O boletim em latim do Vatican News

                                                             “HEBDOMADA PAPAE”
                                                    Notitiae Vaticanae Latine redditae
                     diei vicesimi quinti mensisi Iunii anno bismillesimo vicesimo secundo

(TITOLI)

De Afghanistánia, terrae motu valde quassáta, sollicitátur Póntifex.
Maeret vehementérque dolet Francíscus propter duos religiósos e Societáte Iesu in México interémptos.
Ad Francísci mónitum, senectútis infirmitáte laborántibus, Christum testificári discéndum est.

Ómnibus vobis cómiter salútem dicit Márius Galgano: optáti audiátis editionem hanc nuntiórum latína língua prolatórum.

(SERVIZI)

Afghanistániae genti suam propinquitátem testátur Francíscus Póntifex, cum iníbi véspere fériae tértiae terrae motus factus esset atque innúmeri hómines interiíssent aut vulneráti essent. Magnitúdo quassatiónis fuit círciter sexti gradus, quae in orientáli meridianáque Natiónis parte, prope Pakistániam, cóntigit. Lóquitur Mónia Parente.

Quómodo in Audiéntia Generáli féria quarta memorávit Póntifex, ob terrae motum complúres desiderántur hómines magnáque detriménta Afghanistániae sunt illáta. Suam proximitátem sáuciis osténdit Francíscus ac terrae motu afféctis, et precátur simul pro iis qui vitam amisérunt eorúmque propínquis. Cunctis opem feréntibus, vota Ipse súscipit, ut ab incómmodis dilécta Afghanistániae gens levétur. Illíus Natiónis potestátes a subsidiórum institútis postulavérunt, ut cito pópulo subveniátur, ad ingéntem hóminum vitándam iactúram.
***
Maeret vehementérque dolet Francíscus Póntifex propter duos religiósos e Societáte Iesu et láicum in México, his diébus, interémptos. Refert Rosárius Tronnolone.

Duo religiósi, vidélicet Xavérius Campos et Ioachímus Mora, manuballísta enecáti sunt intra Ecclésiam in loco Cerocahui in dicióne Tarahumárae, in civitáte septentrionáli Chihuáhuae. Hucusque tertii interémpti etiam néscitur nomen et quómodo interfécti sint adhuc est inquiréndum. Per brevilóquium Pater Artúrus Sosa Abascal, Praepósitus Generális Societátis Iesu, pénitus «permótum doloréque afféctum» se esse asseverávit propter ea, quae accidérunt suamque proximitátem osténdit Mexicánis sodálibus ac familiáribus item occisórum, cohórtans páriter ut "nostro ex terrárum orbe violéntia amoveátur ac tot inútiles dolóres depellántur".

(NEWS)

In Audiéntia Generáli in Foro Petriáno, tractávit Póntifex de senum debilitáte, quae éfficit ut in quodam aliéno subsídio nitántur. Senes iuvénibus, qui eórum locum óbtinent ne invídeant; nam cum invíti diu non operántes – argumentátur Francíscus – ánimi ex affectióne ad contemplatiónem incúmbunt et ad commótam Verbi Dómini auditiónem, tum pulchérrimam vitam éxigunt.

Haec ómnia sunt pro hac editióne; conveniémus íterum sábbato próximo.