póntifex cohortátur ad orándum ut bioéthicis postulátis christiánae subsint ratiónes.

Haec habúimus quae referrémus, nova próxima hebdómada.