Hebdomada Papae: as notícias da semana em latim

 “HEBDÓMADA PAPAE”
                                                 Notítiae Vaticánae Latíne rédditae
                            Die secúndo mensis Iúlii anno bismillésimo vicésimo secúndo

(TÍTULI)
In sollemnitáte sanctórum Petri et Páuli Apostolórum praecípua Pontíficis senténtia: tempus est álios recípere, in Ecclésia omnes suum repériunt locum.
Cum décimus Mundiális Familiárum Occúrsus agerétur ac Missa celebrarétur Póntifex dixit: família est locus ubi amáre díscitur et a se ipsis exíre.
Senténtia Pontíficis: “Satis de disputatiónibus super litúrgia, dénuo eius pulchritúdinem detegámus”.

Salútem plúrimam ómnibus vobis auscultántibus dicit Catharína Agorelius et bene felicitérque sit vobis audiéntibus núntios Latína lingua prolátos.

(NOTÍTIAE PRAECÍPUAE)

In sollemnitáte sanctórum Petri et Páuli Apostolórum exoptávit Francíscus Póntifex ut utérque apóstolus nos conpéllat omnes ut festinánter surgámus ad terrárum orbem humaniórem efficiéndum. Refert Rosárius Tronnolone:
Septem mília fidélium in papáli basílica Sancti Petri adfuérunt aeque ac quadragínta quáttuor Archiepiscopórum metropolitárum, verténte anno renuntiatórum, maior pars, legátio Patriarchátus oecuménici Constantinopolitáni. In sollemnitáte sanctórum Petri et Páuli Apostolórum die undetricésimo mensis Iúnii, Francíscus Papa benedíxit ac pállia Archiepíscopis metropólitis recéntis nominatiónis, trádidit. Ipsos allóquens, duórum apostolórum testificatiónes exhíbuit, atque est cohortátus ad festinánter surgéndum et bonum certámen ineúndum, ne in consuetúdinis cárcere, sicut Petrus, caténa devíncti manerémus atque ut Ecclésia essémus solidális, quae stúdio dúcitur ad Evangélium nuntiándum et ad omnes recipiéndos ut humánior terrárum orbis efficiátur.

Cum décimus Mundiális Familiárum Occúrsus agerétur, Missam in Foro Petriáno celebrávit Francíscus Papa, adstántibus vigínti quinque mílibus fidélium ex omni terrárum orbe, qui est cohortátus ut in família spíritus servítii vera libértas vigéret. Lóquitur Mónia Parente:
In eucharística celebratióne die quinto et vicésimo mensis Iúnii apud Petriánum Forum, cum décimus Mundiális Familiárum Occúrsus agerétur, interfuérunt vigínti quinque míllia fidélium ex omni terrárum orbe. Occúrsus arguméntum “Familiáris amor: vocátio et sanctitátis via” atque illíus diéi lectiónes comméntans Francíscus Papa de famíliae vocatióne disséruit, cum ea esset primus locus, in quo amáre díscitur. Famílias est adhortátus Francíscus “ut ex ánimo rursus susciperétur” et laetánter próprium iter nonnúmquam árduum. “Amor qui inter vos viget semper páteat, effúsus, qui debilióres sauciósque “contíngere” váleat, in via invéntos”: sic locútus est Póntifex.

(NOTÍTIAE BREVÍSSIMAE)

Novas per Lítteras apostólicas, die undetricésimo mensis Iúnii evulgátas, cuius títulus “Desidério desiderávi”, Francíscus Papa eucharísticae celebratiónis effert altum sensum, prout e Concílio éxstitit Ipséque ad litúrgicam institutiónem hortátur. Póntifex: “Satis de disputatiónibus super sacra litúrgia, íterum eius pulchritúdinem detegámus”.
Praecípue de Ucraína cógitat Francíscus Papa, finem Mariáli precatióni impónens die undetricésimo mensis Iúnii, atque hortátur ad continénter orándum: “cotídie in corde caram sauciámque Ucraínam téneo, quae immánibus incúrsibus usque verberátur”.
Haec háctenus, ália nova próxima hebdómada.