Hebdomada Papae, o boletim de notícias do Vatican News

“HEBDOMADA PAPAE”

Notitiae Vaticanae Latine redditae

Die tertio decimo mensis Augusti anno bismillésimo altero et vicésimo

TITULI

«História nostra fírmiter in mánibus est Dei»: sic Papa Francíscus commemorávit in Salutatióne Angélica, fidéles adhórtans ad plene Dómino confiténdum.

Catechéses suas de senectúte prósequens, Summus Póntifex meditátus est in Audiéntia Generáli quómodo aetas maturitátis fóveat cum Deo occúrsum ac tempus sit ad hunc comparándum.

Exséquiae Cardinalis Ioséphi Tomko celebrátae sunt a decáno Collégii Cardinálium in Basílica Vaticána, duodecéntum annos nati, qui die octávo Augústi Romae decéssit.    

Salútem plúrimam ómnibus vobis auscultántibus núntios Latína lingua prolátos dicit Philíppus Herrera-Espaliat.

NOTITIA 1

Coram mille fidélium in Foro Petriáno congregatórum, neglécto Románo aestu, Papa in Salutatióne Angélica die domínica séptima Augústi celebráta, fórtiter adhortátus est ad fidúciam in Deo ponéndam. Meditans Evangélium a litúrgia propósitum, Francíscus appellávit ne animo angámur neque agitémur prae cotidiánis vitae provocatiónibus. Audiámus Marium Galgano.

«Noli timére, pusíllus grex» et «estóte paráti». Has duas adhortatiónes Evangélii dominicális considerávit Summus Póntifex, ut pópuli Dei ánimum confirmáret ad renovándam semper in Dómino fidúciam. Francíscus osténdit nos saepe in ánimo angi ad quaeréndas solutiónes, ad spátium quoddam inveniéndum ubi emérgere possímus, ad cumulánda bona et divítias, ut securitátem accipiámus, atque in anxietáte et constánti agitatióne vívere. Summus Póntifex autem méminit Iesum illum esse qui nobis ánimum reddit, et nobis non esse timéndum, quia «história nostra fírmiter in mánibus est Dei». Post Salutatióne Angélica, Francíscus suum significávit gáudium ob profectiónem e pórtibus Ucraínae primárum návium fruménto onustárum. Senténtia Papae, hoc demónstrat diálogum fíeri posse et ad efféctus certos in belli condicióne perveníre.          

NOTITIA 2

Sériem prósequens catechésium in Audiéntia Generáli senectúti dicátam, Francíscus féria quarta praetérita locútus est de hac vitae aetáte véluti témpore, quo homo maturióre modo ad occúrsum cum Deo appropínquat. Lóquitur Rosárius Tronnolone.

Post intervállum aestívum Iúlii, Papa Francíscus suam explanávit décimam sextam consideratiónem de senectúte véluti «témpore consummatiónem prospiciénti», quia senes occúrsum cum Christo exspéctant. Secúndum Pontíficem, etiámsi in senectúte vires amittántur, vocabulórum fortitúdo, iuventútis et maturitátis ímpetus, hoc  promissiónem veri vitae propósiti illústrat, útpote «loci apud mensam cum Deo, in mundo Dei». Francísci senténtia, oportéret in ecclésiis particuláribus «hoc speciále ministérium exspectatiónis Dómini renovétur, fovéndo charísmata própria et índoles communitárias senis persónae».

NOTITIAE BREVISSIMAE

Ioséphus Tomko, olim Praeféctus Congregatiónis pro Géntium Evangelizatióne, 98 duodecéntum annos natus, máximus natu sodális Collégii Cardinálium, Romae die octávo Augústi decéssit. E Slováchia oriúndus ópera multa apud Sanctam Sedem explévit. Per núntium consolatórium Papa Francíscus suum significávit dolórem propter Cardinális óbitum, quem descrípsit véluti fratrem sapiéntem. Post exséquias in Basílica Vaticána a Cardinále Ioánne Baptísta Re celebrátas, Summus Póntifex ritum celebrávit Ultimae Commendatiónis et Valedictiónis.

Sunt ómnia pro notítiis hodiérnis. Nobis íterum occúrrimus, hebdómada próxima, Deo volénte.