O boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die vicésimo quarto mensis Septémbris anno bis millésimo vicésimo secúndo

(TÍTULI)

In Audiéntia Generáli suo de itínere in Cazakistániam lóquitur Póntifex: cultus virtutísque est Nátio.

Soróris Aloísiae Dell’Orto famíliam Francíscus récipit, quae Haítiae praetérito mense Iúnio est interémpta.

Íterum de Ucraína lóquitur Póntifex qui cohortátur ut illi “nóbili ac mártyri” genti próximi maneámus.

Salútem plúrimam ómnibus vobis auscultántibus núntios Latína lingua prolátos dicit Eugénius Murrali.

(NOTÍTIAE PRAECÍPUAE)

Apostólicum iter in Cazakistániam, nuper suscéptum, catechésis Francísci Papae praecípuum obtínuit locum in Audiéntia Generáli praetérita féria quarta. Praecípuas statiónes recénsuit Póntifex visae Natiónis, in qua pacem et fraternitátem répperit. Réfert Alexánder De Carolis.

“Est porro confirmándum Cazakistániae régimen, iugo abiécto regíminis Deum negántium, humáni cultus iter prae se ferre, qui rem políticam ac religiónem coniúngat”. In Audiéntia Generáli Francíscus Papa suam sic aestimatiónem Asiáticae Natiónis osténdit, ubi séptimo Congréssui moderatórum mundiálium translaticiarúmque religiónum intérfuit. Francíscus ínsuper plane confirmávit Declaratiónem hanc postrémam illam continuáre quae Abu Dhabi anno bismillésimo undevicésimo est subsignáta. Catechésis témpore dixit se Cazakistániae convenísse Ecclésiam, quae “exiguitátis beatitúdinem” experítur ac tot mártyres memorávit “illíus pópuli sancti Dei”. Hac de “Natióne occúrsus, culturárum, linguárum” loquens, Cazakistániam laudávit, animóse repelléntem atómica arma.

Audiéntiae Generális finem fáciens, familiáres Francíscus récipit soróris Aloísiae Dell’Orto, parvae nempe soróris Evangélii Cároli de Foucauld,  quae Haítiae die quinto et vicésimo praetériti mensis Iúnii est necáta. Refert Catharína Agorelius.

Corda movebántur parvae legatiónis, quae e vico Lomágna Brigántiae venit, natívo oppídulo soróris Aloísiae. Pontíficem amplexántes fratres ac nepótes huius religiósae, artum vínculum illíus Ecclésiae sensérunt, cui soror María Aloísia usque ad extrémum sacrifícium insérviit. “Vita fórtior est quam omnes nequítiae, fórtior quidem carnífice, quia vita bonum est, semper, étiam cum inops est”,  haec verba anno bismillésimo quinto décimo scripsit soror Aloísia. Legátio parvam petram Pontífici détulit ex Haítia colléctam, post cathedrále templum ob terrae motum collápsum: est signum ad huius testis memóriam servándam, facúltas nimírum est aedificándi et restaurándi, atque, una simul cum illa, omnes illi perstringúntur qui, suam missiónem agéntes, sánguinem fudérunt, sicut María De Coppi in Mozambíco die séptimo praetériti mensis Septémbris interfécta.

(NOTÍTIAE BREVÍSSIMAE)

Audiéntiam Generálem péragens, Francíscus de Ucraínae bello íterum est locútus. Póntifex réttulit quod cardinális Krajewski vidit, cum praetéritis diébus esset in Ucraína, subsídia latúrus ac demonstratúrus Ecclésiae propinquitátem.

Praetéritis diébus suam proximitátem géntibus, natúrae calamitátibus obrútis, manifestávit Póntifex. In Angélica Salutatióne die duodevicésimo mensis Septémbris in primis Picénam gentem et loca ingénti eluvióne vastáta memorávit aeque ac in Audiéntia Generáli Caraíbicas regiónes die vicésimo primo ingénti túrbine Fióna nuncupáto vastátas.

Finis sit loquéndi. Bene valéte.