Hebdomada Papae, o boletim em latim do Vatican News

HEBDÓMADA PAPAE

    Notítiae Vaticánae Latíne rédditae
                 Die décimo quarto mensis Ianuárii anno bismillésimo vicésimo tértio

(TÍTULI)
Póntifex ait: Ucraína quae immáne cruciátur in corde nostro semper manet.
Cardinálem Pell recordátur Póntifex: “Fundaménta prudénter iecit ad Sanctam Sedem reformándam”.
In núntio televisífico una cum precatiónis propósito mensis Ianuárii Francíscus suádet ut disciplínis discéndis addátur fratérnitas.

Salútem plúrimam ómnibus vobis auscultántibus núntios Latína lingua prolátos dicit Márius Galgano.

(NOTÍTIAE PRAECÍPUAE)
In Generáli Audiéntia, die Mercúrii, post catechésim, quae propter bellum pátitur Európa Orientális memorávit Francíscus et coram Beátae Maríae Vírginis a Pópulo effígie pro pace orávit, quae ab Ucraínis et Bielorússis dilígitur. Mónia Parente refert.
Francíscus Papa íterum iterúmque postulávit ut ex memória non efflúeret “vexáta Ucraína, quae in corde nostro manet”. “Huic pópulo, qui acerbíssimos dolóres expéritur nostram ánimi affectiónem, nostram útique proximitátem nostrámque precatiónem patefácimus”. Haec secúndum verba, paulísper cónstitit silens Póntifex coram Beátae Maríae Vírginis a Pópulo, ut áiunt, effígie, quam ipsi Ucraíni et Bielorússi venerántur, “pro illa dilécta Natióne orans et pro pace”. Catechési ad finem addúcta, Polónos peregrínos salútans, áddidit Póntifex “praetéritis diébus Deo de persóna, doctrína exemplóque Papae emériti Benedícti décimi sexti nos grátias egísse”.

Maeror propter repentínum digréssum, sed eódem témpore gratus ánimus osténditur propter “congruéntem actuosámque testificatiónem” itémque “ob studiósam óperam Sanctae Sedi oblátam”. His ánimi sénsibus Francíscus Papa cardinálem Geórgium Pell recordátur, praeféctum nempe eméritum Secretáriae Sanctae Sedis rebus oeconómicis praepósitae, qui die lunae vésperi Romae óbiit. Lóquitur Rosárius Tronnolone.

Per núntium telegráphicum cardináli Ioánni Baptístae Re, Collégii cardinálium decáno, transmíssum, “maerórem” osténdit Póntifex propter óbitum cardinális Austrialiáni, octogésimum álterum annum agéntis, Ipséque suam “proximitátem” familiáribus, cum primis “dilécto fratri David” demónstrat.
“Doléntis porro ánimi sensum osténdimus, congruéntem actuosámque testificatiónem, Evangélio et Ecclésiae deditiónem grati memorántes”: scribit ínsuper Póntifex. Idem mémorat étiam opus quod cardinális egit pro Cúria Romána reformánda, praeféctus Secretáriae Sanctae Sedis rebus oeconómicis praepósitae, anno bismillésimo quarto décimo ad hoc offícium, nato Dicastério, nominátus.

(NOTÍTIAE BREVÍSSIMAE)
In núntio televisífico una cum precatiónis propósito mensis Ianuárii, die lunae per Rete Mundiále Precatiónis effúso, atque institutóribus dicáto, Francíscus suádet ut disciplínis discéndis addátur fratérnitas, “pótius quam certátio”. Institútor, éxplicat Ipse, “testis quidam est qui suas cognitiónes non praebet”, at “suum actum offícium”.
In Audiéntia, hac hebdómada, documénti subscriptóres, quod Ánglice “Rome call” appellátur, de usu éthico intellegéntiae artificiális recépit Póntifex, in Urbe Vaticána coadunátos, qui convenérunt indúctu Pontifíciae Académiae pro Vita et Óperis Fundáti quod est RenAissence. Legáti quoque adfuérunt pártium Hebraeórum et Muslimórum ut una simul technológiae indiscréte adhiberéntur.

Díximus quae dicénda putávimus. Nova audiétis próxima hebdómada.