O boletim de notícias em latim do Vatican News

“HEBDÓMADA PAPAE”

Notítiae Vaticánae Latíne rédditae

Die décimo mensis Septémbris anno bismillésimo vicésimo secúndo

(TÍTULI)

In catechési Audiéntiae Póntifex effátur: cor áudi ut tua in vita Deum agnóscas. De pace porro conciliánda cuncti hómines implicántur.

Beatificátio Ioánnis Páuli primi. Francíscus ait: Póntifex iste Evangélii gaudium íntegre est expértus.

Idem Póntifex: ad Maríae exémplum matrum lenitúdo.

Salútem plúrimam ómnibus vobis auscultántibus dicit Catharína Agorelius et bene felicitérque sit vobis audiéntibus núntios Latína lingua prolátos.

(NOTÍTIAE PRAECÍPUAE)

De discrétione catechésim prodúcens, in Audiéntia Generáli die séptimo mensis Septémbris apud Forum Petriánum, quod sancto Ignátio de Loyola áccidit mémorat Póntifex, qui cum convalésceret, coáctus, de vita cogitávit. Exínde Francíscus de pace conciliánda mundum allóquitur. Alexánder de Carolis effátur.

“Deus per evéntus haud statútos operátur, étiam non praevísos. Opórtet próprios actus discérnere coram inopinátis rebus atque intellégere Ille sit qui lóquitur necne”. Francíscus Papa sua in secúnda catechési de spiritáli discretióne, in Audiéntia Generáli die séptimo mensis Septémbris exhíbita,  quod Ignátius de Loyola est expértus elégit. Post catechésim, palam dicens “mundánum bellum nos experíri”, omnes hómines arcessívit ut quisque suum offícium exsequátur, pacis áuctor.

A die domínico novum beátum habet Ecclésia, scílicet Ioánnem Páulum primum. Lóquitur Rosárius Tronnolone.

Die domínico quarto mensis Septémbris in Foro Petriáno ante Papálem Basílicam Sancti Petri, coram vigínti quinque mílibus fidélium, Sanctae Missae praesédit Francíscus de beatificatióne Ioánnis Páuli primi, quem designávit “pastórem mitem et húmilem, qui Iesum est secútus, nulla exceptióne interpósita. Sua in homília Francíscus explicávit Pontíficem Luciáni vixísse “in Evangélii laetítia, nihil de cursu digrediéntem, amántem usque ad finem”, atque “discípuli paupertátem índuit, quae non modo a bonis terréstribus se abdúcere vult, verum étiam se e médio loco amovére et própriam glóriam repudiáre”.

(NOTÍTIAE BREVÍSSIMAE)

“Próximum esse vólumus ómnibus mátribus, mátribus quidem in primis quae fílios languéntes habent”. Ita effátus est Francíscus Papa, cum in Audiéntia Generáli die séptimo mensis Septémbris adstántes salutáret, Nativitátem Beátae Vírginis Maríae mémorans, di octávo mensis Septémbris celebrándam. Peculiárem in modum matres est recordátus quae in cárcere deténtos habent fílios, “ubi sunt tot hómines qui sibi mortem conscíscunt”.

In Audiéntia Generáli di octávo mensis Septémbris occúrsus triennális Legatórum Pontificiórum  partícipes recípiens, Francíscus Papa eláte dixit terrárum orbem pergrávi bello evérti, tum propter violátum ius inter Natiónes, tum ob perniciósos efféctus oeconómicos ac sociáles, necnon ob nucleáre augéscens perículum.

Haec háctenus, nova audiétis próxima hebdómada.