Hebdomada papae, o boletim em latim do Vatican News

HEBDÓMADA PAPAE”

Notítiae Vaticánae Latíne rédditae

Die décimo sexto mensis Iúlii anno bismillésimo vicésimo secúndo

(TÍTULI)

Haec Pontíficis: Caeli status discrimínibus subveníre debémus, emissiónes minuéntes.

Ex Epíscopis Graeco-Cathólicis Papa petit ut Ucraínae gentes consoléntur earúmque ánimum attóllant.

In Dicastério pro Episcopis Summus Póntifex tres mulíeres nóminat.

Salútem plúrimam ómnibus vobis auscultántibus dicit Márius Galgano et felíciter vobis audiéntibus núntios Latína lingua prolátos.

(NOTÍTIAE PRAECÍPUAE)

Quod terrárum orbis genus nobis futurísque homínibus vólumus? Haec est máxima percontátio quae in Francísci Papae inest sermóne ad partícipes Conferéntiae, quam Pontifícia Académia Scientiárum instítuit, in Civitáte Vaticána tértio décimo et quarto décimo diébus mensis Iúlii, cuius arguméntum: “Resiliéndi vis personárum et oecosystémata in condiciónibus caeli status afflícti”. Lóquitur Olga Sakun.

Hoc in documénto illud elátius éxprimit Póntifex: “Quod caelus status mutátur, hoc est factum haud leve, quod apud societátis márgines iam non manet”. Atque praecípuum obtínuit locum, cum humánam famíliam contíngeret, “páuperes in primis et eos qui in mundi oeconómicis fínibus vivunt”. Postquam quaedam bíblica praecépta memorávit, Francíscus plane argumentátur nostram commúnem Domum curándam, étiam caeli status mutáti efféctuum nulla ratióne hábita, “non esse merum utilitátis conátum, at probum offícium ómnium virórum ac feminárum, qua Dei fílii sunt”.  Hae provocatiónes nos impéllunt ut plúribus ratiónibus rem aggrediámur álias ad tuéndos síngulos, álias ad nostram terram servándam.

Idem usque est exémplar, scílicet pastóris qui óvium odórem pércipit. Hoc effátum Pontíficis haeret in medúllis, quod Epíscopis Graeco-Cathólicis Ucraínis rursus óbtulit, a die séptimo mensis Iúlii praetériti usque ad diem Véneris, apud Premisliénsem Latinórum Sedem Polóniae in Sýnodo coadunátis, quam Sedem, pro cóngrua Kioviénsi Sede propter bellum impédita, elegérunt. Refert Mónia Parente.

Praestat ante ómnia Francíscus suas preces suámque propinquitátem Ucraínae patiénti pópulo. Memóriam répetens Mártyrum Ecclésiae Graeco-Cathólicae Ucraínae, praetérito die vicésimo séptimo mensis Iúlii celebrátam - qui mártyres a Ioánne Páulo secúndo, Ucraínam visénte anno bismillésimo primo in sanctórum album Leópoli sunt reláti – Francíscus palam osténdit quómodo ex hodiérni belli rebus liquídius intellegántur vices illórum sacerdótum, monachórum ac monachárum, patiéntium sub communistárum dominatióne. Ánimum Ipse confírmat Episcopórum Graeco-Catholicórum Ucraínae, ut “ob óculos hábeant Ecclésiae et cuiúsque fidélis bonum”. Quae Ecclésia porro “locus sit occúrsus mutuíque auxílii”, in primis ad fidéles comitándos.

(NOTÍTIAE BREVÍSSIMAE)

Tres sunt mulíeres hac hebdómada inter membra Dicastérii pro Epíscopis adscítae a Francísco Papa, quae sunt Soror Raphaéla Petrini, Ivána Reungoat et María Lia Zervino. Óperam dabunt próximis eligéndis Epíscopis dioecesánis.

Si forte a pontificátu se abdicáre debéret, quod hoc témpore mínime vellet, Francíscus vocári nollet  “Papa eméritus”, neque album vestiméntum indúeret, non víveret in Civitáte Vaticána neque redíret in pátriam Argentínam, sed esset tantum “Epíscopus eméritus Romae”, reconciliatiónis sacraméntum impertíret atque aegros invíseret. Hoc televisíficae emissióni, quae est Televisa Univision, dixit.

Finis fit húius editiónis, conveniémus íterum próxima hebdómada, eádem hora.