Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die vicésimo secúndo mensis Octóbris anno bismillésimo vicésimo secúndo

(TÍTULI)

In Salutatióne Angélica Póntifex ait: “Oratiónis cotidiána aqua opus est, opus est témpore Deo dicáto”.

Discretiónis meditándae arguméntum Pontíficis prodúcitur in Audiéntia Generáli: “Nobis vita magni pónderis est ‘liber’, qui nobis est tráditus”.

De synodalitáte Sýnodus duóbus sessiónibus fruétur, una anno bismillésimo vicésimo tértio, áltera anno bismillésimo vicésimo quarto.

Salútem plúrimam ómnibus vobis auscultántibus núntios Latína lingua prolátos dicit Eugénius Murrali.

(NOTÍTIAE PRAECÍPUAE)

Íterum est perspiciéndum precatiónem praecípuum obtinére locum, ne Dómini communicátio amittátur. In Angélica Salutatióne die praetérito domínico Francíscus Papa est cohortátus ne “noster in Deum amor frigésceret”. Refert Catharína Agorelius.

“Hódie Iesus remédium nobis praebet ut tepefácta fides recaléscat. Quid est? Precátio”. In médio suae cogitatiónis loco pósuit Póntifex hóminis necessitúdinem cum Deo cotidiánis in rebus. Argumentátur Póntifex: Si in terram hódie redíret Dóminus, praeter exitiósa bella, paupertátem et iniquitátes, “miránda téchnicae invénta, nova instruménta, atque item hómines celériter agéntes, numquam sisténtes, inveníret”. At contra ut vivus Dei amor servétur, ne nos “vetérnus óccupet”, cotidiána precatiónis aqua opus est”. Francíscus praetérea “spiritálem consuetúdinem prudéntem, quamvis hódie oblivióne nonnúmquam obruátur”, suádet, quae est precum iaculatoriárum: ipsae “perbréves precatiónes fácile memóriae mandántur”, et eǽdem saepe iterári intérdiu possunt, cum quaedam agúntur, ut cum Dómino ‘coniungámur’. Quaedam exémpla a Pontífice alláta: “Dómine, tibi grátias ago tibíque hunc diem addíco”, “Veni, Sancte Spíritus”, “Iesu, tibi confído teque díligo”.

In Audiéntia Generáli die praetérito Mercúrii suam prodúxit cogitatiónem de discretióne Francíscus Papa: “Vita nostra praestantíssimus est liber nobis tráditus”. Refert Alexánder De Carolis.

Pénitus intérius nostrum intuéntes, instruméntum habémus bonum dignoscéndi a malo. In Audiéntia Generáli unumquémque nostrum mónuit Póntifex ut nostram vitam ponderarémus, “librum quidem quem tam multi non légunt”. Discérnere nos iuváre possunt multórum sanctórum exémpla. Francíscus sanctum Augustínum memorávit, “insígnem veritátis vestigatórem”, qui in libro De vera religióne scribit: “In te ipsum redi. In interióre hómine hábitat véritas”. Ad Pontíficis mentem ne sinámus cogitatiónibus conclúdi, quae a nobis ipsis abdúcunt, “exémpli grátia: ‘Ego nihil váleo’, […] ‘mihi omnia mala evéniunt’, […] nihil boni umquam perfíciam’”. “Haec ‘nóxia’ eleménta agnóscere necésse est, sed ut nostra narrátio laxétur, ad álias res noscéndas, quae locuplétior, ex complicatióne observántior efficiátur”, sic per edóctum intúitum parva vitae mirácula detégere potérimus. Audiéntiae sub finem, Pontíficis cogitátio non défuit de Ucraína, néfasto bello sauciáta, de Nigéria, eluviónibus ingéntibus vastáta.

(NOTÍTIAE BREVÍSSIMAE)

Die domínico, sub finem Angélicae Salutatiónis, Póntifex enuntiávit de synodalitáte Sýnodum duas sessiónes habitúram, unam a die quarto ad diem undetricésimum mensis Octóbris anno bismillésimo vicésimo tértio, álteram mense Octóbri anno bismillésimo vicésimo quarto. Quae eléctio, cogitatiónem, participatiónem iuvans, Ecclésiae vultum demónstrat magis ac magis missionáriae, dum omnes suam agunt partem.

Haec háctenus, nova eventúra, próxima hebdómada.